Akazvajecca, u Piciery za kulisami chutkaciečnaha samitu biaz halštukaŭ (nasamreč, darečy, prezydenty byli pry paradzie) razharnułasia dramatyčnaja intryha! Jana tyčyłasia kandydatury novaha staršyni vykankama SND. Pytańnie ŭpierłasia ŭ asablivuju dumku Alaksandra Łukašenki.
Va ŭsiakim razie, takuju versiju vykładaje maskoŭskaja hazeta "Viedomosti". Na źmienu Rušajłu, u jakoha voś-voś sydzie trochhadovy termin paŭnamoctvaŭ, Maskva rychtavała Alaksandra Viešniakova. Ale zaćvierdzić jaho ŭ Piciery nie pašenciła mienavita praz toje, što suprać vykazaŭsia biełaruski aficyjny lider.
Były milicyjant Rušajła zapomniŭsia biełaruskaj publicy tym, što niaźmienna chvaliŭ u televizary tutejšyja vybary, pryjazdžajučy na čale misij naziralnikaŭ ad SND. Jahonyja acenki byli jak balzam na dušu ajčynnym uładam, adrozna ad dyjametralna procilehłych vysnoŭ nienavisnaj im instytucyi — BDIPČ ABSE (na't abrevijatura niejkaja nialudzkaja! :-).
Zakońnik Viešniakoŭ pakazaŭ siabie personaj bolej naturystaj. Na čale rasiejskaha Centarvybarkamu jon inšym razam dazvalaŭ sabie zajavy nie zusim va ŭnison Kramlu. Tamu, mahčyma, i byŭ adsunuty ŭbok pierad adkaznaj aperacyjaj "Pierajemnik-2008". Ale zasłužanaha namenklaturnaha dziejača Viešniakova, jak i ŭ nas Damaškieviča, "na vulicu vykidać" nia stali :-) Dumali voś uładkavać na dobraje mieściejka, a tut raptam taki chałodny duš ad sajuźnika! Pavodle pracedury tut ža musić być kansensus, chalera jaho biary!
Dyk što ž stała pryčynaju adłupu? Eksperty ćvierdziać, što Viešniakoŭ pry ŭsioj naturystaści naŭrad ci staŭ by pakazvać siabie "novaj miatłoj" dy nadta prydziracca da stupieni elehantnaści našych vybaraŭ. Tady što?..
"Viedomosti" cytujuć pradstaŭnika Ŭkrainy: maŭlaŭ, kadravy demarš biełaruskaha boku stavić na mecie "pamatlać nervy Maskvie i što-niebudź vyhandlavać". Kali tak, to tut jašče babula nadvaja varažyła. Pucin moža tolki macniej hubu zakusić.
Va ŭsiakim razie, parazumieńniem miž dvuma kiraŭnikami, zdajecca, i nia pachnie. Pahadzieciesia, kali b naśpiavała niejkaja ŭmoŭna-prymirenčaja sustreča, to biełaruski bok naŭrad ci staŭ by dražnić byka.
Našyja ž niezaležniki mohuć uściešycca tym, što volens-nolens aficyjny Miensk daŭ boj kramloŭskamu kadravamu dyktatu ŭ strukturach SND. Chaj ciapier pačuchajuć patylicu da kastryčnickaha samitu ŭ Dušanbe.
P.S. Pra kadravy demarš u Sankt-Pieciarburzie paviedamlaje i "Kommiersant'". Jašče bolej, nazyvaje Łukašenku hałoŭnym ńjusmejkieram samitu, a jahonuju pazycyju datyčna Viešniakova — radykalnaj. Maŭlaŭ, "va ŭltymatyŭnym tonie nakłaŭ veta..."
P.P.S. Čarhiniec śćviardžaje, što ŭsio heta jość "vutkaj". Sapraŭdy, farmalna kandydaturu na hałasavańnie nie vynosili. Dyk na što było toje veta nakładać? :-)
