 © CartoonStock.com |
Redaktary bresckich niedziaržaŭnych haziet, jakija raspaŭsiudžvajucca ŭ horadzie praź sietku vuličnaha handlu, 12 červienia atrymali listy ź miascovaha harvykankama, dzie paviedamlajecca, što ŭsie vydadzienyja redakcyjam dazvoły na realizacyju vydańniaŭ na terytoryi Bresta hublajuć siłu z 7 červienia.
Heta robicca «ŭ suviazi z pryniaćciem rašeńnia harvykankama «Ab zaćviardžeńni Pałažeńnia ab rabocie hramadskich raspaŭsiudnikaŭ drukavanych vydańniaŭ», — paviedamlajecca ŭ listach za podpisam namieśnika staršyni Bresckaha harvykankama V.Chafizava.
Dla atrymańnia novaha dazvołu redakcyi niedziaržaŭnych haziet pavinny vykanać šerah ŭmoŭ. U pryvatnaści, pavodle patrabavańnia zaćvierdžanaha Pałažeńnia, usie hramadskija raspaŭsiudniki pieryjodykaŭ pavinny być apranuty ŭ admysłovyja nakidki i kiepki z nadpisam «Presa Bresta». Redakcyi musiać taksama asnaścić handlaroŭ pieranosnymi stolikami, sumkami dla haziet i kantejnierami na cialežkach.
Da 16 červienia 2007 h. redakcyjam vydańniaŭ nieabchodna zrabić zajaŭki na zakupku hetkaj amunicyi i abstalavańnia. U liście ŭkazany aryjencirovačny košt adnaho kamplekta — 3,5‑4 miljony rubloŭ.
«Na siońnia my karystajemsia pasłuhami prykładna 80 hramadskich raspaŭsiudnikaŭ, — raskazaŭ pres‑słužbie BAŽ redaktar «Briestskoho kuŕjera» Mikałaj Alaksandraŭ. — Tamu my — kiraŭniki vydańniaŭ, jakija raspaŭsiudžvajucca praz vuličny handal: «Briestskij kuŕjer», «Viečiernij Briest», «Briestskaja hazieta», «Iz ruk v ruki», — damovilisia nabyć hetaje abstalavańnie dla handlaroŭ u składčynu».
«Kaardynacyju» vykanańnia patrabavańnia harvykankam uskłaŭ na redakcyju haziety «Viečiernij Briest». Astatnija redakcyi papiaredžany, što «nie aformiŭšym zakaz, dazvoł harvykankama na arhanizacyju handlu drukavanymi vydańniami praz hramadskich raspaŭsiudnikaŭ razhladacca nie budzie».
Pakul pytańnie vyrašajecca, pretenzij da našych raspaŭsiudnikaŭ niama, — kaža Mikałaj Alaksandraŭ.
