Z usioj krainy
Na kamisiju za prastytucyju
Za apošni hod administracyjnaja kamisija Kryčaŭskaha rajvykankamu razhledzieła bolš za 400 administracyjnych spravaŭ. Lideram siarod parušeńniaŭ źjaŭlajecca abrydłaje ŭžo pjanstva na vytvorčaści. Za luboščy ź “zialonym źmiejem” na pracoŭnym miescy było pakarana 189 kryčaŭcaŭ. Na druhim miescy spravy, jakija tyčacca tych, chto nie padtrymlivaje čyścini vakoł žytła. Takich spravaŭ było 150. Dalej iduć pakarańni za parušeńni pašpartnaha režymu (44), normaŭ handlu (35), prodaž harełki niepaŭnahadovym (8). Cikava, što dźviuch maładzicaŭ pakarali za prastytucyju.
Andrej Kuźmin, Kryčaŭ
Srodki na kienhuru
Haradzienski zaapark choča nabyć pieršaha ŭ svajoj historyi kienhuru. Z hetaj metaj praviali adzin dzień akcyju pa zbory srodkaŭ. Dyrektarka zaaparku Celina Pahieryła dazvoliła naviednikam u hety dzień prychodzić u zaapark zadarma, zatoje zaklikała ich rabić achviaravańni na kienhuru. Adnak nieabchodnych 400 dalaraŭ sabrać nie ŭdałosia. Sabrany 141 tysiača rubloŭ, 137 bananaŭ, 60 apelsynaŭ, 4 kivi, 91 bochan chleba, 52 pački piečyva i 2,3 kili cukierak. Sabrany charč skormiać žyviole.
Pavodle BiełaPAN
Pucham darožka
Słonimskaja fabryka pucha-pierjevych vyrabaŭ, na jakoj pracujuć 290 čałaviek, budzie akcyjanavanaja z udziełam rasiejskaha kapitału.
Rasiejskaja firma “Soŭpoŭ” maje atrymać kantrolny pakiet akcyjaŭ fabryki. Sa słovaŭ dyrektara fabryki Ŭładzimiera Ivanaški, Biełaruś trapiła ŭ sferu dziejnaści hetaj firmy jašče raniej. Z udziełam “Soŭpoŭ” (što mieścicca ŭ Surhucie) akcyjanavanaja Mienskaja fabryka miakkaj cacki dy Ivianiecki zavod mastackaj kieramiki. Na čarzie — pradpryjemstvy ŭ Słonimie dy ŭ Kapyli.
Słonimski kalektyŭ prahałasavaŭ za akcyjanavańnie adzinahałosna. Ludzi spadziajucca, što buduć mieć zakazy na pradukcyju dy bolšyja zarobki. Dyrektar ža raźličvaje na finansavuju palohku z boku dziaržavy. Choć sioleta stan fabryki padušak i tak palepšaŭ. Siaredni zarobak rabočych — 70 000 rub.
Ci nia śviedki my taho, pra što niadaŭna papiaredžvaŭ Leanid Sinicyn? Jon kazaŭ, što našu majomaść pačnie chutka j za biescań skuplać rasiejski kapitał.
Raźbiŭsia “MiH”
«MiH-29» peruanskich vajenna-pavietranych siłaŭ raźbiŭsia padčas pakazalnaha palotu niepadalok ad vajennaj bazy Čykłajo, za 760 km na poŭnač ad stalicy Limy. Heta byŭ adzin z 18 samalotaŭ, nabytych u Biełarusi ŭ 1996 h. U vyniku karupcyjnaje afery jany abyšlisia Peru ŭ 762 młn. dalaraŭ pry realnym košcie 400 młn.
Pavodle Radyjo Svaboda
Spartovy tydzień
Viesnavoje sioje-toje
Usiaho para dzion zastałasia da prychodu futbolnaj viasny: u piatnicu moładzievaja zbornaja Biełarusi ŭ Kijevie paspaborničaje z ukraincami.
Na nastupny dzień na viesnavuju traŭku “Alimpijskaha” vyjduć nacyjanalnyja zbornyja. Hulnia ŭ Kijevie stanie pieršaj dziejaj viesnavoha spektaklu. Praz čatyry dni ŭ Miensku budziem bicca z narvežcami. Z 23 futbalistaŭ, jakija rychtujucca da razborak, tolki čaćviora hulajuć u nacyjanalnym čempijanacie, astatnija žyvuć za miažoj.
Na minułym tydni ŭpieršyniu ŭ historyi našaj krainy byli asudžanyja futbolnyja fanaty. Dva pradstaŭniki fan-klubu mienskaha “Dynama” atrymali pakarańnie (adzin asudžany ŭmoŭna, druhi praviadzie ŭ kalonii 3 hady dy 1 miesiac) za deboš u 1999-m na stadyjonie ŭ Barysavie, dzie mienčuki zajelisia z tamtejšymi milicyjantami dy vydzierli z paŭsotni plastykavych kresłaŭ (imi vielmi zručna špurlacca). Biedakuryli jany nia ŭdvuch, adnak kantora Femidy vyrašyła pa karku dać tolki dvum fuluhanam.
Baskietbalisty “Horadni-93” marać pra miesca ŭ prestyžnym turniry Paŭnočnaeŭrapiejskaj Baskietbolnaj Lihi. Dla ździajśnieńnia svaich mrojaŭ haradziency musiać pieramahčy ŭ adboračnaj padhrupie, hulni ŭ jakoj pačnucca praz tydzień u horadzie, ablubavanym kaliści Ściapanam Baturam. A na vieršalinie biełaruskaj baskietbolnaj jełki adbylisia pieraturbacyi. Prezydent federacyi Anańjeŭ padaŭ u adstaŭku. Na jaho miesca pastavili nia mienš baskietbolnaha čałavieka – pałkoŭnika KDB Pimienava.
Apošnim etapam kubku śvietu ŭ narveskim Chałmenkolenie zaviaršyŭsia bijatlonny sezon. Vadzim Sašuryn pa jahonych vynikach akazaŭsia 11-m. Takija vyšyni!..
Bohuś Bijatlanionak
naviny haspadarskija
Les zamiest… žyta?
Niečakanaściu minułaha tydnia stałasia źmianieńnie paradku abmienu najaŭnaj valuty. Ciapier abmiennyja punkty atrymali prava “specyjalizavacca”: adny vyklučna na nabyćci, druhija — na prodažy. Pry hetym bajacca takoha “padziełu”, maŭlaŭ, nia treba, bo novaje praviła datyčyć tolki niekatorych “abmieńnikaŭ”, jakija znachodziacca ŭ bujnych kramach i inšych ludnych miescach. Słovam, jakraz tam, dzie dahetul nabyć valutu było bolš-mienš realna.
Tymčasam dalar pieraskočyŭ čarhovuju płanku ŭ 1300 rubloŭ. Dziaržaŭnaja presa adrazu patłumačyła heta sakavickim rostam “minimałki”, ale, jak toje čaściakom zdarajecca, skazała nia ŭsio. U Biełarusi pačynajecca čarhovaje “zmahańnie za ŭradžaj”, jakoje nikoli nie abychodzicca bieź inflacyjnych achviaraŭ. Voś i ciapier hazety, radyjo i telebačańnie vybuchnuli admysłovymi dekretami ab “padtrymcy vioski”. Aproč pavyšeńnia h.zv. sielhaspadatku z pramysłoŭcaŭ, upieršyniu prahučali źviestki ab namiery pa zaviadzioncy apošnich hadoŭ dać kałhasam bankaŭskija kredyty. Praŭda, adnačasova śćviardžajecca, što sioleta kredytaŭ budzie nie chapać, a tamu tym ža kałhasam i saŭhasam “nastojliva paraili” šukać ułasnyja srodki. Biada tolki, jak pryznajucca aficyjnyja ekanamisty, “rezervaŭ” haspadarak nia chopić navat na vypłatu ścipłych zarobkaŭ, zapazyčanaści pa jakich z kožnym miesiacam praciahvajuć pavialičvacca ŭdvaja. I što rabić ź vioskaj, pa-raniejšamu “nia viedaje” nichto. Asabliva kali ŭziać pad uvahu, što da novaha chleba zastajecca prynamsi paŭhodu, a kałhasnyja karovy masava trapili “pad nož” jašče pazaminułaj zimoj.
Adnak što da sielskaj haspadarki, to nadzieja na niejkaje vyjście ŭsio ž jość. Viciebskija ahrarniki narešcie ŭhołas pryznali, što niama sensu apracoŭvać čverć ciapierašniaha voryva ŭ vobłaści, bo kolki ni ŭkładaj hrošaj u hetuju niaŭdobicu, usio budzie daremnym. Karaciej kažučy, čym štohod mieć chraničnyja straty, dyk lepš užo prosta pasadzić tut… les. Kali sprava tolki na kanstatacyi faktu nia spynicca, my sapraŭdy možam stać śviedkami “polskaha” varyjantu reformy. U Polščy, jak viadoma, daŭno navat nie sprabujuć ubirać kavałki žyta z uradžajnaściu da 15 centneraŭ — urešcie salarka abydziecca daražej.
Ale vioska z hoładu nie pamre i ŭ takich varunkach. Jašče adnoj sensacyjaj tydnia možna ličyć mierkavańnie navukoŭcaŭ, što adna tolki zamiena nasieńnia bulby na bolš jakasnaje zdolnaja pavialičyć jaje ŭradžajnaść u pryvatnym sektary krainy ŭ 2–3 razy. Jak vynik, z kožnaha hiektaru sielanin moža mieć da tysiačy dalaraŭ prybytku, što, niaciažka padličyć, adpaviadaje dvuchhadovamu “siaredniestatystyčnamu” zarobku ŭ kałhasie.
Siaržuk Ivanoŭski
