2 červienia nacyjanalnaja futbolnaja zbornaja praviała ŭ Miensku adboračny matč da pieršynstva Eŭropy‑2008. Našy prajhrali baŭharam — 0:2. Prajhrali pa zasłuhach. Daŭno nie davodziłasia bačyć našu kamandu takoj słaboj i biezynicyjatyŭnaj.
Paśla hetaha paražeńnia biełarusy zhubili praktyčna ŭsie šancy, kab trapić na čempijanat Eŭropy. U pryncypie, ničoha dziŭnaha nie adbyłosia, bo ajčynnaja zbornaja ad 1992 h., kali jana praviała pieršy aficyjny matč, jašče nikoli nie hulała na top‑spabornictvach.
Usie susiedzi, aproč litoŭcaŭ, prabivalisia na čempijanaty Eŭropy ci śvietu. Rasiejcy i łatyšy hulali na Eŭra‑2004, ukraincy i palaki brali ŭdzieł u letašnim mundyjale.
Samaje dziŭnaje i kryŭdnaje, što prykładnuju siłu hetych kamand možna supastavić ź siłaj biełarusaŭ. Charakterna, što ŭ subotu dva hały ŭ bramu Jurja Žaŭnova zabiŭ lider baŭharskaj kamandy Dzimitar Bierbataŭ z anhielskaha «Totenhema Hotspur». Naš lider Alaksandar Hleb byŭ zdolny tolki na toje, kab biaśsilna razvodzić ruki ŭbok.
Hleb i Bierbataŭ adrazu pa skančeńni čempijanatu premjer‑lihi nakiravalisia pa roznych adrasach. Bierbataŭ na Radzimu, kab praciahnuć padrychtoŭku da matču zbornaj, Hleb — adpačyvać na Kanary. Nia dziŭna, što naša zorka vyjšła na matč nie hatovaja da hulni. Tamu i vynik adpaviedny.
Lider tym i adroźnivajecca ad šarahovaha hulca, što ŭ samyja adkaznyja momanty jon u stanie pavieści za saboj kamandu. Toje, što zrabiŭ u subotu Bierbataŭ. Hleb ža jašče napiaredadni davaŭ svaje prahnozy, što šancy kamand prykładna 70 da 30‑ci na karyść baŭharaŭ. Dyk što kazać pra inšych futbalistaŭ, kali navat lider nia vieryŭ u pieramohu.
Časam dumajecca, ci patrebny kamandzie ŭvohule Hleb? Letaś paśla matču z Słavienijaj nia vytrymaŭ šmathadovy kapitan kamandy Siarhiej Hurenka. U adnym ź interviju jon raskazaŭ, što Alaksandar Hleb razam sa svaim bratam Viačasłavam jeździać na treniroŭki asobnaj mašynaj, a nie z usioj kamandaj. Darečy, trener zbornaj Jury Puntus letaś taksama pryznaŭsia, što Hleb pryjaždžaje ŭ kamandu tolki z umovaj, što za jaje budzie hulać i Viačasłaŭ. U subotu małodšy z bratoŭ Hlebaŭ vyjšaŭ na pole pad śvist trybun.
Biada Puntusa, jak i jahonych papiarednikaŭ, u tym, što jon tak i nia zdoleŭ raspalić u dušach našy hulcoŭ vieru ŭ pieramohu. U subotu kidałasia ŭ vočy, jak biełarusy bajalisia iści na kantakt z supiernikam, kłaścisia ŭ padkatach. Nakolki heta dysanuje z toj ža chakiejnaj zbornaj, hulcy jakoj zdolnyja kłaścisia pad šajby. U jaje i jość vynik.
Syšoŭ z zbornaj jašče adzin lider, Maksim Ramaščanka, jahonaj adsutnaściu ŭ našym składzie dziviŭsia trener baŭharaŭ. Syšoŭ praz roznahałośsi z hałoŭnym treneram Jurjem Puntusam. Heta zaŭsiodnaja biada biełaruskich treneraŭ, što jany nia ŭ stanie abjadnać usich macniejšych ihrakoŭ krainy. Zhadvajecca, jak u 2001 hodzie Eduard Małafiejeŭ publična vyhaniaŭ z kamandy Valancina Bialkieviča i Alaksandra Chackieviča, lideraŭ zbornaj u tyja časy.
Dzivić taksama, što paśla matču nivodzin z hulcoŭ zbornaj nie padyšoŭ da trybunaŭ, kab padziačyć zaŭziataram, jakija amal całkam zapoŭnili stadyjon. I heta ŭžo stanovicca normaj.
Raniej šmat kazałasia, što zbornuju treba pamaładzić. Puntus zrabiŭ heta, ale vyniku jak nie było, tak i niama. Vyniku nia budzie da toj pary pakul u krainie naležnym čynam nie paŭstanie instytut pierajemnaści zbornych. U toj ža Švajcaryi hulać za nacyjanalnuju kamandu rychtujuć užo 14‑hadovych pacanoŭ. Jany z rańnich hadoŭ adčuvajuć adkaznaść za krainu. Našych ža hulcoŭ časam davodzicca ŭhavorvać pryjechać na čarhovy zbor.
My nia budziem hulać na čempijanatach śvietu pakul dziciačyja trenery atrymlivajuć žabrackija zarobki i śpivacca. Zbornaja — heta tolki viaršynia ajsberhu. Za jakoj nia bačnyja tysiačy prablem biełaruskaha futbołu. Futbolnaja infrastruktura naładžanaja tolki ŭ 2‑3 biełaruskich klubach. Inšyja vyrašajuć stavić na lehijaneraŭ. Małym ź mienskaj škoły «Dynama» davodzicca treniravacca na asfalcie. I, jak nia dziŭna, navat ź ich vyrastajuć hulcy eŭrapiejskaha maštabu. Taki stan rečaŭ nia tolki ŭ futbole, ale va ŭsich hulniavych vidach sportu Biełarusi (peŭna, aproč chakieju). Pakul my nia vyrašym hetyja prablemy, to čempijanaty śvietu pa‑raniejšamu buduć prachodzić biez nas.
