Viestki ź Vilni
A my ŭsio Vilnius, Vilnius...
Litoŭcy vyrašyli ŭ aficyjnaj movie pamianiać nazvy haradoŭ Kalininhradzkaj vobłaści na tradycyjnyja litoŭskija. Savieck budzie ciapier nazyvacca Tilžie, Nioman — Rahajnie, a sam Kalininhrad — Karalaŭčiaj. Hetak, pavodle pastanovy dziaržaŭnaja kamisii litoŭskaj movy, buduć ciapier abjaŭlać na vakzałach, pisać na darožnych pakazalnikach, mapach i h.d. A jašče litoŭskija deputaty chočuć brać čynny ŭdzieł u mižnarodnym abmierkavańni losu samoj Kalininhradčyny, jakuju jany ličać svajoj ziamloj. Maŭlaŭ, paśla Pacdamskaj kanferencyi minuła 50 hadoŭ, na jakija Kalininhrad addali Rasiei, i ciapier para vyrašać pa spraviadlivaści. Asnoŭnyja pretendenty na kolišni Kionihsberh — niemcy i palaki. Treba zhadać, što i ŭ staroj biełaruskaj tradycyi Kalininhrad nazyvaŭsia pryhožym słovam Karaleviec. Ale što kazać, kali ŭ nas niama ni takoj dziaržaŭnaj moŭnaj kamisii, jak u litoŭcaŭ, dyj ułasnuju staruju stalicu Vilniu biełarusy nazyvajuć Vilniusam.
Fašysty pačynajuć z referendumaŭ
Litoŭskaje ministerstva justycyi vośmy raz admoviła ŭ rehistracyi Sajuzu Nacyjanał-Sacyjalistyčnaha Adzinstva. Dla presy ŭ krainie, dzie zvyčajna mała čaho zdarajecca, heta stałasia nahodaju zrabić interviju ź lideram litoŭskich fašystaŭ, jaki zaviecca Mindaŭhas Murza. Na pytańnie, što musiŭ by najpierš zrabić prezydent Litvy, Murza adkazaŭ: pravieści referendum, jaki b daŭ jamu bolšyja paŭnamoctvy. Vyhladaje, što litoŭski fiurer całkam uchvalna stavicca da Łukašenki, jaki, staŭšy prezydentam, tak i zrabiŭ — pačaŭ z referendumu i zabraŭ sabie ŭsiu ŭładu ŭ krainie.
I navat niekatoryja sialanie...
29 vieraśnia spoŭniłasia 470 hadoŭ z dnia, kali ŭstupiŭ u dziejańnie Pieršy Litoŭski Statut. Z hetaj nahody ŭ druku źjaviłasia interviju prafesara Stanisłovasa Łazutki, hałoŭnaha redaktara akademičnaha vydańnia Statutu. Na pytańnie pra movu, na jakoj byŭ napisany Pieršy Statut, sp.Łazutka skazaŭ: «Miarkuju, što nazva «starabiełaruskaja mova» — najbolš adpaviednaja z hledzišča histaryčnaha i etnahrafičnaha. U XVI st. u piśmienstvie Vialikaha Kniastva Litoŭskaha ŭžyvalisia taksama inšyja movy — łacinskaja i polskaja — adnak aficyjnaj dziaržaŭnaj movaj zastavałasia starabiełaruskaja. Heta była mova Panoŭ Rady, sojmaŭ, sudoŭ i ŭvohule hramadzkaha žyćcia. Bajarstva Vialikaha Kniastva, žychary haradoŭ a navat niekatoryja sialanie viedali hetuju movu i pasłuhavalisia joju». Jak ža treba było ŭsiamu źmianicca, kali siońnia biełaruskuju movu viedajuć najpierš «niekatoryja sialanie»!
