Čałaviek dabiŭsia praŭdy
Pradprymalnik ź Pinsku, aktyvist BNF Mikałaj Bury pry kancy listapada byŭ aryštavany na kirmašy.
U jaho ckanfiskavali ŭsie hrošy dy jašče dali dźvie nočy administratyŭnaha aryštu. Paśla troch miesiacaŭ zmahańnia za praŭdu na hetym tydni jon narešcie dabiŭsia, što haradzki sud pryznaŭ jaho nievinavatym.
60-hadovaha prydprymalnika Mikałaja Buraha aryštavali na centralnym rynku za toje, što jon nibyta niezakonna nabyŭ 1 dalar ZŠA i pakłaŭ jaho ŭ kišeniu kurtki. Kali paśla abšukvańnia dalara ŭ vonkavaj kišeni nie znajšli, supracoŭniki padatkavaj milicyi Pietraševič i Ščuka abvinavacili spadara Buraha ŭ tym, što valutu jon vykinuŭ pa darozie ŭ pastarunak, a potym uvohule źmianili abvinavačvańni i zajavili, što zatrymany kupiŭ nie adzin, a ŭžo 20 dalaraŭ. Ale i 20-dalaravaj kupiury ŭ pradprymalnika nie znajšli. Sa słovaŭ milicyjantaŭ, dyk jon jaje taksama vykinuŭ. U vyniku, niahledziačy na šmatlikija parušeńni supracoŭnikami milicyi isnujučaj pracedury zatrymańnia, niadbajnaje viadzieńnie pratakołu i inšaje, sudździa Pinskaha sudu Leščanka prysudziŭ kanfiskavać u sp.Buraha ŭsie hrošy, što byli pry im, a heta ŭ pieraliku bolš za 100 dalaraŭ, dy pasadzić jaho na dvoje sutak ŭ SIZA. Ale abłasny sud, kudy paciarpieły źviarnuŭsia sa skarhaj, pryznaŭ, što sprava viałasia sa šmatlikimi parušeńniami. «Pratakoł sudovaha pasiedžańnia napisany vielmi nieachajna, pratakoł ahladu Buraha — niečytelny» — heta tolki niekatoryja z zaŭvah abłasnoha sudu. Rašeńnie Pinskaha sudu było pryznanaje niesapraŭdnym, i ź Bieraścia sprava była adpraŭlenaja nazad u Pinsk na pierahlad da inšaha sudździ. U vyniku ŭčora sudździa Tatarevič pastanaviŭ, što hrošy ŭ paciarpiełaha byli kanfiskavanyja niezakonna — ich viernuć. Na žal, pra dvoje sutak, ni za što praviedzienych u kamery, nichto nie ŭzhadaŭ. Pra abiasceńvańnie hrošaj — taksama.
Darečy, sp.Bury dobra znajomy ź biełaruskaj Femidaj. Letaś jaho dvojčy zatrymlivali na kirmašy za toje, što pierad padpolnymi prezydenckimi vybarami jon źbiraŭ podpisy za Paźniaka.
Pavodle aficyjnaj infarmacyi z prakuratury, letaś značna pavialičyłasia kolkaść supraćpraŭnych dziejańniaŭ milicyjantaŭ. Kolkaść naŭmysna sukrytych supracoŭnikami milicyi złačynstvaŭ padvysiłasia amal u dva razy, da dyscyplinarnaj adkaznaści pryciahnutyja 40 milicyjantaŭ, kala 120 spravaŭ vialisia supracoŭnikami HUUS z parušeńniami praviłaŭ.
Alaksiej Dzikavicki
