Naviny ź Biełarusi
Biełaruski Łukašenka sudzić, a litoŭski — abaraniaje?
Z ruki infarmacyjnaha ahienctva BiełaPAN biełaruskija hazety napisali pra niejkaha advakata Alhirdasa Paŭłaŭskasa, jaki pahadziŭsia baranić Michaiła Čyhira ŭ jahonym sudzie.
Byccam hety Paŭłaŭskas — były hieneralny prakuror Litvy i kankuravaŭ z Adamkusam na prezydenckich vybarach (ale prajhraŭ). Kali tak, dyk jon nia Alhirdas, a Arturas Paŭłaŭskas, i na apošnich prezydenckich vybarach jaho nazyvali «litoŭskim Łukašenkam» — za ŭzrost i padobnuju biezrazvažnaść u vykazvańniach, a najpierš za toje, što balatavaŭsia Paŭłaŭskas za hrošy rasiejskich aliharchaŭ i maje krychu prasavieckija pohlady. Kali ŭsio heta ŭziać pad uvahu, dyk zhadvajecca našumieły paźniakoŭski artykuł «Prajekt Čyhir», dzie eks-lider BNF źvinavaciŭ Čyhira ŭ finansavaj padtrymcy z Maskvy i ŭ kavarnych planach zmaskalić biełaruskuju apazycyju. Słovam, kali Paŭłaŭskas stanie baranić Čyhira, dyk ubačym, što abodva siadziać u maskoŭskaj kišeni, i mieŭ racyju Paźniak.
Adno zahadka — čamu naša presa, jak zhavaryŭšysia, źmianiła Paŭłaŭskasu imia? Ci heta niechta pieršy pamyliŭsia, ci chočuć zatušavać tyja suviazi Čyhira, jakija b raskryŭ udzieł «litoŭskaha Łukašenki»?
Lićvin
Padarunki ad Kipielaŭ mienskim dzieciam
Jašče ŭletku suženstva Zora j Vitaŭt Kipieli — biełarusy z amerykanskaha štatu Ńju-Džersy, viadomyja i ŭ Ńju-Jorku svajoj aktyŭnaj navukovaj i hramadzkaj dziejnaściu, — vyrašyli zrabić radaść biełaruskim dzieciam, jakija vučacca pa-biełarusku.
Zaduma znajšła realizacyju ŭ časie kaladnych śviatkavańniaŭ: 22, 23 i 28 śniežnia škalary kolkich biełaruskamoŭnych klasaŭ adnoj mienskaj (SŠ №37) i adnoj padmienskaj (Sieńninskaj SŠ) škołaŭ atrymali dasłanyja sp-vam Kipielami padarunki. Akcyja adbyłasia dziakujučy rupnaści TBM i novastvoranaha Baćkoŭskaha kamitetu.
Tavarystva Biełaruskaje Movy reprezentavała staršynia mienskaje struktury TBM Leanarda Muchina (letaś «NN» pisała pra toje, jak spn.Muchinu ščymiła za biełaruščynu čynavienstva systemy adukacyi), ad Baćkoŭskaha kamitetu brali ŭdzieł sp-va Iłona Ŭrbanovič-Saŭka j Źmicier Saŭka.
Arhanizatary akcyi vykazali spadzieŭ, što padobnyja čyny buduć mieć praciah u nastupnyja «čyrvonyja daty» biełaruskaha kalendara, — to čakajma Dnia Voli!
Dzied Ziuzia
«Palanez» ad Papy Rymskaha
Rajonnaja balnica ŭ Astraŭcy pierad Navahodnimi śviatami atrymała niezvyčajny i pryjemny padarunak. Niezvyčajny, bo jaho padaryŭ pa prašeńni astravieckaha ksiandza-prałata Alojzaha sam Papa Rymski Jan Pavał II. Pryjemny, bo heta aŭtamabil «chutkaj dapamohi» «Palanez». Ciapier astravieckija medyki da chvorych ludziej buduć jeździć nia tolki na sastarełych i «dabitych» rasiejskich «UAZach», ale i na padoranym «Palanezie». Bolš taho, kali ŭźniknie nieabchodnaść, u mašynie možna pravodzić i aperacyi.
Marjan Vianhroŭski
Płač i skač
Za navahodniuju noč u Biełarusi ŭ siami niaščasnych zdareńniach zahinuli 4 i paranienyja 6 čałaviek. 6 čałaviek sami sabie zrabili śmierć. 576 čałaviek złavili na vulicach pjanymi, a za rulom prykmiecili 91 pjanoha.
BiełaPAN
źBieraściejščyny
Studenckaje tavarystva ŭ Bieraści
Va ŭniversytecie razhortvaje dziejnaść navukovaje tavarystva maładych historykaŭ «Pospał». Chłopcy ładziać ekspedycyi ŭ poli i ŭ archivy i čaho tolki ni robiać. Chočuć, kab da ich dałučałasia inšaja moładź, bo jakraz z takich supołak i paŭstajuć farposty biełmoŭnaje adukacyi. Spadziajucca, što na ŭzor histfakaŭskaje supołki stvoracca niezaležnyja hurtki na inšych fakultetach.
Siaržuk Prudnikaŭ
ź Miensku
TBM ciešycca vynikami pierapisu
Z TBMu nam dasłali vielmi entuzijastyčny list, natchniony vynikami pierapisu. Toje, što kala 37% ludziej u chacie havorać pa-biełarusku, pakazvaje, što «kurs na rusifikacyju, što viadziecca na roznych uzroŭniach, cierpić parazu». TBM patrabuje pryvieści moŭnuju palityku dziaržavy ŭ adpaviednaść z vynikami pierapisu — zabiaśpiačyć biełaruskaj movie realny status dziaržaŭnaje. «Chopić pieratvarać biełaruski narod u mankurtaŭ», — pałymiana zaklikaje TBM.
B.T.
Bandažeŭskaha badaj vypuścili
Pad padpisku ab niavyjeździe vyzvalili z-pad varty byłoha rektara Homielskaha medinstytutu Jurja Bandažeŭskaha, byccam by z-za paharšeńnia stanu jahonaha zdaroŭja. Adnak nasamreč prafesar Bandažeŭski vyrvaŭsia z Vaładarki dziakujučy najpierš chvali pratestaŭ z boku mižnarodnaje supolnaści.
Bandažeŭskaha zaaryštavali sioleta 13 lipienia, źvinavaciŭšy jaho ŭ atrymańni chabaru za pastupleńnie. Źbirajučy pakazańni śviedkaŭ, prakuratura navat paabiacała vyzvalić ad adkaznaści tych studentaŭ, jakija dobraachvotna j ananimna pryznajucca ŭ chabary byłomu rektaru. Achvotnych nie znajšłosia. Da taho ž ad svaich raniejšych pakazańniaŭ admoviŭsia hałoŭny śviedka abvinavačvańnia -- prarektar Uładzimier Raŭkoŭ. Dyk śledztva zastałosia biaź śviedkaŭ ani dokazaŭ.
Jury Bandažeŭski znachodzicca ciapier u svajakoŭ svajoj žonki ŭ Miensku. Pavodle svajoj prysiahi ź Miensku vyjaždžać jon nia moža.
Pad kiraŭnictvam Bandažeŭskaha Homielski medyčny instytut pieraŭtvaryŭsia ŭ suśvietny centar vyvučeńnia ŭpłyvu na arhanizm radyjaaktyŭnych elementaŭ. Sam Bandažeŭski staŭ suśvietna viadomym navukoŭcam u radyjalahičnaj medycynie. Vyniki jahonych daśledavańniaŭ vidavočna nie supadali z aficyjnaj pazycyjaj čynoŭnikaŭ ź Ministerstva achovy zdaroŭja i palityčnaha kiraŭnictva Biełarusi.
Jak viadoma, ciapier ułady raźvivajuć temu viartańnia ŭ sielskahaspadarčy abarot zabrudžanych ziemlaŭ, spraščeńnia kancepcyi pražyvańnia ŭ “zonie”. U toj ža čas kaleha i adnadumiec Bandažeŭskaha -- prafesar-fizyk Vasil Nieściarenka zajaŭlaje, što treba adsialać usich ludziej sa 100-kilametrovaj zony vakoł reaktaru.
Paśla aryštu Bandažeŭskaha svoj hołas u abaronu biełaruskaha prafesara ŭźniali ŭdava byłoha prezydenta Francyi Miterana, Kamitet zaniepakojenych navukoŭcaŭ ZŠA, kalehi ź Vialikaj Brytanii, Niamieččyny. Pra aryšt Bandažeŭskaha napisała anhielskaja hazeta Guardian. Da hieneralnaha prakurora Biełarusi źviarnulisia rasiejskija pravaabarončyja dy ekalahičnyja arhanizacyi na čale z akademikam Jabłakavym.
Pabačym ciapier, ci budzie sprava Bandažeŭskaha daviedzienaja da sudu. Badaj nie była!
Pavodle Radyjo Svaboda
z Padniaproŭja
Nie kažy, što niaduž
U Mahilovie byli pierastali lhotnikam leki za paŭcany pradavać, bo horad za hetyja lhotnyja leki zavinavaciŭsia abjadnańniu «Farmaceja» 50 miljonaŭ denaminavanych rubloŭ. A jość praviła: kali zavinavacicca bolej za 9 młn., aptekary majuć prava pierastać pradavać za tak. Nu, adnak ža, vieciarany ŭźniali harmidar, Dražyn rasparadziŭsia, i voś užo znoŭ pradajuć. Jasna, nia ŭsio — ale valarjanki i validołu do.
B.T.
