Novyja knihi, dasłanyja ŭ redakcyju
Histaryčna-archiealahičny zbornik. № 15 / Redakcyjna-vydavieckaja hrupa: V.Viarhiej (kiraŭnik) dy inš.; Navukovy redaktar P.Łysienka. — Miensk: Instytut historyi Nacyjanalnaj akademii navuk Biełarusi, 2000. — 180 s., ił. — Nakład 215 as. ISBN 985-6234-72-7
Pieršy “Histaryčna-archiealahičny zbornik” byŭ vydadzieny jašče ŭ 1927 h., u 1993 h. vydańnie adnoŭlena. U hetym vypusku biełaruskija archieolahi źmiaščajuć matarjały pra svaje apošnija raskopki j daśledavańni. U paraŭnańni z papiarednimi vypuskami, u hetym bolej artykułaŭ pra mienskuju daŭninu. Kaštuje 2400 rub., nabyć možna tolki ŭ mienskaj “Akademknizie”.
A.Hlobus. Teksty: Park. Adzinota na stadyjonie. Śmierć-mužčyna. Skryžavańnie. Damavikameron. Tolki nie havary majoj mamie… Kruhły hod. Kojdanava. Novy Damavikameron. Post Scriptum. — Maskva: Vydaviectva “AST”, 2000. — 1088 s. — Nakład 1000 as. ISBN 5-17-001749-9
Upieršyniu ŭ adnym tomie sabrany ŭsie tvory A.Hlobusa apošnich hadoŭ. U kniharniach “Biełknihi” pradajecca za 4500 rub.
Nihil: Časapis dla sapraŭdnych symulakraŭ. № 1, 2000. — Miensk, 2000. — 144 s., ił.
Druhi numar “Nihilu” — vydańnia Novaha frontu mastactvaŭ, ačolvanaha Michasiom Bajarynym. U numary drukujucca Juraś Barysievič, Andrej Chadanovič, Kanstancin Michiejeŭ, Haljaš Sin. Nadrukavany dźvie litaraturnyja falsyfikacyi, padpisanyja imionami V.Akudoviča j Adama Hlobusa. U adroźnieńnie ad pieršaha numaru časapisu, u hetym — pałova tekstaŭ pa-rasiejsku. Vydańnie hustoŭna azdoblena mastackimi fotazdymkami. Juraś Barysievič razhladaje časopis “Nihil” jak mastackuju alternatyvu časopisu “Arche”. Cana — 900—1000 rub.
I.Ptašnikaŭ. Tartak: Apovieść i apaviadańni. — Miensk: Mastackaja litaratura, 2000. — 462 s. — (Biełaruskaja proza XX stahodździa). — Nakład 2200 as. ISBN 985-02-0496-6
Kniha Ivana Ptašnikava “Tartak” praciahvaje “Załatuju seryju” biełaruskaj prozy, zapačatkavanuju vydaviectvam. Cana 850 rub.
Frahmenty filazofii, kulturalohii, litaratury. 1-2, viasna 2000. — Miensk, 2000. — 308 s.
Viasnovy numar “Frahmentaŭ” maje temu “Ideja svabody”. Siarod aŭtaraŭ numaru – I.Babkoŭ, V.Akudovič, S.Varyvocki, S.Padokšyn. Nabyć možna ŭ siadzibach BNF “Adradžeńnie” i TBM. Cana — 1100 rub.
Istorija Biełarusi v dokumientach i matieriałach / Avtory-sostavitieli I.Kuźniecov, V.Maziec. — Miensk: Amałfeja, 2000. — 672 s. — Nakład 4000 as. ISBN 985-441-119-2
U chrestamatyju ŭvajšli najvažniejšyja dakumenty: pryvilei, manifesty, zahady, hramaty, zakony, matarjały peryjadyčnaha druku, uspaminy najvydatniejšych dziejačaŭ biełaruskaje minuŭščyny. Značnaja dola matarjałaŭ raniej była nieviadomaja šyrokamu kołu čytačoŭ. Siaredniaviečnyja teksty drukujucca ŭ pierakładzie na biełaruskuju, inšyja — pa-rasiejsku. I chacia amal usie teksty zbornika isnujuć na biełaruskaj movie, niezrazumieła, čym kiravalisia składalniki, vybirajučy movu publikacyi taho ci inšaha dakumentu. Kaštuje 2600 rub.
Kołokoła vriemion: Popularnyj istoričieskij žurnał: Nieiźviestnyj Minsk. Prohułka po zatieriannomu horodu. № 3, 2000. — Miensk, 2000. — 16 s., ił. — Nakład 5000 as. ISSN 1605-5381
Pa-biełarusku, pa-anhielsku j pa-rasiejsku ŭ papularnaj formie raspaviadajecca pra najcikaviejšyja miaściny staroha Miensku: Vierchni horad (Katedralny kaścioł, Kojdanaŭskuju vulicu, budynak, dzie mieściŭsia Instytut biełaruskaje kultury, pažarnaje depo kanca XIX st. na Haradzkim vale, dom Vańkoviča), Alaksandraŭski skvier z skulpturaju “Chłopčyk i lebiedź”, vulicu Padhornuju (ciapierašniuju Marksa), Čyrvony kaścioł na placy Niezaležnaści. Hety numar časapisu — najlepšaja padarožnaja knižka dla vandrovak pa centry stalicy.
Padrychtavaŭ Viktar Muchin
