U ilustravanaje vydańnie «Na šachmatnyja temy» ŭklučany šachmatnyja kampazicyi, krasvordy i vybranyja publikacyi aŭtara, pradstaŭlenyja ŭ štotydnioviku «Naša Niva» za 2004-2007 hady, a taksama ŭ biuleteni dla amataraŭ šachmatnaj kampazicyi, jaki vydajecca ŭ Łunincy (Bresckaja vobłaść). Niekatoryja teksty, pryśviečanyja raznastajnym aśpiektam šachmatnaj hulni, napisany śpiecyjalna dla hetaj knihi.
U intervju BiełaPAN V.Rubinčyk zaznačyŭ, što «nie vielmi surjoznaja, iraničnaja i strakataja, jak hniazdo saroki, kniha stvaraje svojeasablivuju chroniku, karysnuju dla ŭsich, chto cikavicca historyjaj i sučasnym stanam šachmat u Biełarusi». «Vydańnie pavinna nablizić šachmatystaŭ da biełaruskaj movy, a tych, chto razmaŭlaje pa-biełarusku, — da šachmat, — zaznačyŭ aŭtar. — U knizie ŭźniaty mnohija prablemy, u tym liku hulcoŭ, jakija praktykujuć, i aŭtaraŭ šachmatnych kampazicyj. Tut možna daviedacca ab tym, što viadomyja biełaruskija hramadskija dziejačy Alaksandr Kazulin i Pavieł Sieviaryniec taksama zachaplajucca hetaj staražytnaj hulnioj».
V.Rubinčyk pierakanany, što biełaruskaja mova pavinna prysutničać va ŭsich śfierach sučasnaha žyćcia, u tym liku i ŭ šachmatach. «Tolki ŭ hetym vypadku zabiaśpiečvajecca raźvićcio biełaruskaj movy. Tupikovym ža źjaŭlajecca šlach, pry jakim śfiera ŭžyvańnia biełaruskaj movy abmiažoŭvajecca tolki nacyjanalnaj litaraturaj i falkłoram», — padkreśliŭ V.Rubinčyk. Jon płanuje padrychtavać zbornik ab biełaruskich šachmatystach i šašystach, jakija zahinuli ŭ hady druhoj suśvietnaj vajny.
Daviedka BiełaPAN. V.Rubinčyk naradziŭsia ŭ 1977 hodzie. Skončyŭ Jeŭrapiejski humanitarny univiersitet. Publikavaŭsia ŭ Biełarusi, Rasii, ZŠA, Polščy i Izraili. Źjaŭlajecca stvaralnikam pieršaj biełaruskamoŭnaj jaŭrejskaj haziety i pieršaha šachmatnaha časopisa na biełaruskaj movie. Z 2004 pa 2007 hady V.Rubinčyk vioŭ rubryku «Kaisa» ŭ haziecie «Naša Niva».
