Sutoki
Najdaŭniejšy ŭ Biełarusi narodny fotaklub «Miensk» na svaje 40-ja ŭhodki zładziŭ festyval mastackaje fatahrafii
U zalach Histaryčnaha (vuł.Marksa), Litaraturnaha (u Trajeckim) muzejaŭ i Nacyjanalnaj biblijateki prajšli vystavy fotamajstroŭ «Miensku» dy jahonych zamiežnych siabroŭ u ramkach festyvalu, što nazyvaŭsia «Sutoki». Na vystavie «Retra-2» byli pradstaŭlenyja pracy klasykaŭ biełaruskaj fatahrafii 60-80-ch hadoŭ Uładzimiera Niachajčyka, Samuiła Levicha, Viktara Hančarenki, Michasia Žylinskaha, Jurja Vasiljeva. U Jurja Vasiljeva, jaki ačolvaŭ fotaklub 21 hod, prajšła j persanalnaja vystava.
Nacyjanalny muzej historyi i kultury dastaŭ sa schoviščaŭ aryhinały pracaŭ fotamajstroŭ minułaha j pačatku našaha stahodździa (z 1860-ch pa 1920-ja hady). Na ŭłasnyja vočy možna pabačyć zdymki Majsieja Napielbaŭma, Jana Bułhaka, Antona Prušynskaha — u tym liku viadomy partret Dunina-Marcinkieviča, dy jašče 13 mienš viadomych ci zusim nieviadomych aŭtaraŭ.
Što ciapier stvarajecca ŭ «Miensku», prademanstravali dźvie vystavy zdymkaŭ, zroblenych u 90-ch — ułasna klubnaja j mižnarodnaja vystava piktaryjalnaj fatahrafii. Siarod udzielnikaŭ mižnarodnaj vystavy — berliniec Jorh Ajdner, biespasiaredni ŭdzielnik žyćcia klubu ŭ 70-ch, padčas svajho studenctva ŭ Mienskim palitechu.
Piktaryjalnaja — značyć, iź źmienienaj, transfarmavanaj niejkim čynam vyjavaj. Transfarmavać jaje mastak moža na roznych stadyjach pracy nad fotakarcinaj i roznymi šlachami — ad zvyčajnaha tanavańnia da ličbavaj apracoŭki.
Pryhožaha dy cikavaha na vystavach šmat, i navat dziŭnaje jość. Hetak, polskija fotamastaki prademanstravali svaje tvory ŭ technicy «humy»: heta kali «pišuć śviatłom» nie z dapamohaj srebra pa fotapapiery z želatynavaj asnovaj, a z dapamohaj pihmentaŭ pa akvarelnaj papiery, prapitanaj smałoj afrykanskaj akacyi, «humaj». Pryčym fotakarcina nia prosta zdymajecca j drukujecca, a amal što pišacca. Praca vielmi ciažkaja, ale mastak moža być spakojnym za dolu svajho tvoru. U adroźnieńnie ad zvyčajnaha fota, «humovyja» fotakarciny žyvuć jak najmienš 600—700 hadoŭ. Humistaŭ ličanyja dziasiatki (polskaja škoła — najmacniejšaja ŭ Eŭropie). A voś humistaŭ, jakija pracujuć nia ŭ kolery, a ŭ čorna-biełaj hamie – u śviecie adzinki. Hienryk Rahazinski ź Biełastoku siarod ich.
Dla fotamastakoŭ festyval skončyŭsia pleneram na Isłačy, u rodnych miaścinach V.Dunina-Marcinkieviča. A nam zastalisia vystavy, jakija možna naviedać.
Dzianis Nosaŭ
