Z usioj krainy
naviny haspadarskija
Try novyja stancyi metro — “Kamiennuju horku”, “Kuncaŭščynu” i “Rakaŭskuju” — planujuć adkryć na zachadzie Miensku ŭ 2003 h. Adpaviedna, uzdymiecca košt kvateraŭ u tych rajonach. A sioleta da ciahnikoŭ metro dadaduć jašče pa adnym vahonie.
Padvysilisia kamandzirovačnyja ŭ miežach Biełarusi. Kampensacyja za kožnyja sutki pavialičyłasia z 2500 da 3500 rub., za adnadzionnuju kamandziroŭku — z 1250 da 1750 rub., za noč na pryvatnaj kvatery — z 750 da 1050 rub.
Ilhotnyja kredyty na meblu i bytavuju techniku mohuć atrymać vypuskniki dziaržaŭnych navučalnych ustanovaŭ, što samachoć pajeduć pracavać u čarnobylskija rajony. Raniej kredyty davali tolki tym, chto jechaŭ tudy pa admysłovym raźmierkavańni.
Niamieckija marki na eŭra biełaruskija kamercyjnyja banki buduć mianiać tolki da 15 lutaha. “Biełarusbank” choča skončyć hetyja aperacyi ŭžo da 15 studzienia — na 10 dzion raniej, čym planavaŭ. Pryśpiešvańnie banki tłumačać tym, što treba da sakavika advieźci marki ŭ Niamieččynu dy pamianiać.
Padvysicca myta na ŭvoz u Biełaruś škła. Zaraz zbolšaha škło viazuć z Polščy, z-za čaho za apošnija dva hady cana na jaho źniziłasia na 40%. Ad hetaha paciarpieli biełaruskija vytvorcy.
Minfin stanie harantam kredytaŭ, što biaruć biełaruskija pradpryjemstvy ŭ Suśvietnym valutnym fondzie. Hetak raźličvajuć pryciahnuć u krainu novyja investycyi.
Kala 3,5 tys. firmaŭ u Biełarusi stvoranyja z udziełam zamiežnaha kapitału. Ichny abvieščany statutny fond kala 800 młn. dalaraŭ, a dola zamiežnaha investara ŭ im — kala 500 młn. dalaraŭ. Bolšaja častka pradpryjemstvaŭ (55,4%) mieścicca ŭ stalicy. Na Mienskuju vobłaść prypadaje 12,4%, na Homielskuju — 10,7%, na Viciebskuju — 7,1%, na Bieraściejskuju — 5,4%, na Mahiloŭskuju — 5,1%, na Haradzienskuju — 3,9%. Samymi bujnymi krainami-investarami źjaŭlajucca ZŠA (17,1%), Niamieččyna (16,2%), Niderlandy (13,4%), Vialikaja Brytanija (6,6%), Kipr (6,1%), Aŭstryja (3,8%).
Najbolšyja sumiesnyja pradpryjemstvy zajmajucca budaŭnictvam, vytvorčaściu elektraizalataraŭ, vydavieckaj spravaj i palihrafičnymi pasłuhami, drevaapracoŭkaj i vytvorčaściu praduktaŭ charčavańnia.
Z prybytku pradpryjemstvaŭ u biudžet Mienskaj vobłaści ciapier buduć adličać 1,5% na ramont hramadzkaha transpartu i 3,5% na raźvićcio sacyjalnaj sfery.
Padaraželi na 4% cyharety Haradzienskaj tytuniovaj fabryki. A mienski “Tytuń-Invest” padvysiŭ ceny na 6%. Tak što “Karona” budzie kaštavać nia mienš za 464 rubli.
Biełaruski enerhablok na rasiejskaj AES — pad Smalenskam, Kurskam abo Ćvierju — chočuć zbudavać našyja ŭradoŭcy. Hrošy jany spadziajucca ŭziać z supolnaha biudžetu Biełarusi j Rasiei. Ale pakolki apošni zbolšaha symbaličny, dalej za niapeŭnyja plany sprava pakul nie idzie. Miž tym dola impartovaj elektryčnaści zastajecca vialikaj. Letaś Biełaruś kuplała 25,3% ad usich enerhanośbitaŭ: 19,2% u Rasiei i 6,1% u Litvie. Zapazyčanaść za ich ciaham 2001 h. vyrasła z 23,5 da 27 młn. dalaraŭ.
Z kradziažom paliva ŭ saŭhasach i kałhasach Bieraściejščyny zmahajucca aryhinalna. Abłvykankam patrabuje, kab haspadary, što majuć traktary dy hruzaviki, brali kvitancyi na aŭtazapraŭkach, dzie nabyvajuć benzyn ci salarku.
Kiraŭnik Nacbanku Prakapovič paabiacaŭ, što pry kancy 2002 h. dalar nie pierakročyć miažy 1860 rubloŭ.
Siaržuk Ivanoŭski
Piacidzionki nia budzie
Nie paśpieli škoły Bieraściejščyny pierajści na piacidzionku, pra jakuju pisała “NN” u minułym numary, jak ź Ministerstva adukacyi pryjšoŭ zahad prypynić eksperyment da pačatku novaha navučalnaha hodu.
Źbirajuć podpisy
za Rachmańka
Bolš za tysiaču podpisaŭ sabrali na Baranavickaj filii Biełaruskaj čyhunki ŭ abaronu byłoha ministra Viktara Rachmańka. Ciapier padpisnyja listy nakirujuć ci prezydentu asabista, ci premjer-ministru. Padpisalisia navat manachi Žyrovickaha mužčynskaha klaštaru.
Rusłan Raviaka, Baranavičy
Kryčavu viernuty hierb
Kryčaŭski rajvykankam zaćvierdziŭ hierb Kryčava, padorany jamu jašče ŭ 1653 h. karalom Janam Kazimiram: u čyrvonym poli załaty katalicki kryž i srebny mieč. U pieršaj pałovie 80-ch u jakaści hierba była zaćvieržanaja vyjava kominaŭ miascovaha cementnaha zavodu. Pry kancy 80-ch ich źmianiŭ pałac kniazia Paciomkina, jakomu padaravała Kryčaŭ u kancy XVIII st. rasiejskaja imperatryca Kaciaryna II. Zaraz spraviadlivaść adnoŭlenaja. Novy hierb užo źjaviŭsia na pieršaj staroncy rajonki “Leninski klič”.
Andrej Kuźmin, Kryčaŭ
Mamy roznyja byvajuć
Žudasny vypadak adbyŭsia ŭ Astravieckaj rajonnaj bolnicy. 23-hadovaja miascovaja žycharka znachodziłasia na lačeńni z dvuma dzietkami. Jana nie paviedamiła lekaram, što ciažarnaja trecim, a tyja i nie zaŭvažyli. Žančyna naradziła niedanošanaje dzicia i, jak niepatrebnuju reč, vykinuła na śmietnik. Milicyja raźbiraje hety fakt. Ale ludzkaja dehradacyja vidavočnaja i biaź śledztva.
Tavarniakom u Litvu
Niezvyčajny sposab trapić u Litvu vybraŭ 14-hadovy žychar Ukrainy i jahonaja 19-hadovaja siabroŭka. Jany pajechali tudy sa stancyi Maładečna na sčapnym prystasavańni tavarnaha ciahnika. U Hudahai “sałodkuju paračku” zaŭvažyli pamiežniki. Juny turyst z abmaražeńniami ruk i noh apynuŭsia ŭ bolnicy, jahonaja siabroŭka — u sudzie.
M.V., Astraviec
Samazvaniec u ryzie
Sud Kastryčnickaha rajonu Miensku daŭ Alaksandru Siarhiejčyku, žycharu Ivaceviččyny, 7,5 hadoŭ turmy za “machlarstva ŭ asabliva vialikich pamierach”. Siarhiejčyk źjaviŭsia niejak u mienskim NDI traŭmatalohii i artapedyi ŭ śviatarskaj ryzie i prapanavaŭ pasłuhi pa vyhnańni duchaŭ z kabinetaŭ supracoŭnikaŭ. Pasypalisia zamovy. Śviatar lačyŭ ad suroku, vyhaniaŭ z kvateraŭ čartoŭ, navat hrašovyja banknoty ačyščaŭ ad “złoha”. Ź ciaham času supracoŭniki NDI zaŭvažyli, što malitvy nie dapamahajuć, i źviarnulisia ŭ prakuraturu.
Pavodle Biełorusskoj haziety
Na “Homsielmašy” zahinuŭ rabočy
Pazaŭčora ŭ doślednym cechu specyjalizavanaha kanstruktarskaha biuro “Homsielmašu” zahinuŭ 40-hadovy rabočy. Kryso vierchniaj vopratki (na pradpryjemstvie vielmi chałodna) trapiła ŭ baraban apracoŭčaha stanka i paciahnuła za saboj čałavieka.
Homiel uvodzić myta
Šeść pamiežnych z Ukrainaj rajonaŭ Homielščyny ŭvodziać mytny zbor. Pierajechać biełaruskuju miažu na lehkaviku budzie kaštavać 5 dalaraŭ, na hruzaviku — 10 dalaraŭ. Myt daść dadatkovyja hrošy rajonnym biudžetam. A staršynia Homielskaha abłsavietu Valery Sialicki rascaniŭ uviadzieńnie mytu admoŭna: “Heta nie pa-eŭrapiejsku, nie pa-sučasnamu”.
E.Ł.
Maškievič pryniaŭ žonak źnikłych
Učora pasoł Polščy ŭ Biełarusi Maryjuš Maškievič pryniaŭ žonak źnikłych biełaruskich palitykaŭ. Jany pieradali list da Alaksandra Kvaśnieŭskaha, u jakim prosiać polskaha prezydenta ŭźniać na sustrečy z Pucinym pytańnie pra źniknieńnie ŭ Biełarusi viadomych ludziej.
Pavodle “Ju.S.ńjus”
Mienskaha karespandenta NTV mohuć pazbavić akredytacyi
Biełaruś pieradała notu pratestu rasiejskamu MZS u suviazi z aśviatleńniem na NTV aryštu Michaiła Lavonava. Karespandent Pavał Sielin byŭ vyklikany ŭ MZS, dzie jamu byli vykazanyja pretenzii. Supracoŭnik presavaj słužby zapatrabavaŭ ad karespandenta prabačeńniaŭ “za źniavahu narodu Biełarusi i jejnaha prezydenta”. Sielin paraŭnaŭ aryšty biznesoŭcaŭ u Biełarusi z fabulaj detektyvu Ahaty Kryści “Dziesiać niehrycianiataŭ”. Maŭlaŭ, usie 15 deklaravanych prezydentam aryštaŭ iduć pa śpisie.
Chvastoŭ lacić da Kadafi
Delehacyja MZS na čale ź ministram Michaiłam Chvastovym 15—19 studzienia naviedaje Libiju, dzie adbudziecca pieršaje pasiadžeńnie biełaruska-libijskaj kamisii pa ekanamičnym, handlovym i navukova-techničnym supracoŭnictvie.
Unijacki śviatar naviedaŭ dysydentaŭ
Pazaŭčora Hienadzia Samojlenku i Ŭładzimiera Maleja, što adbyvajuć 15 sutak aryštu ŭ izalatary Leninskaha RUUS Bieraścia za ŭdzieł u “łancuhu nieabyjakavych ludziej”, naviedaŭ hreka-katalicki śviatar — pieradaŭ im duchoŭnuju i śvieckuju litaraturu, a taksama kaladny piroh. U kamery jon razam sa źniavolenymi pamaliŭsia.
Fiłaret piša pa-biełarusku
Mitrapalit Mienski i Słucki Fiłaret paprasiŭ, kab jahonyja pasłańni navat u rasiejskamoŭnych hazetach drukavalisia vyklučna pa-biełarusku. Voś “Narodnaja vola” nadrukavała “Kaladnaje pasłańnie”, a Sovietskaja Biełoruśsija “Raždžestvienskaje pasłańnie”. A nibyta dźviuchmoŭnaja “Respublika” nie pasłuchałasia Fiłareta i zhrašyła — nadrukavała jahonaje vinšavańnie pa-rasiejsku.
E.Ł.
paciarpiełyja za Biełaruś
Zavočna aštrafavanyja na 50 minimalnych zarobkaŭ (za chulihanstva) čatyry ŭdzielniki Maršu Svabody 17 kastryčnika 1999 hodu – Hierman Suškievič, Hleb Dohil, Andrej Vałabujeŭ, Anton Łazaraŭ, jakija zaraz znachodziacca ŭ Polščy, dzie atrymali status palityčnych uciekačoŭ. U Bieraści pazbaŭleny pasady kiraŭnik dziaržaŭnaj nasiennaj inspekcyi ŭ Bieraściejskim rajonie Hieorhi Rucki, jaki źjaŭlajecca staršyniom haradzkoj arhanizacyi BSDP “Narodnaja Hramada”. Homielski sud vyrašyŭ skanfiskavać na karyść dziaržavy kamputarnuju techniku niezaležnaj arhanizacyi “Hart”, na jakuju nie było naležnych dakumentaŭ. Kiraŭnik arhanizacyi Siarhiej Adziniec aštrafavany na miljon rubloŭ. Jany źbirajucca padavać apelacyju ŭ sud. Za ŭdzieł u akcyi “łancuh nieabyjakavych ludziej”, što prajšła 9 śniežnia ŭ Bieraści, Siarhiej Aleksiajevič, Raisa Antaniuk, Vasil Barbolin, Mikałaj Kazimirčyk, Siarhiej Kazłoŭ, Alžbeta Karpiuk, Maryja Klimovič, Michaił Mikałajuk, Palina Panasiuk pakaranyja štrafam 20 minimalnych zarobkaŭ. Uładzimier Malej i Hienadź Samojlenka atrymali 15 sutak administracyjnaha aryštu. Mahiloŭski sud pastanaviŭ skanfiskavać na karyść dziaržavy arhtechniku abłasnoj filii Abjadnanaj hramadzianskaj partyi. Kiraŭnik Mahiloŭskaj abłasnoj arhanizacyi AHP Viktar Šancaŭ aštrafavany na 100 minimałak.
