Z usioj krainy
Sam sabie mytnia
U Baranavičach zatrymany biznesoviec, jaki zajmaŭsia padrobkaju dakumentaŭ. U jaho vyjavili dziasiatki roznych piačatak i štempelaŭ, formy paśviedčańniaŭ ab rehistracyi transpartu, dyplomy ab vyšejšaj adukacyi, sertyfikaty jakaści i šmat inšych dakumentaŭ. Aficyjna firma hetaha biznesoŭca zajmałasia reklamaj, ale, jak śćviardžajuć śledčyja, nielehalna tamaka stavili piačatki MUS, transpartu, mytni, medustanovaŭ i naahuł handlavali hatovymi dakumentami.
Rusłan Raviaka, Baranavičy
Prusaki ŭ łaźni
Sapraŭdnaje našeście prusakoŭ nazirajecca ŭ saŭnie na vuł.Hohala, 65 u Bieraści. Ulubionaje ichnaje miesca — žanočaja pieraapranalnia. Jany nia tolki siadziać u šafkach, ale j załaziać u adzieńnie j kasmetyčki.
I.Chviedarovič, Bieraście
Zatrymka pensijaŭ
Da taho, što zarobki ŭ Śvietłahorsku vypłačvajucca ź miesiačnym spaźnieńniem, lud našaha horadu pryzvyčaiŭsia. Navat samyja rašučyja kabiety ź liku medykaŭ dy nastaŭnic, jakim da 8 sakavika nia vydali hrošaj, nie aburalisia. I voś 9 sakavika svaich pensijaŭ nie atrymali śvietłahorskija pensijanery. Hrošy im vypłacili tolki 14-ha, z zatrymkaju na piać dzion. Ludzi zabylisia ŭžo, kali takoje było. Usie apošnija hady pensii vypłačvalisia spraŭna. I raptam zatrymka na cełych piać dzion.
Vadzim Bołbas, Śvietłahorsk
Vydaviectva ŭ Ašmianie
Vydańniem knih i časopisaŭ pa historyi i kultury budzie zajmacca “Vydavieckaja inicyjatyva Piatra Javidoviča”, jakaja paŭstała ŭ Ašmianie. Užo padrychtavana da vypusku vydańnie pra Eduarda Korzuna — krajaznaŭcu-nastaŭnika, jaki pryśviaciŭ žyćcio Halšanam. Hetamu ž miastečku budzie pryśviečanaja nastupnaja kniha “Vydavieckaj inicyjatyvy”.
Vitaŭt Rudnik, Horadnia
Škoła raźbiaroŭ
U Aršanskim muzei Siamiona Šaŭrova dziaciej iznoŭ vučać majsterstvu raźby pa drevie. Muzej byŭ adčynieny ŭ 1992 h., jašče pry žyćci narodnaha majstra, u byłym jahonym domie. Tam była nia tolki ekspazycyja tvoraŭ, ale j majsternia. Dva hady tamu majstar pamior, i majsternia peŭny čas pustavała. A ciapier dziejnaść hurtka adnaviłasia. Zaniatki viadzie vučań Šaŭrova Ihar Bałachanaŭ. Pakul u hurtku zajmajecca šaściora dziaciej, zaniatki adbyvajucca ŭ aŭtorki z 14-j da 17-j. Zapisacca ŭ hurtok možna pa t. 6-24-36 u Voršy.
Tvory pra Viciebščynu
Na Viciebščynie abvieščany konkurs litaraturnych zbornikaŭ, pryśviečanych rodnamu kraju. Litaraturnyja tvory pavinny być pryśviečanyja rajonu abo horadu. Da ŭdziełu ŭ konkursie prymajucca taksama pieśni ŭ aŭdyjozapisach. Układalniki troch najlepšych zbornikaŭ atrymajuć kaštoŭnyja padarunki ad viciebskaha adździaleńnia Fondu Sapiehi i hramaty ad Viciebskaha abłasnoha abjadnańnia pazaškolnaj pracy, a najlepšyja materyjały ŭvojduć u zbornik. Tvory na konkurs možna dasyłać da 1 listapada na adras adździełu biełarusaznaŭstva Viciebskaha abłasnoha abjadnańnia pazaškolnaj pracy: Viciebsk, pr.Frunze, 94, p.328-329.
Michał Čarvinski, Viciebsk
Markieviča kanfiskujuć
Kastryčnicki sud Horadni pryznačyŭ na 11-ju ranicy 21 sakavika prymusovuju kanfiskacyju majomaści Mikoły Markieviča, hałoŭnaha redaktara “Pahoni”. Sudździa Žuk matyvavała heta tym, što termin upłaty 500 tys. rubloŭ štrafu za ŭdzieł u niesankcyjavanym pikiecie skončyŭsia. 11 lutaha sudovy vykanaŭca Mielnikava apisała ŭ kvatery Markieviča mikrachvalevuju piečku, pralnuju mašynu, pras, pyłasos, manitor, klavijaturu i prynter. Heta i planujuć zabrać 21 sakavika. “Siłavuju padtrymku” musić zabiaśpiečyć narad milicyi, a ŽES №20 pryšle svaich ludziej, kab, pry patrebie, adamknuć dźviery.
Pavodle www.pahonia.com
Źbiŭsia z kursu “XVI partźjezd”
Navat u lepšyja hady nacyjanalnaha Adradžeńnia ŭ słuččan-viaskoŭcaŭ nia vyśpieła žadańnia pamianiać nazvy svaich kałhasaŭ i saŭhasaŭ ź imionami Lenina, Kirava, Ardžanikidze, Dziaržynskaha. U apošnim pierad kantoraj dahetul vysicca vaśmimetrovy hipsavy “žalezny Feliks”. Kali j źnikaje jakaja nazva, dyk z ekanamičnych pryčynaŭ. Tak, niadaŭna ladaščy kałhas “XVI partźjezd” (ź jakoha pačałasia masavaja kalektyvizacyja), byŭ dałučany da ekanamična tryvałaha saŭhasu “Słucki”, što specyjalizujecca na adkormie bujnoj rahataj žyvioły. Kałhas-niaŭdačnik “MOPR” (paźniej — “Pieramoha”) hadoŭ dziesiać tamu pieradali kałhasu “Bieličy”, što za 40 km ad jaho. Ad takoha “šlubu” mopraŭcy žyć lepiej nia stali.
Michaś Tyčyna, Słucak
