Razvod pa-słaviansku
Łukašenka i staryja jelcynskija kadry — ciažar Pucina
U hadavinu padpisańnia damovy ab stvareńni “sajuznaj dziaržavy” Biełarusi i Rasiei Alaksandar Łukašenka ŭčyniŭ skandalny demarš, niečakana pierapyniŭšy svoj čarhovy vizyt u Maskvu. Kažuć, pakryŭdziŭsia na svajho kalehu Pucina, jaki addaŭ pieravahu sustrečy z prezydentam Izrailu pierad braterskimi abdymkami z słavianskim chaŭruśnikam. Zrabiłasia vidavočnym, što staŭleńnie novaha haspadara Kramla da svajho niaŭrymślivaha biełaruskaha kalehi našmat bolš prahmatyčnaje za baćkoŭskuju spahadu B.Jelcyna. Pra heta śviedčać padrabiaznaści skandału vakoł zatrymańnia, vidać, užo byłoha sajuznaha dziaržsakratara Paŭła Baradzina.
Padčas padpisańnia svojeasablivaha šlubnaha kantraktu z Łukašenkam hod tamu adradžalniki vialikaj Rasiei nijakim čynam nia bačyli ŭ im partnera. Pucinu na šlachu ŭ Eŭropu, na Zachad, na smalenskaj darozie patrebny tolki vykanaŭca. A takim haspadar Biełarusi moža być tolki kali jaho mocna i nadziejna pryšpilić da rasiejskaj ekanomiki. Adnak efektyŭnaja ekanamičnaja madel dziaržavy, jak jaje ŭjaŭlaje sabie Łukašenka, absalutna nie supadaje z toj, jakuju prapahanduje pucinski ŭrad. Na Biełarusi praciahvaje isnavać pieravažna savieckaja madel. Niekatoryja analityki śćviardžajuć, što dalejšaje vykanańnie vyznačanaj prahramy (kantraktu) pa stvareńni tak zvanaj sajuznaj dziaržavy pa sutnaści pasłablaje biełaruski režym. Dla Łukašenki i jahonaha bližejšaha atačeńnia taki chod padziejaŭ u hod mahčymych prezydenckich vybaraŭ vielmi niepažadany. Adnoj z prykmietaŭ peŭnaj tryvohi stałasia čarhovaja chvala nadumanaha nahniatańnia antyamerykanskich, antyzachodnich nastrojaŭ. Iznoŭ svojeasablivuju “haścinnaść” pačali adčuvać na sabie akredytavanyja ŭ Miensku pasły. Užo sto dzion Łukašenka nie žadaje sustrecca z pasłom ZŠA Majkłam Kozakam i atrymać ad jaho davierčyja listy. Małanki laciać i ŭ bok pasła ABSE Hansa-Hieorha Vika. A tut jakraz skandał z zatrymańniem Baradzina pad ruku trapiŭsia.
Toje, što Łukašenka z kampanijaj padčas svaich najezdaŭ u Maskvu dy ŭ rasiejskija rehijony moh kali-niebudź narvacca na svojeasablivuju rasiejskuju “haścinnaść”, niekatoryja naziralniki pradkazvali daŭno. Ale što hadavina sumiesnaha žyćcia słavianskich siostraŭ budzie adznačanaja voś tak, padobna, mała chto čakaŭ. Vidać, siedziačy z Łukašenkam u carskaj ložy Bolšoho teatru na spektakli “Straści (Rahnieda)”, Pucin pa-svojmu zrazumieŭ hety tvor. Za tydzień u maskoŭskim aeraporcie źbiralnika pravasłaŭnych ziemlaŭ sustrakali ŭradoŭcy nieadpaviedna nizkaha ŭzroŭniu. I Łukašenka nia moh nie adčuć hetaha niadobraha znaku. Padčas uručeńnia premii ŭ zali carkoŭnych saboraŭ chrama Chrysta Zbaŭcy, Patryjarch Maskoŭski Aleksij II asabliva adznačyŭ uniosak Łukašenki ŭ spravu zbližeńnia słavianskich narodaŭ. Ad śvieckaha Kramla padtrymać hetuju dumku patryjarcha nichto nie pryjšoŭ. Pakryŭdziŭšysia, a moža i žachnuŭšysia vysnovaŭ, što naprošvalisia ŭ suviazi z usim hetym, staršynia najvyšejšaje dziaržaŭnaje rady sajuzu ŭ toj samy dzień viarnuŭsia dachaty.
Zatoje Pavał Baradzin niachutka vierniecca ŭ Biełaruś, jakuju jon, zrabiŭšysia dziaržsakratarom, niejak nazvaŭ “dobrym kamercyjnym prajektam”.
Kali Baradzina tolki zatrymali, jahony, jak vyśvietliłasia, niepasredny načalnik – Łukašenka – z pahroźlivymi intanacyjami zajaŭlaŭ, što dalejšyja kroki ŭ abaronu padnačalenaha buduć rabicca ŭ adpaviednaści z vynikami sudovaha pasiedžańnia. I voś jano adbyłosia ŭ minuły čaćvier. Baradzin zastaŭsia ŭ bruklinskaj turmie na niekalki dziasiatkaŭ dzion. Pucin pa-raniejšamu maŭčyć. Zamaŭčaŭ pakul i sam Łukašenka. Zatoje jahonyja pradstaŭničyja čynoŭniki pryludna asprečyli rašeńnie rasiejskaha premjera Kaśjanava pryznačyć v.a. dziaržsakratara Ihara Sielivanava – adnaho z šaścioch namieśnikaŭ Baradzina. Zychodziačy z zajavaŭ, atrymanych u adkaz, u rasiejskim Biełym domie, dyj u Kramli, takaja reakcyja była ŭspryniataja pabłažliva. Jak histeryka sužychara ź bićciom posudu na kuchni.
Zaŭvažnaj padziejaj u dvuchbakovych adnosinach stałasia adkryćcio ŭ Miensku pradstaŭnictva kampanii “Słaŭnafta”. Jaje prezydent abviaściŭ pra stvareńnie SP ź biełaruskim dziaržaŭnym kancernam “Biełnaftachim” pad nazvaj “Słavianskaja naftavaja kampanija”. Hetaje sumiesnaje pradpryjemstva źbirajecca zdabyvać naftu z radovišča, licenziju na raspracoŭku jakoha “Słaŭnafta” i “Biełnaftachim” jašče źbirajucca nabyć. Urad Biełarusi raźličvaje z dapamohaj hetaha sumiesnaha pradpryjemstva pavialičyć pastaŭki paliŭna-zmazačnych materyjałaŭ na ŭnutrany rynak.
Zhadajem, što adkryćcio mienskaha pradstaŭnictva kampanii “Słaŭnafta” adbyłosia 24 studzienia. Na nastupny dzień paśla fijaska Łukašenki ŭ Maskvie. Tak užo supała, što, litaralna pa jahonym śledzie, Padlikovaja pałata Rasiejskaj Federacyi pačała razhladać vyniki pravierki hetaj kampanii. Pavodle niekatorych źviestak, znajšlisia značnyja parušeńni i niedachopy ŭ dziejańniach kiraŭnictva. Padlikovaja pałata Siarhieja Ściapašyna prapanuje rasiejskamu ŭradu ŭmacavać menedžment kampanii svaim specpradstaŭnikom. Što heta moža aznačać dla biełaruskaha boku, pakul što skazać ciažka. Adnak nie zastaŭsia pa-za ŭvahaj naziralnikaŭ nastupny fakt. Na niadaŭnich sustrečach Pucina z pradstaŭnikami rasiejskaha biznesu ŭdały biznesmen i prezydent kampanii “Słaŭnafta” Michał Huceryjeŭ nia byŭ zaŭvažany. Moža być, pryznany ŭ Miensku intehracyjny aŭtarytet dla Kramla takim nie źjaŭlaŭsia. Abo ŭžo nie źjaŭlajecca.
Roznaje staŭleńnie da losu Baradzina, prademanstravanaje ŭ apošni čas Łukašenkam i Pucinym, vyjavili nia tolki składanaści ich uzajemaadnosinaŭ. Mnohija ličać, što Pucin prosta pazbaŭlajecca ad starych jelcynskich kadraŭ. Nia vyklučana, što takoha tonkaha ŭzroŭniu hulni za kramloŭskaj ścianoj Łukašenka paprostu nie zrazumieŭ. I naŭrad ci chto-niebudź ź blizkaha atačeńnia byŭ zdatny raspluščyć jamu na heta vočy.
Cikava, što ŭ niekatorych rasiejskich ŚMI zatrymańnie Baradzina amerykancami traktujecca i jak znakavaje papiaredžańnie dla... Łukašenki. A adnym z mahčymych abvinavačańniaŭ užo na jahony adras moža zrabicca, naprykład, źniknieńnie viadomych u Biełarusi asobaŭ. I kalarytnyja śviedki mohuć źjavicca. U atačeńni Łukašenki hetkaha kštałtu publikacyi, dyj adzinstva rasiejskich ŚMI ŭ spravie ckavańnia PPRB, niebiespadstaŭna ŭsprymajucca z tryvohaj. Mienskija stratehi adčuli padłučeńnie viadomych technalohijaŭ sa znajomym počyrkam. I tam, i tut vychavancy adnoj hebisckaj škoły.
Razvod pa-słaviansku, jaki nazirajecca zaraz, viadoma, ni ŭ jakim razie nie aznačaje, što Biełarusi pahražaje los sałamianaj udavy. Rasieja na heta nia pojdzie. Niekatoryja analityki razvažajuć navat tak: maŭlaŭ, kali ŭ Čačenii Maskva moža stvaryć kišennuju administracyju, dyk čamu b nie zrabić hetaha ŭ Biełarusi? Chacia b na niejki pierachodny postłukašenkaŭski peryjad. A biełarusam što, jany padtrymajuć – aby vajny nie było.
Raman Jakaŭleŭski
