Z usioj krainy
Vialiki najezd na «małuju» presu
Pierad vybarami ŭłady sprabujuć całkam manapalizavać rynak ŚMI na terytoryi ŭsioj krainy. Pad «začystku» papadajuć usie, navat małyja i niezarehistravanyja hazetki.
Jak my ŭžo paviedamlali, u siaredzinie krasavika redaktaram kryčaŭskich niedziaržaŭnych vydańniaŭ «Kryčaŭski pravaabarončy vieśnik», «Naša dumka» i «Maładziožny kurjer» patelefanavała hałoŭny specyjalist adździełu druku Mahiloŭskaha abłvykankamu V.Tkačova. Maŭlaŭ, «dziaržava pavinna kantralavać na terytoryi Mahiloŭskaj vobłaści ŭsie vydańni…». Na hetym razmova skončyłasia.
I voś historyja atrymała praciah. Redaktary «Kryčaŭskaha pravaabarončaha vieśniku», «Našaj dumki» i «Maładziožnaha kurjera» byli vyklikanyja ŭ miascovuju prakuraturu, dzie ź ich pamočnik mižrajprakurora H.Novikaŭ uziaŭ tłumačeńnie . Prakurorskaha rabotnika cikaviła najpierš, adkul hrošy na vydańnie.
Kožnamu, chto znajomy z Zakonam ab druku, viadoma, što jon tyčycca drukavanych srodkaŭ masavaj infarmacyi z nakładam zvyš 300 asobnikaŭ. A kryčaŭskija niezaležnyja hazety vychodziać nakładam da 299 asobnikaŭ.
Andrej Kuźmin
Front zajmajecca mirnaj pracaj
U minułuju sieradu ŭ pryjomnuju Baranavickaha harvykankamu pačali pastupać dziasiatki zvankoŭ z patrabavańniem dobraŭparadkavać kancavy prypynak pa vulicy Telmana. Hetaja akcyja była splanavana miascovaj supołkaj BNF. Byli nadrukavanyja admysłovyja ŭlotki z telefonam harvykankamu.
Za niekalki dzion da hetaha frontaŭskaja supołka padała zvarot da miascovych uładaŭ z hetkaju ž prapanovaju.
Darečy, miesiac tamu chodniki pa vuł. Telmana, la aŭtavakzału, byli zaasfaltavanyja j pryviedzienyja ŭ narmalovy stan paśla analahičnaha zvarotu frontaŭcaŭ.
Raviaka Rusłan, Baranavičy
Statyst vinavaty
Klimavicki rajon na svaim prykładzie moža vydatna prailustravać stanovišča, jakoje skłałasia ŭ narodnaj haspadarcy krainy. Za 1999 hod, u paraŭnańni ź minułym hodam, pramysłovaja vytvorčaść skaraciłasia na asobnych pradpryjemstvach na 4-8%. Usiaho ž u rajonie 46 stratnych pradpryjemstvaŭ, a kambinat budaŭničych matarjałaŭ uvohule spyniŭ svaju pracu. Vytvorčaść tavaraŭ narodnaha spažyvańnia skłała 80% da ŭzroŭniu 1998 hoda. Niekatoryja kałhasy i saŭhasy nie atrymlivali zarobku z sakavika hetaha hodu. Rost złačynnaści skłaŭ 124%. Kab niejak papravić stanovišča, ułady pajšli na radykalny krok — źniali z pasady načalnika adździeła statystyki Alaksandra Marfiela. A niachaj błahuju statystyku nie daje.
S.Aržancaŭ
