Piać za adno
Uładzimier Hančaryk, Siamion Domaš, Siarhiej Kalakin, Pavał Kazłoŭski i Michaił Čyhir na supolnaj presavaj kanferencyi paćvierdzili, što buduć uzajemadziejničać i ŭzajemadapamahać padčas padrychtoŭki da vybaraŭ. Chto budzie adzinym kandydatam z hetaj “piaciorki“, vyrašycca “paśla rehistracyi pretendentaŭ”.
U hetym pramarudžvańni z vyznačeńniem kryjecca pahroza. Pa-pieršaje, niama zhody ŭ vybary kryteraŭ dla vyznačeńnia adzinaha kandydata. Pa-druhoje, pretendenty z najmienšym admoŭnym rejtynham – Siamion Domaš i Pavał Kazłoŭski – staviacca adzin da adnaho davoli raŭniva.
Pavał Kazłoŭski na pres-kanferencyi zajaviŭ, što abjadnańnie pačynałasia z troch pretendentaŭ, a ciapier ich užo piać, «i heta vielmi dobra» – jaŭna namiakajučy na toje, što troje pieršych – centrysty, a voś dvoje novadałučanych (Domaš i Kalakin) – nie centrysty.
Padčas vybarčaj kampanii «piaciorka» moža pašyrycca. Piać pretendentaŭ nie vyklučajuć, što da ich mohuć dałučycca i inšyja. Rašeńnie ab pryjomie novych aljantaŭ budzie vynosicca sa zhody ŭsioj «piaciorki».
Pretendenty ŭ adzin hołas adznačali vialikuju značnaść rasiejskaha faktaru. Pry hetym adzin Domaš udakładniŭ, što usio ž na vybarach hałoŭnaje słova skaža nie Maskva, a biełaruski narod.
Pra los Łukašenki ŭ vypadku pieramohi na vybarach adnaho ź “piacioch” trapna vykazaŭsia Kalakin: “Budzie žyć”. A Domaš zapomniŭsia adkazam na pytańnie, jakim budzie jahony pieršy krok u jakaści prezydenta: pajedu, kaža, asabista ŭ turmu i vyzvalu deputata Klimava.
Kali kandydaty ad roznych palityčnych siłaŭ sapraŭdy ścišać svaje palityčnyja ambicyi i vyłučać z svaich šerahaŭ adnaho – taho, jaki najlepš padychodzić na rolu prezydenta ŭsich biełarusaŭ, abjadnalnika raskołataha hramadztva, – heta budzie abiacać nam sapraŭdnuju baraćbu ŭ vieraśni. Kali ž hetaha nie adbudziecca, značyć, našaja nacyja šče nie darosłaja.
Mikoła
