9 hadoŭ jazdy
27 traŭnia ŭ 91-m hodzie pačała vychodzić adnoŭlenaja «Naša Niva». Heta značyć, što ŭ praciahłaści isnavańnia hazeta pieražyła svaju papiarednicu, jakaja začyniłasia na dziaviatym hodzie. Praŭda, i siońniašniaja «Naša Niva», jak skazaŭ nam śledčy prakuratury Novikaŭ, «visić na vałasku». Tolki pryčynaj zakryćcia moža stać nie suśvietnaja vajna, jak było ŭ vypadku z papiarednicaj, a toje, što biełaruskaja hazeta nadta nie padabajecca ciapierašnim uładam. Druhoje papiaredžańnie «Našaj Nivie» vyniesienaje za artykuł Siamiona Šareckaha «Zaraza fašyzmu. A.Łukašenka kapiruje A.Hitlera». Paśla hetaha ŭłady mohuć začynić vydańnie ŭ luby momant. Što my mahli adkazać śledčamu prakuratury? Tolki toje, što zašmat antyfašyzmu, na našu dumku, nie byvaje.
Hałoŭnaja vysnova ad sustrečy z Novikavym. Respublikanskaja prakuratura kirujecca idealahičnymi matyvacyjami, a zusim nie zakonam. Pryhoža pamierci my vam nie damo, — skazaŭ Novikaŭ. «Pryhoža pamierci» ŭ jahonym ujaŭleńni — značyć, być začynienymi z šumam, kab «sijanisty» (vierahodna, majecca na ŭvazie Zachad uvohule) kazali, što ŭ RB niama svabody słova.
Redakcyja budzie asprečvać čarhovaje papiaredžańnie biez spadzievu na pośpiech. Urešcie, my majem spravu z pravavym samavolstvam uładaŭ. Zamaniecca im zabaranić «NN» — zabaroniać, nie zamaniecca — budzie hazeta i dalej «visieć na vałasku». Adzinaje, što my možam i što vynikaje z našaje adkaznaści pierad čytačami — harantavać vychad čarhovaha numaru niezaležna ad taho, ź jakoj nahi ŭstanie zaŭtra tavaryš prakuror albo spadar Padhajny. Ni «pryhoža», ni «niepryhoža» pamirać my nie źbirajemsia, choć by ŭžo tamu, što kantekst našaha isnavańnia šyrejšy za ciapierašni palityčny režym RB.
Kali dzieviać hadoŭ tamu drukavaŭsia pieršy numar adnoŭlenaje «Našaj Nivy», Baranavičy śviatkavali svoj stohadovy jubilej. My vyjšli z rajonnaj drukarni i zadziorli hałovy ŭharu. Prosta nad nami na haradzki plac apuskalisia parašutysty. Zastavałasia roŭna dva miesiacy da pryniaćcia deklaracyi suverenitetu Biełarusi, niedzie ŭ Vilni adznačałasia hadavina biełaruskaje teleprahramy, jakaja tady rabiłasia ŭ padpolli, jak i ŭsia tahačasnaja televizija, prahnanaja sa svajho budynku tankami hienerała Ŭschopčyka, jaki niadaŭna staŭ namieśnikam ministra abarony Biełarusi. Śledam za parašutystami pa centralnaj baranavickaj płoščy pajšli śviatočnyja kalony demanstrantaŭ, a my zahruzilisia ŭ mikraaŭtobus, bo śpiašalisia zavieźci debiutny numar «NN» u mienski Dom litaratara, dzie prachodziŭ pieršy źjezd Mižnarodnaj asacyjacyi biełarusistaŭ. Redakcyja hazety miaściłasia tady na Trajeckim pradmieści ŭ muzei Bahdanoviča. Pamiataju, my składali tam pryviezienyja z Baranavičaŭ arkušy pieršaha numaru i na hadzinu musili adarvacca ad hetaje spravy, bo razam z muzejnikami pajšli ŭskładać hirlandu z kvietak da pomnika Maksimu Bahdanoviču — adznačałasia hadavina jahonaje śmierci.
Za praminuły čas źmianiłasia kraina i ŭłada ŭ joj. «NN» stała bolej pisać pra palityku. Da ŭłady pryjšła «čverćjintelihiencyja». Mienavita tak zaŭsiody pačynajecca fašyzacyja hramadztva. Vierahodna, my budziem znoŭ i znoŭ pisać pra zarazu fašyzmu, jaki spakvala i amal niezaŭvažna zajmaje čynavienskija kabinety i adnojčy moža raptam stać usieachopnaj realnaściu. Voś tady štości rabić budzie ŭžo pozna.
Redakcyja
