Prahrama Hančaryka
Dabro Vašamu domu!
Hazety “Źviazda” i Sovietskaja Biełoruśsija zdoleli adcenzuravać navat tuju mizernuju infarmacyju, jakuju kandydat ad apazycyi mieŭ prava nadrukavać u ich pavodle zakonu. Jany patłumačyli heta tym, što “ŭ tekst tezysaŭ byli... ŭklučany śćviardžeńni, jakija ŭtrymlivajuć ahulnuju i subjektyŭnuju krytyku inšych kandydataŭ u Prezydenty”. Heta nie pieraškodziła im pobač nadrukavać zajavu S.Hajdukieviča, dzie jon, nia strymlivajučy siabie ŭ vyrazach, ablivaje brudam U.Hančaryka. Drotavaja sietka “Biełaruskaje Radyjo” była adklučanaja ŭ niekatorych rajonach respubliki na čas apošniaha vystupu Ŭ.Hančaryka. Tamu my paličyli patrebnym koratka vykłaści tut asnoŭnyja pałažeńni prahramy adzinaha kandydata ad šyrokaj hramadzianskaj kaalicyi.
U.Hančaryk ličyć, što pieršačarhovaj prablemaj novaha prezydenta budzie ekanomika, a taksama pieraadoleńnie raskołu nacyi, abjadnańnie jaje. U.Hančaryk nie źbirajecca ŭsio łamać, kab potym adbudavać nanova. Pastupalny ruch pavinien iści na asnovie taho, što ŭžo isnuje.
Ekanomika
Siaredni zarobak u Biełarusi pavinien być nia 100, a 300 dalaraŭ. Ciapier jon nizki, bo, vypłočvajučy 1 rubiel zarobku, pradpryjemstva addaje dziaržavie 4 rubli ŭ vyhladzie padatkaŭ. Potym ździŭlajemsia, čamu “nichto nie pracuje”. Dla taho, kab ludzi dobra pracavali, im treba płacić. Heta asnoŭny zakon ekanomiki. Źnizić padatki, źniać usie pieraškody na šlachu da aktyŭnaści hramadzianaŭ i pradpryjemstvaŭ, stvaryć spryjalnyja ŭmovy dla pryciahvańnia investycyjaŭ — voś šlach da źmienaŭ biez uzrušeńniaŭ. Buduć skasavanyja ŭsie nieabhruntavanyja abmiežavańni – pačnuć raźvivacca ŭsie formy ŭłasnaści. Budzie stabilizacyja rubla. Usie hrošy pavinny być u biudžecie – prazrystym, kantralavanym nia tolki prezydentam, ale j parlamentam.
Pošuk źnikłych ludziej
Kažuć, što ŭ nas mocnaja ŭłada, a tut ludzi źnikajuć, i nia možam znajści. U takim vypadku albo hetaja ŭłada słabaja, albo jana sama maje dačynieńnie da źniknieńniaŭ, i tady vinavatych treba sudzić. Daśledavańnie hučnych spravaŭ i pakarańnie vinavatych – sprava honaru budučaha prezydenta.
Kanstytucyja
Treba zabiaśpiečyć niezaležnaść sudovaj ułady, dać svabodu vytvorcam, reabilitavać niezakonna abvinavačanych, zvolnienych. Dalej sapraŭdy možna budzie pravieści źmieny ŭ Kanstytucyju, abmiežavać uładu prezydenta i ŭzmacnić paŭnamoctvy parlamentu, adbudavać miascovaje samakiravańnie. Tolki paśla kanstytucyjnaj reformy možna pieraabrać parlament.
Symbolika
Dla pačatku treba pryznać bieł-čyrvona-bieły ściah i “Pahoniu” za nacyjanalnuju symboliku, a potym pracavać z hramadzkaj dumkaj, kab prymiryć usie punkty hledžańnia. Nielha dapuścić, kab źmiena dziaržaŭnaj symboliki znoŭ raskałoła hramadztva.
Movy
Nichto nikoha nie pavinien prymušać razmaŭlać ani pa-rasiejsku, ani pa-biełarusku, ale rodnuju movu troch čverciaŭ hramadzianaŭ krainy treba šanavać. Tamu na dziaržaŭnym uzroŭni pavinny być stvoranyja ŭsie ŭmovy dla taho, kab hramadzianin moh razmaŭlać, atrymlivać adukacyju, słuchać naviny jak na biełaruskaj, tak i na rasiejskaj movie.
Sajuz z Rasiejaj
Dobryja stasunki z Rasiejaj źjaŭlajucca vielmi važnymi dla našaj krainy. Hetyja stasunki treba raźvivać, palapšać. U pieršuju čarhu nieabchodny ekanamičny sajuz, bo za apošnija siem hadoŭ u ekanomicy my značna adstali. Adnosiny Rasiei j Biełarusi ŭ budučym musiać być siabroŭskija, partnerskija, u ramkach Kanstytucyi Biełarusi i na ŭmovach abarony ekanamičnych i palityčnych intaresaŭ Biełarusi, biaz straty niezaležnaści.
Adnosiny z Eŭropaj i Amerykaj
My pavinny adnavić davier i siabroŭskija adnosiny z Zachadam, vyvieści Biełaruś z tupiku izalacyi. My nie pavinny mieć vorahaŭ ani ŭ Eŭropie, ani ŭ Amerycy. Tam nichto nie čakaje nas z šyrokimi abdymkami, ale my hetaha i nie patrabujem. My paprostu budziem supracoŭničać, handlavać z usimi, chto hatovy da hetaha.
Čarnobylskaja prablema
U.Hančaryk za toje, kab viarnuć čarnobylskija ilhoty.
Medycyna
Z-za reštkavaha finansavańnia medycyna stałasia, faktyčna, płatnaj. Dziaržava abaviazanaja vyrašyć hetuju prablemu, zrabiŭšy miedycyn-skaje absłuhoŭvańnie jak dastupnym, tak i sučasnym. Važna pryniać taksama dziaržaŭnuju prahramu pa baraćbie z pjanstvam. Ale nie ŭ takim vyhladzie, jak u hady pierabudovy. Pjanstva niemahčyma zabaranić, ale možna prapanavać čałavieku žyćcio, zaniatki j intaresy, vartyja čałavieka.
Prahrama Ŭ.Hančaryka dapaŭniajecca padrychtavanym planam praktyčnych dziejańniaŭ budučaha ŭradu, jaki, u vypadku pieramohi Ŭ.Hančaryka, maje ŭznačalić Siamion Domaš. Bolš ab prahramie možna pračytać na Internet-sajcie www.goncharik.org
