Sajuz jak barjer u stasunkach dziaržavaŭ
Padpisanaja 8 śniežnia i ratyfikavanaja ŭ Miensku i Maskvie damova pra stvareńnie sajuzu Biełarusi i Rasiei mocna nahadvaje sakretnyja pratakoły da paktu Mołatava-Rybentropa. Pierad padpisańniem nichto tołkam nia viedaŭ, što tam vypraŭlena ŭ kančatkovym tekście. Zrešty, nia nadta i cikavilisia. Epachalnaja padzieja — stvareńnie novaj eŭrazijskaj sajuznaj dziaržavy — sustrakaje dziŭnuju abyjakavaść jak z boku narodaŭ, tak i z boku palitykaŭ, jakija robiać vyhlad, što adbyłosia niešta samo saboj zrazumiełaje, ale nieistotnaje.
Bolšaść rasiejskich hramadzianaŭ, — paviedamiŭ Interfaks, — uvohule nie znajomyja sa źmiestam damovy. Takich 62%. Kožny treci (33%) viedaje, pra što idzie havorka ŭ ahulnych rysach. Pry hetym 69% uchvalajuć damovu, što nahadvaje nie zusim ćviarozuju zastolnuju biasiedu — nia viedaju, pra što, ale — «za».
Indykataram u takoj sytuacyi moža słužyć staŭleńnie da damovy va Ŭkrainie, jakuju intehratary razhladajuć jak čarhovaha kandydata ŭ zhadany sajuz. Pavodle infarmacyi Interfaksu, prezydent Ukrainy Leanid Kučma zajaviŭ, što Ŭkraina nikoli nie dałučycca da sajuzu Rasiei i Biełarusi, a samuju hetuju damovu čakaje składany los, bo «Rasieja ekanamična nia moža być ani donaram, ani kredytoram... Kali ja čuju zakliki da abjadnańnia, ja kažu: davajcie lepš budziem bolš adkrytymi adzin dla adnaho, a nie budavać barjery i tym samym stvarać składanyja sytuacyi», — zajaviŭ Kučma.
Hetaksama i Viarchoŭny Saviet Ukrainy nie padtrymaŭ prapanovu daručyć profilnym kamitetam padrychtavać prapanovy ab mahčymaści dałučeńnia krainy da sajuzu Biełarusi i Rasiei, choć z takoj prapanovaj vystupaŭ člen frakcyi kampartyi Uł.Maisiejenka.
Novy rakurs adkryvajecca ŭ pohladzie na sajuz z Ukrainy: abjadnańnie stanie niepaźbiežnym barjeram u dačynieńniach raŭnapraŭnych niezaležnych dziaržavaŭ — z-za roznych abjomaŭ, roznych ekanomik, z-za nadździaržaŭnaha zakanadaŭstva i čynavienstva i jašče z-za mnostva pryčyn. I naadvarot — sajuz moža adbycca tolki pry pahłynańni adnoj dziaržavy druhoju. Zdajecca, toje, što adbyvajecca mienavita pahłynańnie Biełarusi Rasiejaj, bačna kožnamu. Heta i ŭchvalajuć rasiejcy, nia viedajučy niuansaŭ. A my? A ŭ nas nie pytalisia.
A.K.
