Placdarm dla rezervista
Mikoła Statkievič idzie na vybary
Rašeńnie ab praciahu ŭdziełu ŭ vybarach lider BSDP (NH) nazvaŭ “ciažkim” i pryniaŭ jaho rankam taho dnia, kali jano było abvieščana presie. Svaju raniejšuju zajavu pra mahčymaje źniaćcio ŭłasnaj kandydatury Statkievič pryznaŭ pamyłkovaj.
“9 kandydataŭ ad BSDP, adchilenych ad udziełu ŭ vybarach, ličać, što svaim sychodam ja “padstaŭlaju” ich”, — zajaviŭ M.Statkievič.
Adnoj z prajavaŭ taho, što ŭłada padšturchoŭvaje jaho da źniaćcia svajoj kandydatury, Statkievič nazvaŭ napad na ofis BSDP. Maładyja sacyjał-demakraty Iryna Kaštalan, Leanid Harbačoŭ, Mikałaj Chudnicki i Raman Laŭkoŭski, što byli ŭ siadzibie ŭ časie napadu, praviali na dopytach u milicyi ad 10 da 13 hadzinaŭ, usich ich pahražali vyklučyć z VNU. Najdaŭžej dapytvali R.Laŭkoŭskaha. Na dumku M.Statkieviča, z-za taho, što toj u čas napadu nieviadomych paznaŭ marku pistaleta, jakim pahražali złačyncy. Ramanu, synu aficera, padałosia, što heta byŭ “pistalet Ściečkina”, davoli redkaja madel, jakaja jość na ŭzbrajeńni tolki KDB dy słužby achovy prezydenta. Hetaja zaŭvaha dazvoliła hramadoŭcam zrabić peŭnyja vysnovy: Statkievič upeŭnieny, što ŭpravu partyi abrabavali tyja samyja siły, jakija zajmalisia vykradańniem apazycyjnych palitykaŭ. “Heta jakraz u styli adnaho z padraździaleńniaŭ, načalnik jakoha tolki što pajšoŭ na pavyšeńnie”, — uvažaje M.Statkievič (namiakajučy na novaha hałavu MUS Navumava.)
Statkievič bačyć uva ŭdziele ŭ vybarach stratehičnuju metazhodnaść: “Vidavočna, što na prezydenckich vybarach, kali nie adbudziecca źmienaŭ u zakanadaŭčym orhanie i jahonych paŭnamoctvach, budzie abrany šlach niedapuščeńnia demakratyčnych kandydataŭ da vybaraŭ”. Tamu, pavodle lidera Narodnaj Hramady, apazycyja musić “stvaryć dla siabie placdarm” uva ŭładnych strukturach. “Stvarajecca ŭražańnie, što isnuje niejki plan pa farmavańni niedziaržaŭnickaj i niebiełaruskaj systemnaj apazycyi”, — kaža M.Statkievič. U baraćbie z režymam, dumaje jon, treba šukać roznyja šlachi, mierkavańni nielha padzialać na “majo” i “zdradnickaje”, inakš “naša adzinstva budzie nahadvać adzinstva brackaj mahiły”. “Vielmi ŭtulna siadzieć u rezervacyi, jakaja zaviecca “abjadnanaja apazycyja”, — miarkuje Mikoła Statkievič. Sam ža jon žadaje “vyjści tudy, dzie viecier”. U čyj bok toj viecier padźmie ŭrešcie?
T.S.
