Infarmacyja pra zamach na Šareckaha
Pradstaŭnik litoŭskaha złačynnaha śvietu raspavioŭ žurnalistam, što jamu prapanavali zabić v.a.kiraŭnika biełaruskaj dziaržavy
Sensacyjny matarjał «Žyćcio Siamiona Šareckaha ŭ niebiaśpiecy» źjaviŭsia ŭ apošnim numary litoŭskaha ilustravanaha štotydnioviku «Viajdas». Na žurnalistaŭ «Viajdasa» vyjšaŭ prafesijny snajper pa mianušcy «Manach», źviazany ź litoŭskim złačynnym śvietam, i raspavioŭ takuju historyju:
«24 žniŭnia sioleta sa mnoju zachacieli sustrecca niejkija nieviadomyja mnie ludzi. Jany paprasili, kab ja za 100 tysiač dalaraŭ zastreliŭ Siamiona Šareckaha. 50 tysiač dalaraŭ jany paabiacali zapłacić adrazu, a reštu — jak vykanaju zadańnie. Jany mieli z saboju plany pamiaškańnia, u jakim žyvie j pracuje Šarecki. Mieli taksama i padrabiaznyja źviestki pra toje, kali jon vychodzić z domu, kali prychodzić, u kaho byvaje. Na łamanaj litoŭskaj movie z rasiejskim akcentam pačali pierakonvać, što bolšych hrošaj ja ŭ Litvie nie atrymaju, a kali ja nie pahadžusia, znojducca inšyja, jakija heta zrobiać. Kali ja kateharyčna admoviŭsia, jany adjechali».
Čamu «Manach» raspavioŭ heta? Pavodle jahonych słovaŭ, kab zabiaśpiečyć sabie alibi. «Kali Šareckaha zabjuć, ja budu spakojny. Ja ciapier upeŭnieny, što kali b zdaryłasia hetkaje niaščaście, palicyja nie prylacić da mianie jak da pieršaha padazravanaha. Pra ŭsio ja moh by raskazać i samim specsłužbam, ale ja viedaju, jak usio adbyvajecca ŭ Litvie — adrazu pasadziać u Łukiški, a tady davodź, što nievinavaty. Dyj pačali b korpacca ŭ majoj bijahrafii i minuŭščynie, a ja b hetaha nie chacieŭ».
Tydniovik «Viajdas» painfarmavaŭ Departament achovy kiraŭničych asobaŭ, što ŭ Litvie jość ludzi, zacikaŭlenyja ŭ zabojstvie Siamiona Šareckaha. Adrazu paśla paviedamleńnia achova lidera biełaruskaj apazycyi była ŭzmocnienaja — vakoł Šareckaha pabolšała achoŭnikaŭ. Pa našych źviestkach, aproč dvuch ciełaachoŭnikaŭ, za biaśpiekaj Šareckaha ciapier sočyć taksama koła dalokaha nazirańnia. Sam Šarecki (jaki, darečy, ni ad kaho nie chavajecca) ćvierdzić, što za apošnija dva miesiacy ŭ Litvie jamu nichto nie pahražaŭ i što tut jon adčuvaje siabie svabodna i biaśpiečna.
Dyrektar Departamentu achovy kiraŭničych asobaŭ Rajmundas Kajrys patłumačyŭ, što dahetul jany nia majuć infarmacyi pra ludziej, jakija zacikaŭlenyja ŭ zabojstvie Šareckaha. Dyrektar Departamentu dziaržaŭnaj biaśpieki Miačys Łaŭrynkus dadaŭ, što specsłužby pilna vyvučajuć atrymanuju imi infarmacyju pra mahčymyja zamachi na palityčnych dziejačoŭ, adnak najčaściej takaja infarmacyja nia maje pad saboj realnych padstavaŭ.
Paśla taho jak z palityčnaj mapy Biełarusi prybrali Karpienku, Zacharanku j Hančara, zdajecca, možna čakać usiaho. Kali toje, što raspavioŭ «Viajdas», praŭda, dyk chto staić za hetym? Ci to słavutaja «adna ź biełaruskich specsłužbaŭ», ci to niejkaja tajamničaja struktura, jakuju nichto nia viedaje, ale jakaja nanosić žorstkija i biaz pudła, u styli rasiejskich kryminalnikaŭ, udary pa samych symbaličnych liderach biełaruskaha hramadztva.
Kali ž artykuł, nadrukavany 23 vieraśnia ŭ surjoznym litoŭskim vydańni, fikcyja, dyk heta krasamoŭnaja fikcyja. Jana śviedčyć, u jaki chaos pieratvaryłasia biełaruskaja realnaść za apošnija piać hadoŭ.
Barys Tumar
