Traktar pieramohi
Siamion Domaš i Alaksandar Dabravolski: chto zdolny na vyjhryšny scenar?
Kandydatam u prezydenty ad Łukašenki budzie Łukašenka. Inšaha kandydata lavicy, mahčyma, vyłučać prafsajuzy. Im zdolny stać kiraŭnik prafsajuzu ahrarnikaŭ Alaksandar Jarašuk, bo samomu Hančaryku pajści na vybary rašycca ciažka — nadta niebiaśpiečnym dla jahonaha stanovišča akazaŭsia by projhryš, dyj šancaŭ na pieramohu nijakich. Trecim kandydatam ad siłaŭ ź niajasnaj palityčnaj placformaj budzie liberał-demakrat Siarhiej Hajdukievič. Siarhiej Kalakin, lider apazycyjnych kamunistaŭ, taksama hatovy ŭźniać štandar zmahańnia. Hetyja čaćviora raźličvajuć na padtrymku tych ci inšych uładnych abo apazycyjnych hrupovak u Maskvie, na rasiejskija hrošy, ale tolki Łukašenka va ŭsioj lavicy – na pieramohu.
Pra rašučy ŭdzieł u vybarach Zianona Paźniaka havoryć Kanservatyŭna-Chryścijanskaja Partyja BNF. Michaił Čyhir vyłučyŭ siabie sam, i jahonaja sprava tut ža ź niečakanaj pačcivaściu była pieradadzienaja Viarchoŭnym Sudom na dadatkovaje śledztva, što daje Čyhiru jurydyčnuju mahčymaść balatavacca. Ale ni Čyhir, ni Paźniak nia majuć nadziei stać adzinymi kandydatami demakratyčnych siłaŭ z-za svajho vysokaha admoŭnaha rejtynhu i parazaŭ na apošnich parlamenckich vybarach, u jakich jany brali ŭdzieł. Najbolšyja šancy vystupić Kandydatam Adzinstva majuć były kiraŭnik Haradzienščyny Siamion Domaš i adzin ź lideraŭ Abjadnanaj Hramadzianskaj Partyi Alaksandar Dabravolski — u tym razie, viadoma, kali pahodziacca vyłučycca. Pieravaha pieršaha — niezaležnaść. Pieravaha druhoha — partyjnaść.
Vyjhryšny scenar — pošuk nie “prachadnoha” kandydata ci taho, jaki “maje najbolš suviaziaŭ”, a čałavieka, zdolnaha razahreć sercy biełaruskich vybarcaŭ. Tolki taki zdolny pieramahčy Cmoka, luby inšy moža tolki z honaram prajhrać.
Na minułym tydni pradstaŭniki niedziaržaŭnych arhanizacyj Mahiloŭščyny rejtynhavym hałasavańniem vyznačali najbolš pryvabnaha dla ich kandydata. S.Domaš nabraŭ 10 hałasoŭ, A.Dabravolski — 9. Pra žadańnie bačyć S.Domaša svaim kandydatam zajavili i niezaležnyja supołki Haradzienščyny. Na hetym tydni maje vyznačycca Kaardynacyjnaja Rada Demakratyčnych Siłaŭ.
