Najbujniejšy muzej najnoŭšaha mastactva
«Art-sezon» — tradycyjnaja kalektyŭnaja mastackaja vystava, na jakoj Połaččyna padrachoŭvaje kulturnyja zdabytki minułaha hodu. Admysłova da hetaj padziei tradycyjna vydajecca adnajmiennaja hazeta. Sioleta ŭ hazecie havaryli pra zdabytki apošniaha dziesiacihodździa i pra evalucyju mastactva. Siarhiej Šydłoŭski ŭ svaim nievialikim ese «Połackaja marka» napisaŭ: «Połacak — horad žyvych, i ŭsie jahonyja nekropali, krušni, labirynty-kłady majuć duchovy sens, tolki materyjalizavaŭšysia ŭ micie — micie sučasnaha kvitniejučaha horadu — pieršaj i najpieršaj stalicy biełaruskaha mastactva». Šydłoŭski zaklikaje ŭsich pałačanaŭ metanakiravana papracavać na hety žyćciadajny mit.
U «Art-sezonie-99» uziali ŭdzieł jak veterany i debiutanty. Ź Viciebsku sa svaimi tvorami pryjechali byłyja ŭdzielniki połackaha mastackaha abjadnańnia «4-63» — Vasil i Halina Vasiljevy. Pobač svaje tvory prademanstravała novaja połackaja mastackaja supołka «Bieły kruh». Uraziŭ navapołacki mastak Ihar Kuržałaŭ svaim «madziljanieŭskim» trypcicham «Kamunałka», pryśviečanym viečnaj temie — kachańniu.
Admietnaściu sioletniaha «Art-sezonu» staŭsia šyroki ŭdzieł fotamastakoŭ. Pobač ź viadomymi na Połaččynie majstrami E.Cieciareŭskim, A.Jelkinym, A.Dubatoŭkam svaje tvory pakazali debiutanty: Viktar Ušak (novy zahadčyk adździełu kultury Połackaha harvykankamu) i Kirył Smalakoŭ (navučeniec 11 klasy navapołackaha liceju).
U dzień adkryćcia «Art-sezonu» adbyłasia prezentacyja jašče adnaho prajektu, hrandyjoznaha i doŭhaterminovaha. U zali byŭ vystaŭleny makiet druhoha pavierchu Połackaj karcinnaj halerei, jakaja zojmie adrestaŭravanuju častku byłoha Jezuickaha kalehijumu. Heta budzie najbujniejšy muzej biełaruskaha vyjaŭlenčaha mastactva XX stahodździa.
Aleś Kozik
