Paciarpiełyja za Biełaruś
1 vieraśnia ŭ Navapołacku była zatrymanaja Marharyta Tamiłava – za toje, što išła pa vulicy z nakinutym na plečy bieł-čyrvona-biełym ściaham. U Bieraści milicyjanty źbili Siarhieja Vakulenku za pieradvybarnuju ahitacyju. U Rečycy zatrymali Natallu Brel i pasadzili ŭ SIZA. Jaje kvateru, a taksama kvatery Źmitra Ciarenćjeva i Kryściny Barbakadze pieratreśli. 2 vieraśnia ŭ Ašmianie zatrymali školnika Siarhieja Kanieŭku. 3 vieraśnia ŭ Słucku za raspaŭsiud specvypusku “Našaj Svabody” zatrymali “zubroŭca” Andreja Akułava. U Mahilovie za toje samaje zatrymali Alenu Łazaravu, a ŭ Salihorsku – “zubroŭcaŭ” Valerja Sierafimoviča, Alaksandra Makareviča, Siarhieja Panciajkova, Hleba Buchaŭca, Kiryłu Rabykina dy Valancina Biesmana. U Miensku zatrymali Ivana Sajeviča, na jakim była majka z vyjavaj “Pahoni” j nadpisam “Žyvie Biełaruś!”. U Baranavičach zatrymali siabra KCHP-BNF Jaŭhiena Daŭhiłoviča, jaki zaklikaŭ hałasavać suprać usich. U Miensku sprabavali zatrymać aktyvistku KCHP-BNF Śviatłanu Zacharevič, jakaja raspaŭsiudžvała pieradvybarnyja materyjały. Milicyju vyklikali ahitatary z łukašenkaŭskaha štabu. Za raspaŭsiud specvypusku hazety “Narodnaja Vola” zatrymany Pavał Znaviec, deputat Viarchoŭnaha Savietu. U Pinsku 5 vieraśnia zatrymali Alesia Vasiljeva, jaki raspaŭsiudžvaŭ specvypusk “Narodnaj Voli”. U Čerykavie była zatrymanaja Ludmiła Ramanienka, što ahitavała za Ŭładzimiera Hančaryka. 6 vieraśnia ŭ budynku KDB byŭ zatrymany Pavał Sieviaryniec, jakoha vyklikali tudy ŭ jakaści śviedki ŭ spravie vybuchu na terytoryi rasiejskaj ambasady. 6 žniŭnia ŭ Škłovie kvateru aktyvista apazycyjnaha ruchu sp.Ščarbaka pieratreśli. U Babrujsku zatrymali Irynu Kačan, Tacianu Maškoŭskuju i Vadzima Lisoŭskaha, jakija ahitavali za Hančaryka. U Viciebsku zatrymali Aksanu Filimonavu. U Červieni na vybarčym učastku zatrymali kaardynatara “Niezaležnaha Nazirańnia” Hienadzia Matusieviča. Jaho abšukali, dapytali, skanfiskavali zvarot da supracoŭnikaŭ MUS i adpuścili. U Miensku zatrymali kaardynatara “Niezaležnaha Nazirańnia” pa Savieckim rajonie Alaksandra Haliča za toje, što nazvaŭ staršyniu vybarčaj kamisii “niahodnikam”. Na jaho skłali pratakoł za drobnaje chulihanstva i źmiaścili ŭ pryjomnik-raźmierkavalnik.
Babrujsk u nadziejnych rukach
U minuły paniadziełak u kaledž, dzie navučajecca były staršynia Babrujskaj supołki Maładoha Frontu Valery Mackievič, patelefanavali z harvykankamu i zahadali razabracca ź im — jon, maŭlaŭ, pisaŭ u horadzie “Zabi prezydenta!”. Adnak, takich nadpisaŭ u Babrujsku nie było j niama, dyj Valery adyšoŭ ad dziejnaści jašče ŭ traŭni. U čaćvier, 6 vieraśnia, nieviadomy padpałkoŭnik milicyi abzvońvaŭ baćkoŭ maładzionaŭ, što kaliści “śviacilisia” na masavych akcyjach u Miensku ci ŭ Babrujsku, i prymušaŭ ich harantavać znachodžańnie dziaciej 9 i 10 vieraśnia ŭ rodnym horadzie.
B.T.
