2 červienia ŭ Babrujsku prajšoŭ III muzyčny festyval «Rok za Bobrov». Pierad babrujčukami dy haściami festyvalu vystupili hurty «Tajland», «Staja», «Sinica», «Deimos» (Smalensk), «Mieteor», «Stoks», «beZ bileta», «TT‑34», «J:Mors» dy «Lapis Trubiackoj». Niahledziačy na chałodnaje nadvorje, pasłuchać ajčynnych rokieraŭ sabrałasia kala dziesiaci tysiačaŭ čałaviek
«Burštynavy» festyval
Pierad pačatkam kancertu dla žurnalistaŭ i hanarovych haściej festyvalu zładzili ekskursiju na pivavarniu «Siabar», pry padtrymcy jakoha ładzicca ŭžo treci festyval. Persanał uvieś čas pierakonvaŭ, što na siońnia babrujskaja kampanija robić najlepšaje ŭ Biełarusi piva.
Ubačanaje prymušaje pavieryć, što babrujskaje piva prynamsi siońnia ŭ liku lideraŭ. Na brovary zadziejničanaje niamieckaje abstalavańnie. Adna tolki labaratoryja jakaści praduktu kaštavała pradpryjemstvu kala 300 tys. eŭra.
Suzasnavalnikami «Pivavarnaj kampanii «Siabar» źjaŭlajucca kampanija Detroit Belarus Brewing Company LLC (DBB Company) i AAT «Dziednava».
«Zialony» festyval
Sioletni festyval mieŭ akreślenuju ekalahičnuju skiravanaść. Ekalahičnyja arhanizacyi «Ekadom» i GAIA zładzili na feście akcyju ŭ padtrymku mižnarodnaha ruchu za «Zialonaje ŭžyvańnie». U časie kancertu ŭsie achvočyja mieli mahčymaść abmianiać plastykavyja pakiety na pałatnianyja torbački z symbolikaj festyvalu.
Adnačasova praciahvałasia akcyja «Ja lublu Babrujsk!», raspačataja 21 traŭnia. Achvočyja mianiali dva korki ad piva «Bobrov» na stykiery‑sardečki i fłajery. Na stykierach prapanoŭvałasia napisać svajo imia z tym, kab paśla nalapić ich na vializny stend la pomnika Babru. Za adzin fłajer davali hielevy balonik zialonaha koleru.
Uvohule, zialony koler daminavaŭ na festyvali: paŭsiul była symbolika babrujskaj pivavarni — zrazumieła, na scenie, na chustkach, što razdavali hanarovym haściam festu i žurnalistam, balonikach. Potym pa kamandzie tyja baloniki hledačy adpuścili ŭ nieba. Tut, vidavočna, praha vidovišča pieramahła ekalahičnyja razvahi arhanizataŭ mierapryjemstva.
«Sini» festyval
Pieršaje, što kinułasia ŭ vočy pry nabližeńni da kancertnaj placoŭki — kolkaść supracoŭnikaŭ milicyi. Stadyjon, na jakim raźmiaścilisia hledačy, byŭ ščylna ačepleny milicyjantami. Na uvachodach praviarali torby, kab nia nieśli śpirtnoje. Chto prahnuŭ razahrecca pierad kancertam, śpiašalisia paŭz placoŭku da addalenych praduktovych kramaŭ — pobač alkahol nie pradavali.
Zvažajučy na zusim nia červieńskaje nadvorje milicyjanty byli apranutyja ŭ płaščy. La sceny dziažuryli milicynty z sabakami. Adzin čatyrochłapy supracoŭnik, što nios vachtu pobač z kalonkami, uvieś čas namahaŭsia źbierahčy vušy pad płaščom u haspadara.
Za Pałacam mastactvaŭ staŭ znajomy kožnamu ŭdzielniku akcyjaŭ pratestu zialony aŭtazak. Ščylnaja apieka kancertaŭ navat nie «zabaronienych» vykanaŭcaŭ robicca biełaruskaj tradycyjaj — miascovyja žurnalisty kazali, što na feście dziažuryła ŭsio babrujskaje kiraŭnictva: ad staršyni harvykankamu da kiraŭnika babrujskaha KDB.
Šklanyja biblijateki i ladovyja pałacy
Biełaruskaja mova na festyvali hučała zredźčas. Viadoŭca festu Siarhiej Kuzin pramaŭlaŭ pa‑rasiejsku. Zatoje, pa‑biełarusku pamiž pieśniami havaryli smalenčuki z Deimos, pieramožcy letašniaha «Rok‑koła» i prychilniki navapołackaha «Miascovaha času». «Bieźbiletniki» praśpiavali niekalki radkoŭ na rodnaj movie. Ciaham hadzinavaha vystupu J:Mors tolki adnojčy zaśpiavali pa‑nasku. Dźviuchmoŭnyja pieśni z repertuaru hurta prahučali pa‑rasiejsku.
Salist «Lapisa Trubiackoha», jaki zaviaršaŭ prahramu, pavitaŭsia z hledačami pa‑biełarusku. Michałok pamiž pieśniami čytaŭ vieršy paeta, «što lečycca ŭ ŁTP», pryśviačaŭ čarhovuju pieśniu «asudžanym žančynam z homielskaj papraŭčaj kalonii №4», dy pryhadaŭ nieviadomaha siaredniaviečnaha mudraca, jaki «jašče tady vykazvaŭ aktualnuju ŭ naš čas ideju zamianić usialakija ehipieckija piramidy dy sady Siemiramidy na šklanyja biblijateki i ladovyja pałacy».
«Lapisy» praśpiavali biełaruskamoŭnyja «Kurački» i «Ramonki», dy pa‑biełarusku raźvitalisia.
Skončyŭsia festyval fajerverkam, niahoršym za staličny, jak zaŭvažyli mienskija hości.
