Tydzień našaha žyćcia
Leta nieviadomych specsłužbaŭ
Takoje ŭražańnie, što my ŭsie stali zakładnikami hulni niejkich nieviadomych specsłužbaŭ, što pieraśledujuć nie da kanca nam jasnyja mety. Historyi Baturyna i Zavadzkaha pužajuć: na ichnym miescy možam akazacca i ja, i ty...
Lejtenant Baturyn prasłaviŭsia svaimi pryznańniami, što ŭłada specyjalna rychtavała pravakataraŭ u cyvilnym da letašniaha Maršu Svabody, kab zdyskredytavać apazycyju. Maŭlaŭ, jon i sam byŭ siarod tych, chto mieŭ padbuchtorvać biesparadki. Mienavita hetyja špiehi padpalili poštu na vulicy Źmitraka Biaduli pa šlachu šeścia. U mierkavanaje miesca sutyknieńniaŭ maršoŭcaŭ ź siłami specyjalnaha pryznačeńnia byli zahadzia admysłova dastaŭlenyja paddony z tratuarnaj plitkaj, a inšyja šlachi dla ruchu kalony byli pierakrytyja.
Niajasna, čamu ž Baturyn pra kamiani paviedamiŭ nia da, a paśla bojki? Mahli ž zahinuć ludzi! Ci mo i jany, supracoŭniki specadździełu MUS, usiaho planu pravakacyi nia viedali?
Paśla svaich pryznańniaŭ na staronkach «Narodnaj Voli» Baturyn, a taksama jahony brat, chavalisia ŭ Miensku, kab potym sakretnymi šlachami pierabracca ŭ Varšavu i paprasić palityčnaha prytułku ŭ ZŠA. Hetaje pytańnie vyrašałasia stanoŭča. Baturyny rabili ŭražańnie ludziej, zakłapočanych mienavita pytańniem emihracyi na Zachad, što było hałoŭnym matyvam ichnych učynkaŭ. Ale voś 19 lipienia radyjostancyja «Svaboda» paviedamiła, što, pavodle niepaćvierdžanaj infarmacyi, Baturyn źnik z Varšavy i trapiŭ u Biełaruś. Sam jon u toj dzień źviazaŭsia z bratam užo ź Biełarusi, ćvierdziačy, što jaho vykrali, ale jon zdoleŭ uciačy. Vierahodna, źviazvaŭsia jon užo z amerykanskaha pasolstva.
Bo ŭ toj dzień, 19 lipienia, Baturyn źjaviŭsia ŭ pasolstvie ZŠA ŭ Biełarusi, što na vulicy Staravilenskaj u Miensku, paviedamiŭšy, što jaho skrali ŭ Varšavie nieviadomyja, ciahnikom cieraz Kijeŭ dastavili ŭ Maskvu, a tam byccam by źbiralisia zabić, ale pieraškodziŭ šum, jaki ŭžo ŭźniaŭ jahony brat u Varšavie. Tady jaho pavieźli ŭ Miensk, patrabujučy tutaka publična admovicca ad taho, što jon kazaŭ pra padziei kastryčnika, ale byccam by ŭ Miensku na vakzale jamu ŭdałosia źbiehčy. Pasolstva nieadkładna paviedamiła ab hetym u Kamisiju AAN pa pravach čałavieka i ŭ Kansultacyjna-naziralnuju hrupu ABSE ŭ Miensku. A na nastupny dzień, 20 lipienia, paśla adpaviednych kansultacyjaŭ, pasolstva painfarmavała ab miescaznachodžańni Baturyna Ministerstva zamiežnych spravaŭ Biełarusi, prapanavaŭšy dazvolić Baturynu viarnucca ŭ Polšču. Ułady pahadzilisia, ale ŭmovaj pastavili vystupleńnie Baturyna na BT i dziaržaŭnym radyjo, u jakim jon abvierh by versiju pra vykradańnie jaho biełaruskimi specsłužbami. Amerykancy rekamendavali Baturynu pryniać umovy ŭładaŭ, inakš mahła b stvarycca dvuchsensoŭnaja sytuacyja ź pierabyvańniem Baturyna ŭ budynku ambasady. Sprava razhortvałasia jak u bajeviku. 21 lipienia a 6-j ranicy na terytoryi pasolstva ZŠA ŭ Miensku Aleh Baturyn daŭ interviju BT. «Toje, što prahučała na radyjo «Svaboda», — niapraŭda. Ja nikoli nie kazaŭ, što mianie vykrali specsłužby Biełarusi,» — słovy Baturyna prahučali ŭ siužecie BT biez tłumačeńniaŭ, jakim čynam i navošta jon apynuŭsia ŭ Biełarusi. Praz 5 hadzinaŭ, dziakujučy amerykancam, Baturyn užo pierasiakaŭ biełaruska-polskuju miažu.
Pasoł Spekhard prademanstravaŭ, što dla ZŠA mierkavańni adkaznaści za žyćcio i biaśpieku čałavieka važniejšyja za ŭsie inšyja. Pasolstva ZŠA pryniało Baturyna, što šukaŭ schovu, na svajoj terytoryi, choć mahło i začynić pierad im bramu.
Rola samoha Baturyna ŭva ŭsioj hetaj historyi zastajecca niajasnaj. Jahonaja historyja niby prydumanaja ŭ procivahu historyi z Zavadzkim, jak niekali raniej historyja ŭciokaŭ Vińnikavaj stałasia procivahaj aryštu Čyhira.
Zrešty, usie hetyja hulni dajuć niejkuju čornuju nadzieju, što nia ŭsio tak kiepska ŭ našam krai. Raz za nas viaduć niejkuju hulniu, značyć, niečaha my vartyja, značyć, sytuacyja ŭ nas (i nami, jakimi sprabujuć manipulavać) źmianiabelnaja.
Za hetymi biazhłuzdymi źniknieńniami Biełaruś pramarhała najvažniejšuju palityčnuju i ekanamičnuju padzieju minułaha tydnia. Polšča aficyjna admoviła Rasiei ŭ budaŭnictvie hazapravodu ŭ Eŭropu cieraz svaju terytoryju. Aficyjnaja pryčyna — heta pastaviła b pad pahrozu palityčnuju i ekanamičnuju biaśpieku Ŭkrainy, stratehičnaha partnera Polščy. Rasiejskaja hazavaja karparacyja «Hazprom» mierkavała, što, «ruracionh», jak kažuć braty-palaki, projdzie praź Biełaruś, Polšču, Słavaččynu ŭ abchod Ukrainy i dazvolić Rasiei ihnaravać ukrainskija hazapravody.
Takim čynam, na hazavych planach Rasiei možna pastavić kryž. Źmianšajecca, choć i niaznačna, zacikaŭlenaść rasiejskich manapolijaŭ u kantroli nad našaj krainaj. Polšča, aproč taho, abvieściła pra svajo rašeńnie budavać novy hazapravod z Narvehii, kab źmienšyć svaju zaležnaść ad rasiejskah hazu. Hetaja novaja truba dojdzie i da Ŭkrainy i takim čynam stanie i dla jaje strachoŭkaju enerhietyčnaje biaśpieki.
Łukašenkavy čynoŭniki raźbiahajucca z prezydencyi jak mohuć, niby studenty z-pad jarma prymusovaha raźmierkavańnia. U.Rusakieviča adpravili pasłom u Kitaj, I.Paškievič daŭ interviju «BDH», dzie krytykuje Zamiatalina, nazyvaje biełaruskuju movu nacyjanalnym skarbam i razvažaje pra svaju pracu ŭ administracyi ŭ minułym časie. Kažuć, što i M.Miaśnikovič chacieŭ by śledam za I.Ciciankovym syści ŭ biznes, ale A.Łukašenka ŭtrymlivaje jaho ad adstaŭki pahrozami aryštu. Ale chto ž budzie dobra rabić niamiłuju spravu?
Nacyjanalny Bank abiacaje, što da kanca hodu ŭdasca dasiahnuć adzinaha kursu dalara (nia bolš za 1200 rubloŭ za dalar pad Novy hod).
U brytanskim parlamencie adbylisia słuchańni, pryśviečanyja sytuacyi ŭ Biełarusi i vosieńskim parlamenckim vybaram. Dziaržaŭny ministar Vialikaj Brytanii Kiejt Vez zajaviŭ, što, kab biełaruskaja apazycyja mahła ŭdzielničać u vybarach na spraviadlivych umovach, uładam treba zrabić słavutyja čatyry kroki. Jon adznačyŭ, što zastajecca ŭsio mienš vierahodnaści ŭdziełu apazycyi ŭ vybarach. Adnak jon zaklikaŭ apazycyju vykarystać tyja mahčymaści, jakija dajuć hetyja vybary. «Ich udzieł u vybarach, na jakich vyjaviacca parušeńni, nia budzie ličycca mižnarodnaj supolnaściu paćvierdžańniem lehitymnaści vybaraŭ, čaho, zdajecca, bajacca niekatoryja apazycyjnyja partyi,» — cytuje jahonyja słovy mienskaje ahienctva BiełaPAN.
Hety vystup idzie ŭ adnoj lini ź biesprecedentnaj 50-chvilinnaj razmovaj A.Łukašenki i Chaŭjera Salany. Zrešty, prapahandysckaja rytoryka BT pakazvaje, što šancy na źmienu palityki režymu małyja. Heta ž dakazvajuć i zamiežnapalityčnyja kantakty Miensku: na tydni my prymali armianskaha premjera i irackaha vice-premjera.
Benzyn znoŭ padaražeŭ. 93-ci ciapier bazava kaštuje 358, a 95-y — 422 rubli, za salaru treba vykładać ciapier 242 rubli. Choć u mužykoŭ z susiedniaha aŭtaparku ŭsio heta vam abydziecca, biezumoŭna, tańniej. Kali nie baiciosia, što paśla vas hetym pačnuć šantažavać nieviadomyja specsłužby.
B.T.
