Biełaruś praz 100 hadoŭ
Biaz dumak pra adlehłaść
Na miescy staroj Biełarusi zaraz Mienski trochkutnik. Takuju nazvu dali ŭ 2068 h. refarmatary Eŭraźviazu. Čamu ŭ asnovie nazva hieametryčnaj fihury, nieviadoma, ale tak va ŭsioj Eŭropie: Poznański paralełahram, Londanski avał...
Mienski trochkutnik daŭ dvuch čałaviek u muzej “100 vybitnych ludziej Eŭropy”. Piatrok Vieras byŭ kiraŭnikom Eŭraźviazu (heta jon prydumaŭ krainam hieametryčnyja nazvy). Barys Ščupak vynajšaŭ ruchaviki da aŭtasama (mašyna, što ruchajecca ŭ pavietry). Hety zvyšchutki transpart dazvalaje nia dumać pra adlehłaść. Ad Miensku da Varšavy 3 chviliny ruchu.
Harady zaniapali. U Miensku žyvie 240 tysiačaŭ čałaviek, pry nasielnictvie trochkutnika 21 młn. Jość jašče kolki drobnych miestaŭ. Tam u asnoŭnym žyvuć stałyja hramadzianie, jakim patrebna zaŭsiodnaja prysutnaść ludziej navokał. Moładź vybiraje pryrodu, svaju chatu.
Turystyčnyja miescy Biełarusi: Čarnobylskaje koła, Paleskija bałaty, muzej biełaruskich hazet la Pinsku. Hazety ŭ vialikich pamierach zrobleny z superplastyku. Tam jość pa adnym numary ŭsich 1124 biełaruskich hazet, što bačyli śviet u XIX i XX st. Asabliva cikava hladzieć z vyšyni. Mienavita źvierchu možna pračytać frazu: “Naša dola zasiavać Našu Nivu”.
Sfera ŭžytku hutarkovaj movy ŭ Eŭropie skaraciłasia. Z dapamohaj pieradatčyka dumak možna razumieć adno adnaho, nie adkryvajučy rota. Naprykład, dumaješ ty štości, siedziačy la Niomanu, a na Łabie z taboju spračajucca.
Siaredniaja praciahłaść žyćcia ŭ 2101 h. składaje kala 160 hod. Ale razam z tym vyrasła kolkaść samazabojstvaŭ. Syndrom “stomy žyćciom”.
Vialikaje ŭździejańnie na praciahłaść žyćcia maje ježa. Jana ŭjaŭlaje saboju kancentrat, jaki ŭtrymlivaje nabor patrebnych rečyvaŭ. Razbaviŭ u vadzie, vypiŭ — chapaje na ŭvieś dzień. Ale zachavalisia j restaracyi, dzie možna paspytać ježy luboha času i narodu. Ale ich nia tak šmat, i ježa ŭ ich davoli škodnaja, choć i smačnaja. Specyjalnaje naviedańnie restaracyi pryniesła niašmat zadavalnieńnia: “Draniki... Niaŭžo heta kaliści ličyłasia smačnym?!”
Siarhiej Konan, Žodzina
Novy prajekt “Našaje Nivy”
2101 hod. Jakoj budzie Biełaruś praz 100 hadoŭ? Jakoj budzie dziaržava i jaki dziaržaŭny ład? Jakimi buduć harady? Jaki horad budzie stalicaj Biełarusi? Jakimi miežy krainy? Što biełarusy buduć jeści? Jakimi buduć biełaruskija hrošy? Jakim transpart? Jakimi srodki masavaj infarmacyi? Jakaja litaratura budzie čytacca? Ci zastanucca teatry? Jakija imiony buduć samymi papularnymi? Jakimi stanuć lasy i reki? Ci možna budzie kupacca ŭ zabrudžanych siońnia aziorach? Jakija źviary źniknuć, jakija novyja raśliny zaviaducca? Što budzie z čarnobylskaj zonaj? U jakich cerkvach buduć malicca ludzi? Što jany viedaćmuć pra 2001 hod? Što budzie z nami?
Štotydnia — fantazii pra budučyniu Viečnaj Biełarusi, ese, prahnozy i futuralahičnyja artykuły ŭ rubrycy “Biełaruś praz 100 hadoŭ”. Z hetaha vyjdzie cełaja kniha! Čakajem Vašych dopisaŭ. Budziem zahadvać.
