Pryčynaj avaryjnych adklučeńniaŭ elektryčnaści mohuć być haračaje nadvorje i liŭnievyja daždžy. Pra heta paviedamiŭ BiełaPAN viadučy inžynier DVA «Biełenierha» Uładzimir Karduba, kamientujučy fakty avaryjnych adklučeńniaŭ elektryčnaści ŭ Minsku i rehijonach krainy, što pačaścilisia ŭ apošni čas.
Śpiecyjalist zaznačyŭ, što ŭ śpiakotu provad, asabliva 10‑kiłavoltny, moža nahravacca i pravisać. Kali taki provad «laža» na dreva, jość pahroza źjaŭleńnia «ziamli ŭ sietcy». U takich vypadkach na hetym učastku lini elektryčnaść aŭtamatyčna adklučajecca. «Štohod my rasčyščajem 5‑6 tys. km linij elektrapieradačy ŭ rajonach parkaŭ i lasoŭ», — paviedamiŭ U.Karduba.
Pavodle jaho słoŭ, avaryi zdarajucca nie trolki z‑za ŭmoŭ nadvorja, ale i ŭ vyniku tak zvanych «fizičnych nienaŭmysnych padziej», naprykład, padčas pasiaŭnych rabot, kali mohuć paškodzicca apory linij elektrapieradačy.
Śpiecyjalist patłumačyŭ, što ź jakaściu pravadoŭ na vysakavoltnych linijach elektrapieradačy avaryjnyja adklučeńni nijaki nie źviazany. «U nas narmalnaja jakaść pravadoŭ», — padkreśliŭ U.Karduba.
Jak patłumačyŭ viadučy inžynier, čas likvidacyi paškodžańnia elektryčnych sietak nie pavinien pieravyšać 2,5 hadziny — heta samy nizki narmatyŭ siarod byłych krain Savieckaha Sajuza. Jon zaznačyŭ, što dziažurnyja ramontnyja bryhady pa likvidacyi avaryj na elektrasietkach pracujuć kruhłyja sutki.
Abarvanaja linija elektrapieradačy stała pryčynaj hibieli minułaj nočču 45‑hadovaj minčanki i jaje 20‑hadovaha syna. Trahiedyja zdaryłaja 28 maja ŭ 00.20 la doma № 7 pa vulicy Kachoŭskaj u stalicy, kali padčas navalnicy pavalenym drevam była abarvana linija elektrapieradačy.
23 i 24 maja z‑za avaryi na linijach elektrapieradačy śviatło na praciahu niekalkich hadzin adsutničała ŭ niekatorych rajonach Minska. Tak, u rajonie, dzie raźmieščany budynak prezidyuma Nacyjanalnaj akademii navuk Biełarusi, elektryčnaści nie było kala dźviuch hadzin, u šerahu damoŭ mikrarajonaŭ Uručča i Sierabranka — kala 1,5 hadziny.
