Vodhuki
Psychapatyčnaja mazaika
Pravilna vy napisali, što heta niadobra — publikavać dyjahnaz. Ale, na moj pohlad, heta tyčycca zvyčajnych ludziej. A voś nakont tych, chto zajmaje vysokija pasady, ad ich dziejańniaŭ, pavodzinaŭ zaležać losy vialikaj kolkaści ludziej, navat krainaŭ — takija ludzi razam ź vialikaju pasadaju atrymlivajuć vialikija i šmatlikija abaviazki. Siarod ich — być sumlennym i adkrytym. Kali ja daviaraju (a ja, naprykład, nie daviaraju) kandydatu ŭ deputaty pradstaŭlać maje intaresy na ŭzroŭni rajonu, horadu, dyk hety deputat padaje, prynamsi, deklaracyju svaich dachodaŭ. A što kazać ab prezydencie?! My pavinny viedać usio — i stan zdaroŭja taksama. Francuzy niadaŭna natapyryli vušy, kali ich hałoŭny čchnuŭ nia ŭ čas. Amerykancy taksama — jany, peŭna, trochi pierabolšvajuć, ale trymajucca słušnaha napramku: zajmajučy vysokuju pasadu, čałaviek atrymlivaje vialikija abaviazki i pavinien padparadkoŭvacca šmatlikim patrabavańniam. A nia tak, jak u nas: “pasada — pryvilej, a abaviazki svaje ja prydumaju sam”. Vy majecie racyju i ŭ tym, što Biełaruś — nie cyvilizavanaja kraina, i demakratyčnyja padychody j razvažańni ŭ nas nieprymalnyja. Tamu, peŭna, taja publikacyja ŭ “NS” — brudny pryjom: “heta nia našyja metady, a ichnyja”.
Z druhoha boku, jak inakš paviedamić ludziam pra chvarobu hałoŭnaha spartoŭca? Uličvajučy novy kodeks, pavodle jakoha kožnaje słova pra PPRB moža traktavacca jak paklop ci abraza?
Źmicier Łapcionak, Miensk
Małajcom “Naša Svaboda”
Mianie aburyła vaša reakcyja na artykuł u “Našaj Svabodzie”. Toje, pra što medyki šaptalisia na kuchniach, hazeta navažyłasia nadrukavać. I voś zamiest taho, kab padtrymać “NS”, vy kidajecie ŭ jaje svoj kamień. Lepš by vy pramaŭčali, jak heta robić “Narodnaja Vola”.
Składajecca ŭražańnie, što akupacyjnaja ŭłada zbolšaha zadavalniaje redakcyju, “voś tolki viaroŭka trochi mulaje šyju, ale tryvać možna”. Tolki čamuści Razanaŭ źjechaŭ z krainy, nia vytrymaŭ.
Pazycyja starońniaha naziralnika vielmi vyhodnaja, ale ci słušnaja?
Viktar Lisoŭski, Miensk
