Biełaruskamoŭnyja prychilniki rep‑muzyki zajmieli internet‑partał. Na staroncy repka.pananieba.org abmiarkoŭvajecca ideja amerykanskaha pradusara zabaranić reperam brydkasłović, reper Kroŭ tłumačyć, za što nie pavažaje repera Pamidorava, a stvaralniki resursu, jakija nazyvajuć siabie Chviadot i Śviedak, nie škadujučy vyrazaŭ, čychvościać ajčynnych rasiejskamoŭnych reperaŭ. «Niemahčyma nidzie vykazacca napoŭnicu tak, jak u rep‑tvory. Słovam možna zabić, dyk čamu nie skarystać hetuju zbroju?» — razvažaje Chviadot, udzielnik hurtu «PANaNieba».
U Biełarusi — bum na rep. Raniej reperaŭ treba było ŭhavorvać, kab jany zaśpiavali na rodnaj movie, a ciapier farmujucca supołki prychilnikaŭ hetaha kirunku. Źjaŭlajucca i zapaminalnyja tvory — «Nie!» ad «Partyzanskaj škoły», «Viečna žyvaja» Vožyka i «Niepieramožnyja» ad «Čyrvonym pa biełym». Na apošni trek stvaralnik «Multklubu» Aleh Minič dniami namalavaŭ klip. «Biełaruski rep jašče nie sapsavany hrašyma, u adroźnieńnie ad amerykanskaha, tamu našy repery nie piajuć pra toje, na jakoj mašynie jany ŭčora jeździli. Ich cikaviać prablemnyja momanty», — miarkuje Śviedak.
Chłopcy nazyvajuć stvareńnie biełaruskamoŭnaha partału pra hip‑hop pieršym krokam da farmavańnia kaalicyi — muzyčnaj dy idejnaj. «I niachaj niechta kaža, što niama sensu ŭ isnavańni takoj rečy, jak biełaruski hip‑hop, my ŭsio adno budziem zajmacca svajoj spravaj. Dobra kazaŭ Kastuś Kalinoŭski: «Nia treba tysiačy, kab pačać, nia treba dvuch, kab pačać, i nia treba adnaho, kab pačać».
