Sieviaryniec — Sarančukoŭ
U niadzielu, 16 červienia, adbudziecca IV Sojm “Maładoha frontu”. Na pasadu kiraŭnika arhanizacyi pretendujuć dziejny staršynia Pavał Sieviaryniec i kiraŭnik Haradzienskaj abłasnoj arhanizacyi Vadzim Sarančukoŭ. Pretendenty adkazvajuć na pytańni “NN”.
“NN”: Jakim kaštoŭnaściam musić addavać pieravahu “Małady front” – demakratyčnym, chryścijanskim ci nacyjanalnym?
Pavał Sieviaryniec:
“Małady front” — heta demakratyčny ruch, jaki hruntujecca na nacyjanalnaj idei j chryścijanskich pryncypach. Usia zachodniaja cyvilizacyja, u jakuju my imkniomsia, žyvie ŭ hetaj niepadzielnaj, uzajemaźviazanaj i harmaničnaj systemie kaardynataŭ: nacyjanalnaja dziaržava, chryścijanskija kaštoŭnaści, demakratyčny ład. Mienavita ich sukupnaść i jość sutnaściu palityki “Maładoha frontu”.
Vadzim Sarančukoŭ:
Ja — biełaruski nacyjanalist. Nacyjanalnaja kultura pieradaje mnie chryścijanskuju maral, a nacyjanalnaja historyja vučyć svabodzie. Boh! Honar! Ajčyna! — niama čaho adździalić.
“NN”: Chto źjaŭlajecca dla Vas aŭtarytetam u palitycy i žyćci?
Ja vieru ŭ Boha, i tamu dla mianie Aŭtarytet i Ideał jak u žyćci, tak i ŭ palitycy — Isus Chrystos. U asobnych prafesijnych sferach ja zvažaju na aŭtarytet šmat jakich ludziej: baćkoŭ, siabroŭ, znajomych, viadomych. Viadoma, na Vasila Bykava ŭ prozie, na Zianona Paźniaka ŭ idealohii, na Viačasłava Siŭčyka jak arhanizatara, Vincuka Viačorku jak filolaha i h.d. Siarod histaryčnych asobaŭ dla mianie ŭzory — apostał Pavał i Marcin Luter, Abraham Linkaln i Šarl de Hol, Francišak Skaryna j Mikałaj Radzivił Čorny. Siarod sučaśnikaŭ — Jan Pavał II, Ronald Rejhan, Marharet Tetčar, ajciec Alaksandar Mień, Aleś Adamovič — ludzi viery j dziejańnia, sapraŭdnyja duchovyja, hramadzkija j palityčnyja lidery.
Nia varta, napeŭna, nazyvać proźviščy palitykaŭ. Hałoŭnaje dla palityka — maralnaść. Na majo maralnaje i nacyjanalnaje vychavańnie vialiki ŭpłyŭ zrabili tvory Karatkieviča, ja zachaplajusia hetym hienijem Biełarusi. Što ž da žyćciovaha prykładu, dyk heta, biezumoŭna, maje baćki! Takoj sile voli, jakaja jość u majoj maci, i ŭpartaści ŭ dasiahnieńni mety (heta pra baćku) moh by pazajzdrościć kožny.
“NN”: Pa jakoj akruzie Vy źbirajeciesia balatavacca na miascovych vybarach?
Ja nia maju namieraŭ balatavacca na miascovych vybarach. Pa-pieršaje, u mianie viciebskaja prapiska, a kiravać “Maładym frontam” treba ź Miensku. Pa-druhoje, realnych vybaraŭ nia budzie. Maksymum — budzie mahčymaść adnosna lehalna sustrakacca ź ludźmi. Voś pracavać ź ludźmi źbirajusia — i nie ŭ jakojści adnoj akruzie, a ŭ dziasiatkach haradoŭ i miastečak, kudy planuju źjeździć da viasny. Pa-treciaje, zamiest “vybaraŭ” całkam vierahodny łukašenkaŭski referendum abo niejki “intehracyjny akt” — treba być hatovym da niečakanaha razvarotu padziejaŭ. MF budzie ładzić siarod moładzi admysłovuju kampaniju pad miascovyja vybary.
Ja budu balatavacca ŭ Horadni — horadzie, dzie prajšli 22 hady majho žyćcia, dzie ja viedaju kožny zavułak, dzie ŭsie znajomyja. Ja budu balatavacca jak siabar Partyi BNF. Ciapier bolej nijakich padrabiaznaściaŭ...
“NN”: Jakuju muzyku Vy słuchajecie?
Mnie padabajecca meladyčnaja j rytmovaja muzyka — art-rok, chevi-metał, rok-apracoŭki klasyki, balady, bardaŭskija śpievy. Lublu mocnyja ŭdarnyja, elektrahitary j klavišy sa skrypkami, opernaje soła j charavyja padpieŭki, usialakija navaroty, kštałtu zapiłaŭ, efektaŭ ci partyi arhanu. Ź biełaruskaha heta “Miascovy čas” pačatku 90-ch, naturalna, “NRM”, “Ulis”, “Novaje nieba”, najlepšyja chity “Pieśniaroŭ”, “Ja naradziŭsia tut”, “Narodnaha albomu” j “Śviatoha viečaru”, sioje-toje ź Mielnikava j Šałkieviča. Z zamiežnaha — Bon Džovi, “Metallica”, “Queen”, “Scorpions”, “Offspring”, “Okiean Elzi”, “Kally Family”.
Mnie padabajecca “Bonda”, “Stary Olsa”, “Novaje nieba”, supolnyja prajekty (“Narodny albom”, “Lehiendy Vialikaha Kniastva”), z zadavalnieńniem słuchaju hurty “Metallica”, “The Cranberries”.
“NN”: Jakija hazety čytajecie, jakoje radyjo słuchajecie, jakija teleprahramy hledzicie?
Prahladaju asnoŭnyja niezaležnyja hazety — ad “Narodnaj voli” j “BDH” da “Kamsamołki”. Naturalna, “Naša Niva”. Čas ad času kuplaju “Sovietskuju Biełoruśsiju”, “Źviazdu”, “Iźviestija”, “Belarus Today”. Kali byvaju ŭ rehijonach — haradzkija hazety j rajonki. Za radyjo saču ŭ asnoŭnym praź Internet (“Svaboda”, “Racyja”) plus sajt BiełaPANu. U Viciebsku łaŭlu eter, darečy, pryjmač vyjhraŭ kaliści na konkursie listoŭ Polskaha radyjo. Hladžu naviny — NTV, ORT, “Viesti”. BT biez Azaronka, Zimoŭskaha j Kazijatki ŭžo niecikavaje. Časam, kab adpačyć, — “Pieršy muzyčny”, chitovaje kino, KVK ci intelektualnyja telehulni.
Prahladać imknusia ŭsiu presu, ale čytać... chiba “Pahonia”, z redakcyjaj jakoj u mianie dobryja adnosiny, i “Naša Niva”. Ciapier voś da “Pahoni” tolki na sajt dy na sud. Z radyjo dy TB składaniej: brakuje času, atrymlivajecca pahladzieć dy pasłuchać vyklučna prahramy navinaŭ.
“NN”: Za jakuju zbornuju Vy chvarejecie na čempijanacie śvietu pa futbole?
Pachvareješ tut z našym BT… Mnie najbolš padabajecca futboł klasnych eŭrapiejskich kamandaŭ — zbornych Vialikaj Brytanii, Hišpanii, Partuhalii, Niamieččyny. Ale anhielcam zaŭždy nie šancuje, hišpancam usio brakuje dobraha trenera, partuhalcy hulajuć nadta pryhoža, kab stać čempijonami, a niemcy… Na žal, niemcy pavinnyja prajhrać, kab da vosieńskich federalnych vybaraŭ upali šancy sacyjał-demakrata Šrodera. Tamu budu chvareć suprać zbornaj Rasiei — takaja ŭžo našaja nacyjanalnaja chvaroba. Pakul zbornaja Biełarusi nia ŭdzielničaje ŭ čempijanacie, ja chvareju prosta za dobry, pryhožy futboł.
