Ivan Ivanavič Danajec
Aficyjnaja stolinskaja rajonka «Naviny Paleśsia» napisała, što namieśnik kiraŭnika administracyi Łukašenki Ivan Paškievič, byŭšy na Stolinščynie, skul jon rodam i dzie jaho kaliści abrali ŭ Viarchoŭny Saviet, pieradaŭ na budaŭnictva pravasłaŭnych cerkvaŭ u vioskach Vialiki Malešaŭ i Chotamiel pa 100 tysiačaŭ rubloŭ, a ŭ vioscy Haradnaja — dva čeki pa 980 tysiačaŭ rubloŭ. Ahułam na 2000 dalaraŭ, ci što. Dalej hazeta paviedamlaje, što «takaja dapamoha akazvajecca Ivanam Ivanavičam nia ŭ pieršy raz».
Adkul ža Paškievič ź jahonym dziaržaŭnym zarobkam maje takija hrošy na dabračynnaść?
Adzin ček na 980 tys. rubloŭ z banku «Załaty taler» padpisany žonkaj Ivana Paškieviča Halinaj, jakaja taksama pracuje na dziaržaŭnaj słužbie, druhi — niejkim Leanidam Śvinhieram. Vyśvietlić u Haliny Paškievič, adkul jana maje stolki hrošaj, nam nie ŭdałosia. Ivan Paškievič paviedamiŭ nam, što jon paprostu vykarystaŭ (!) rachunak žonki i sp.Śvinhiera, kab pravieści praź jaho hrošy, jakija jon znajšoŭ pa prośbie ziemlakoŭ (!).
Pavodle niekatorych źviestak Ivan Paškievič svaim koštam taksama padpisaŭ na aficyjnuju rajonku «Naviny Paleśsia» kala 1000 svaich ziemlakoŭ. Sp.Paškievič heta paćvierdziŭ i skazaŭ, što vypiša jašče. Praŭda, u redakcyi «Navinaŭ Paleśsia» i na stolinskaj pošcie hetuju infarmacyju kateharyčna abvierhli.
Varta dadać, što jašče na pačatku hodu na Stolinščynie źjavilisia kalarovyja kalandaryki z partretam Ivana Paškieviča, nadpisam «Ivan Paškievič — vaš deputat» dy pažadańniami ščaślivaha hodu. Pryčym hetyja kalandaryki, taksama nadrukavanyja nieviadoma za jakija hrošy, raspaŭsiudžvalisia nia tolki ŭ Stolinie, dzie Paškievič deputatam, ale i ŭ Davyd-Haradku — u ciapierašniaj akruzie sacyjał-demakrata Paŭła Znaŭca. A na Vialikdzień Ivan Paškievič z falklornymi kalektyvami jeździŭ pa vioskach Davyd-Haradockaj zony dy ŭ časie kancertaŭ ahitavaŭ hałasavać za siabie.
U Centralnaj vybarčaj kamisii na naša pytańnie, ci nie źjaŭlajecca ŭsio heta parušeńniem zakonu, sakratar CVK Ivan Lichač adkazaŭ, što Ivan Ivanavič zakonu nie parušaje, bo «vybary jašče nie abvieščanyja», i tamu Ivan Ivanavič ciapier «svabodny hramadzianin».
Takim čynam, svabodny hramadzianin Ivan Paškievič moža nieviadoma čyim koštam i dalej svabodna rychtavacca da jašče nie abvieščanych vybaraŭ.
Alaksiej Dzikavicki, Pinsk
