Naviny za tydzień
Sajuz na sajuzie sajuzam pahaniaje
Prezydent Ukrainy Leanid Kučma nia bačyć perspektyvaŭ raźvićcia SNH. Jak pieradaje ahienctva UNIAN, pra heta jon zajaviŭ 17 listapada na sustrečy sa studentami Instytutu mižnarodnych adnosin Kijeŭskaha nacyjanalnaha ŭniversytetu imia Tarasa Šaŭčenki. «Kali ŭnutry SNH stvarajecca stolki sajuzaŭ, što čort hałavu złomić, i kali ŭ samim sajuzie jość inšyja sajuzy, dyk jakija mohuć być perspektyvy?» — skazaŭ Leanid Kučma.
Na Mienskim matornym chvalujucca
Chvalavańni rabočych nazirajucca na adnym z najbujniejšych pradpryjemstvaŭ biełaruskaj stalicy — Mienskim matornym zavodzie, paviedamiŭ BiełaPAN. 16 listapada kala budynku zavodakiraŭnictva adbyŭsia stychijny mitynh: rabočyja patrabavali narmalnaj apłaty svajoj pracy. Niadaŭna dyrekcyja źmianiła hrafik vydačy zarpłaty, ale sama ž jaho parušaje. A avansy dyk stali i zusim śmiešnyja – kala troch tysiačaŭ. Vyjšaŭšy da rabočych, hieneralny dyrektar MMZ Mikałaj Łobač zajaviŭ ab ciažkaj sytuacyi na zavodzie. Rabočyja vyrašyli sklikać kanferencyju pracoŭnaha kalektyvu dy razabracca, adkul tyja “ciažkaści”. Praŭda, rabočyja razumiejuć, što zavodzkija prablemy — vynik nierazumnaj ekanamičnaj palityki dziaržavy. Tamu 15 listapada rabočyja MMZ razam z pradstaŭnikami traktarnaha zavodu planavali pravieści šeście i mitynh suprać źbiadnieńnia pracoŭnych. Adnak Mienharvykankam hetuju akcyju zabaraniŭ.
Apazycyjanery sustrelisia z Salanam
17 listapada lidery abjadnanaj biełaruskaj apazycyi, što ciapier naviedvajuć eŭrapiejskich kiraŭnikoŭ, sustrelisia z hieneralnym sakratarom Eŭraźviazu Chaŭjeram Salanam, paviedamiła pres-słužba Partyi BNF. Vincuk Viačorka, Anatol Labiedźka, Alaksiej Karol i Andrej Sańnikaŭ naviedali Brusel i abmierkavali z Salanam perspektyvy demakratyčnaha raźvićcia Biełarusi. Napiaredadni jany rabili dakład u Strasburhu ŭ Eŭraparlamencie i sustrelisia ŭ brytanskim parlamencie z namieśnikam ministra zamiežnych spravaŭ Vialikabrytanii Kitam Vazam. Usie surazmoŭcy paćvierdzili, što Pałata pradstaŭnikoŭ nia budzie pryznanaja, bo vybary ŭ jaje byli sfalšavanyja.
Padrychtavaŭ Aleś Kiebik
Prakurory zabrali film Šaramieta
Supracoŭniki Hienprakuratury Rasiei praviali na ORT vyniaćcio kaset z zapisam filmu «Dzikaje palavańnie» i z frahmentam pieradačy «Čakaj mianie», u jakoj udzielničali Pavał Šaramiet i maci źnikłaha aperatara ORT Źmitra Zavadzkaha. Jak paviedamiŭ ahienctvu BiełaPAN sam Pavał Šaramiet, hetyja dziejańni rabilisia na zapyt Prakuratury RB u ramkach kryminalnaj spravy, jakuju biełaruskaja prakuratura ŭzbudziła paśla pakazu «Dzikaha palavańnia» pa kanale ORT. Pavodle słovaŭ Šaramieta, jaho ŭražvajuć dziejańni Prakuratury Biełarusi, jakaja zamiest taho, kab šukać Zavadzkaha, pieraśleduje tych, chto aśmielvajecca publična kazać pra źniknieńni ŭ Biełarusi viadomych žurnalistaŭ i palitykaŭ.
Humanitarnyja śvińni
120 žyvych śviniej razdali žycharam vioski Bahdanaŭka Łuninieckaha rajonu ŭ jakaści humanitarnaj dapamohi pradstaŭniki miesta Dunhan z Paŭnočnaj Irlandyi. Śpis tych, kamu varta dać śvińniu, dapamahali składać nastaŭniki. Spačatku było vyrašana dać śviniej samym biednym siemjam, zatym — šmatdzietnym, narešcie — tym, u kaho pa troje dziaciej-školnikaŭ. U vyniku bolš za ŭsio śviniej dastałasia rabotnikam škoły. Śviniej zakupili ŭ kałhasie «Rasija» i pryvieźli da škoły. Dalej ich partyjami zapuskali ŭ školny cir, i ludzi pa śpisie zachodzili łavić upadabanuju śvińniu. Irlandcy zdymali ŭsio heta na videakameru. Na nastupny dzień jany naładzili ŭ škole śviata ź biaspłatnym pačastunkam. Ale mnohija žychary Bahdanaŭki nie pajšli, kab nia być źniatymi na videa. Śvińni ŭnieśli razład u mirnaje žyćcio vioski: niekatoryja viaskoŭcy paličyli, što raźmierkavańnie było niespraviadlivaje, — paviedamlaje BiełaPAN.
Usich siabroŭ zrabić členami
Uprava justycyi Haradzienskaha abłvykankamu nie zarehistravała Smarhonskaje hramadzkaje abjadnańnie “Pravaabarončy centar” i zapatrabavała, kab słova “siabar” u statucie zamianili słovam “člen”. Zusim paciešnyja stali za Łukašenkam čynoŭniki – “havarać jak chaciać”, a ŭsio pamykajucca kiravać movaj dy vyznačać, jakoje słova adpaviadaje litaraturnaj normie, a jakoje nie. Mabyć, i ansamblu “Siabry” ź jahonaju nazvaj ciapier nijakaja pierarehistracyja nia śviecić.
Pavodle BARC
Kraduć karciny
Z mastackaj halerei na vuł. Šapena ŭ Baranavičach skrali 24 karciny miascovych mastakoŭ A.Kołasa, P.Sachareviča, Z.Ščasnaha, H.Matusievič, U.Asipoviča. Jak skazaŭ dla “NN” adzin z mastakoŭ, Pavał Sacharevič, złodziei pierapiłavali kraty, vyniali šybu j trapili ŭ budynak, dzie razam z halerejaj mieścicca j majsternia zhadanych mastakoŭ. Milicyjanty paśla nia zdoleli znajści nijakich adbitkaŭ – vidać, “pracavali” sapraŭdnyja prafesijanały kradziažu. U pakoi zastałasia tolki adna karcina, zanadta vialikaja, kab praleźci praz vakno. Jak miarkujuć sami mastaki, ichnyja tvory vyviezuć ź Biełarusi ŭ Maskvu, dzie j pradaduć.
Rusłan Raviaka
Dzieci źbivajuć baćkoŭ
U Mścisłavie nadta ž časta svajaki zabivajuć svajakoŭ, dzieci — baćkoŭ. Voś i apošni vypadak: u vioscy Kartyžy Mścisłaŭskaha rajonu 35-cihadovy syn hetak źbiŭ svajho baćku, što stary nieŭzabavie pamior. Vinoj tamu, chutčej za ŭsio, pasłužyła harełka, jakuju ŭ nieabmiežavanaj kolkaści pierad samym zabojstvam spažyvali i złačynca, i achviara.
Andrej Kuźmin
ŚVIETŁYJA DNI Ŭ CIOMNUJU ČASINU
Niahledziačy na ŭsie sacyjalna-ekanamičnyja chvaroby, zdarajucca na Połaččynie j śviaty. Naprykład, na pačatku listapada adkryłasia novaja trochpaviarchovaja cahlanaja škoła ŭ vioscy Špakoŭščyna Połackaha rajonu. Uzvodziŭ pryhožy, dychtoŭny budynak trest “Połacaksielbud”. Budoŭla doŭžyłasia krychu bolš za dva hady. Heta prosta kaśmičnaja chutkaść dla našych dzion. Naprykład, novaja čatyrnaccataja škoła ŭ Navapołacku budavałasia bolš za piać hadoŭ. Praŭda, škoła ŭ Špakoŭščynie nievialikaja — raźličana ŭsiaho na 110 vučniaŭ, realna ž pajšli vučycca ŭ jaje tolki 70 dziaciej. U novaj škole jość spartovaja zala, stadyjon, kamputarnaja klasa, kacielnia, ciaplica. Škołu ŭkamplektavali pryhožaj, sučasnaj meblaj. Praŭda, škoła ŭ Špakoŭščynie — adzinaja, pabudavanaja sioleta na ŭsiu Viciebskuju vobłaść.
Vasil Krokva
