tydzień našaha žyćcia
Tancy na dachu
Samaj niečakanaj padziejaj palityčnaha tydnia stała dobraachvotnaja adstaŭka šeraha kardynała łukašenkaŭskaj zakonatvorčaści, kiraŭnika jahonaha HPU, dziaržaŭna-pravavoje ŭpravy, Alaksandra Płaskavickaha. U interviju žurnalistam Płaskavicki zajaviŭ, što «dziela šerahu pryčynaŭ niemahčyma było vynikova pracavać». A taksama: «U tym vyhladzie, u jakim jon ciapier isnuje, dziaržaparat ad hary da nizu ŭpiorsia ŭ limit svaich mahčymaściaŭ». Sychod Płaskavickaha byŭ pa-ŭradnicku karcinny: jon napisaŭ zajavu na zvalnieńnie, jašče miesiac pierakantavaŭsia ŭ Čyrvonym domie, tady pajšoŭ zusim i daŭ interviju «Biełorusskoj Diełovoj Hazietie» — maksymalna karektnaje i prytym nadzvyčaj chałodnaje i dziełavoje, jak dla biełaruskich tradycyjaŭ patetyki i klaćviennaści. Syšoŭ Płaskavicki, jak robicca jasna ź jahonych vykazvańniaŭ, bo ŭ administracyi niemahčyma było plonna pracavać i bo mała zarablałasia. Jak Płaskavicki syšoŭ, u jaho zabrali j dziaržaŭnuju kvateru, da jakoj jon byŭ prypisany na čas pracy. Ciapier Płaskavicki «nia maje stałaha miesca žycharstva». Što nazyvajecca, «słužy panu viernie, jon tabie piernie». Ale biaz pracy jon naŭrad ci zastaniecca. Bo «hatovy šukać sabie miesca čaladnika ŭ ludziej, što žadajuć mieć niejkija kankretnyja vyniki».
Hety sychod supaŭ ź pieratrusam u administracyi Łukašenki: zamiest Rusakieviča za idealohiju znoŭ budzie adkazvać Zamiatalin. Iluzijaŭ tutaka ni ŭ koha niama. Zatoje pres-sakratarom Łukašenka ŭziaŭ sabie maładoha j charošaha Barysieviča z MZS. Kiraŭnik łukašenkaŭskaj administracyi Miaśnikovič sustreŭsia tymčasam z presaj, kab paznačyć novyja pryjarytety raźvićcia krainy. BIEŁTA skončyła svajo paviedamleńnie pra sustreču tak: «Adkazvajučy na pytańnie ab stvareńni sajuzu Biełarusi j Rasiei, jon zajaviŭ, što suverenitet i niezaležnaść Biełarusi nie padlahajuć abmierkavańniu. Jany buduć zachavanyja ŭ poŭnaj miery». Chto i što, praŭda, razumieje pad niezaležnaściu, niajasna. Cikava, što Łukašenka štoleta ad 95-ha hodu robić bolš ci mienš vyraznyja reveransy niezaležnictvu. To pa-biełarusku vystupić, to nadrukuje interviju sa zhadkami pra Sapiehu, to ź piśmieńnikami sustreniecca, to dazvolić zachavać Biełaruski licej, to namiaknie, to paklaniecca. Mabyć luboŭ da Radzimy maje svajo klimatyčnaje adcieńnie — nadta Miensk uletku zialony, nadta jon uzimku paskudny j šery.
Voś i liberału Jakuboviču, redaktaru «Sovietskoj Biełoruśsii» nadaŭ zvańnie Zasłužanaha dziejača kultury. I pałkoŭniku Mialušku, što biŭ u zvon z pryčyny svaich padazreńniaŭ, što pasadu ministra abarony zajmaje čałaviek, zaležny ad alkaholu, i tamu byŭ skinuty ŭ šarahoŭcy, viarnuŭ pałkoŭnickija pahony. Ministerstva abarony, jak stała viadoma na hetym tydni, padparadkavałasia rašeńniu Kanstytucyjnaha suda pra nieabchodnaść instytutu alternatyŭnaj vajskovaj słužby. A kiraŭnik vajskovaj katedry Linhvistyčnaha ŭniversytetu pałkoŭnik Kastamaraŭ sprabavaŭ pahrozaj zvalnieńnia zahnać u BPSM čatyroch kursantaŭ. Tyja zacialisia — nia chočam padpisvać dušu djabłu. Pajšli da rektarki. Rektarka zapatrabavała spraviadlivaha vyrašeńnia sprečki. Rektarka N.Baranava maje z BPSM svaje rachunki — niekali pieršyja paŭlik-marozavy jašče ŭ 1997-m sprabavali adčyniać nahami dźviery ŭ jaje kabinet. Tamu ŭ Linhvistyčnym da apošniaha času j było tolki 6 peseemaŭcaŭ.
Vincuk Viačorka nanios čarhovy vizyt u Vilniu, dzie spatkaŭsia z Šareckim. Vidać, u Vilenskaj vybarčaj akruzie budzie balatavacca, što tak časta jeździć.
Biełaruski Hielsynski Kamitet rychtujecca da źmieny lidera. Palityčnyja maneŭry Taciany Proćki pryjšlisia niedaspadoby baćkam-zasnavalnikam.
U Homieli vyjavilisia niekalki vypadkaŭ malaryi miascovaha pachodžańnia, musili pradezynsektavać padvały u pałovie horadu. Zatoje ŭžo čaćvierty hod ŭ Biełarusi mienšaje kolkaść vypadkaŭ prancaŭ. Ciapier chvorych tolki 21 tysiača.
U Lvovie taki ŭviali aficyjny maratory na vykanańnie rasiejskamoŭnych piesień. Tre było b im jašče Čajkoŭskaha padvieści pad hety punkt — jon taksama dosyć papsovy. Stohadovy jubilej Zabejdy-Sumickaha ŭ Miensku adznačyli amatarskaj viečarynaj u Domie družby z zamiežnymi krainami ŭ prysutnaści českich i kitajskich haścioŭ. Łučankam i Sasnoŭskim dzieła da ŭsialakich tam Zabejdaŭ niama. Nia tym zaniatyja. U Biełastoku festyval biełaruskaj kultury sabraŭ až čatyry tysiačy hledačoŭ. U Pchieńjanie 600 tys. čałaviek vystavili na vulicy vitać paŭdniovakarejskaha prezydenta — treba dumać, kaniec paŭnočnakarejskaj dyktatury blizki. U błasłavionym Damasku raźvitacca z prezydentam Asadam, što dałučyŭ da Syryi Liban, vyjšli miljony. 25 čałaviek zadušyłasia ŭ ciskaninie. Futbolnyja zaŭziatary, što sabralisia ŭ Belhii, adciahvajucca ŭ bojkach i debošach.
A paciešyŭ usich haradzienski amonaviec Ivan Dzianiščyk. Jon z kalehami zatrymlivaŭ falšyvamanetčykaŭ Nasyravych. Tyja kinulisia ŭciakać mašynaju. Jon paśpieŭ zaskočyć na dach, trymaŭsia tam, choć mašyna lacieła 100 km u hadzinu, raźbiŭ luk na dachu mašyny, i, jak piša Interfaks, «pranik u salon i prymusiŭ złačyncaŭ spynicca».
Barys Tumar
