Naviny haspadarskija
NA TYSIAČU ŽYCHAROŬ Biełarusi prypadaje 2,7 pradprymalnickaj struktury. U Rasiei — 6, u Eŭraźviazie — 30, u ZŠA — 74.
CENY Z PAČATKU HODU padvysilisia na 19,3%. Najbolš padaraželi žyllova-kamunalnyja pasłuhi (86%), transpart (36,6%), pasłuhi achovy zdaroŭja (26,9%) i słužby pobytu (25,4%).
MIŽHARODNiJa AŬTOBUSY padaraželi. Ciapier kilametar u “ahulnych” aŭtobusach kaštuje 25,2, u miakkich — 28,5, u dadatkovych — 38,5, u ekspresnych — 42,8 rub.
SACYJALNYJA PLASTYKAVYJA KARTKI choča ŭvieści Nacbank. Pa ich možna budzie apłačvać ilhotny prajezd, atrymlivać źnižki ŭ kramach, zdymać pensiju ŭ bankamacie. Pieršymi sacyjalnyja kartki atrymajuć žychary Bieraściejščyny.
NIEPRADADZIENAJ PRADUKCYI na biełaruskich pradpryjemstvach naźbirałasia ŭ siarednim 75% ad miesiačnaha pakaźniku vytvorčaści. Zapasy kavalska-presavych mašynaŭ składajuć 4,5, matacykłaŭ — 3, hadzińnikaŭ — 2,7, škarpetak — 2 miesiačnyja zapasy.
AB'JOM PIERAPRACOŬKI nafty na “Naftanie” źmienšyŭsia ŭ 1,6 razu. Tłumačycca heta rezkim skaračeńniem pastavak z Rasiei.
URAD ADTERMINUJE vypłatu raniejšych zapazyčanaściaŭ pa padatkach mienskamu matornamu i traktarnamu, klimavickamu likiora-harełačnamu dy inšym zavodam. Ilhotu atrymajuć tolki tyja pradpryjemstvy, što spraŭna płaciać padatki sioleta.
PRADPRYMALNIKAŬ zmusiać addavać 36% dachodu ŭ pensijny fond. Pakul pensijnyja składki dla pryvatnikaŭ dobraachvotnyja.
5-PRACENTNY miascovy zbor na turystyčnyja pasłuhi i pasłuhi salonaŭ uvodziać z 1 lipienia ŭ Bieraści. Tyčycca jon turystyčnych firmaŭ, kamputarnych, šlubnych i fotasalonaŭ, biljardnych klubaŭ.
KAB ABARANIĆ abjekty intelektualnaj ułasnaści (navukovyja raspracoŭki, mastackija tvory, handlovyja znaki) ad vyvazu z terytoryi krainy, ich aŭtary musiać napisać zajavu i zapłacić 20 eŭra. Praŭda, spačatku tvory daviadziecca ŭnieści ŭ mytny rejestar — heta budzie kaštavać jašče 300 eŭra.
MIENSKI AŬTAVAKZAŁ “Centralny” pačnuć rekanstrujavać u 2004 h. Tut pabudujuć šmatuzroŭnievy parkinh i handlovy centar.
100 NOVYCH AŬTOBUSAŬ MAZ kupić sioleta Miensk. Letaś kupili bolej — 170.
AŬTOBUS Z HORADNI Ŭ ADESU puścili ŭ piatnicy. Jechać jon budzie praź Miensk, Homiel, Čarnihaŭ i Kijeŭ.
ASFALT I BETON pačnie vyrablać u volnaj ekanamičnaj zonie “Miensk” akcyjanernaje tavarystva “Paselspecbud”. Asnoŭny kapitał tavarystva — niamiecki.
S.I.
Mahčymy deficyt benzynu
Za apošnija dva miesiacy ceny na benzyn u Biełarusi padvyšalisia čatyry razy. Paśla apošniaha padaražańnia samaja jakasnaja marka AI-95 stała kaštavać 740 rubloŭ (0,41 dalara) za litar. Całkam mahčyma, što i hety taryf nieŭzabavie budzie pavyšany.
Niebiaśpiečnaje dla našych aŭtamabilistaŭ nie padvyšeńnie cenaŭ, a mahčymy peŭny deficyt benzynu ŭ žniŭni-vieraśni. Rasiejskim eksparteram nafty robicca ŭsio mienš vyhadna pastaŭlać svaju pradukcyju ŭ Biełaruś z-za taho, što pastaŭki siudy ažyćciaŭlajucca pa nižejšych cenach, a voś padatki i zbory prychodzicca spłačvać vyšejšyja. Im łaćviej ekspartavać jaje na Zachad, u inšyja krainy SND, pradavać na ŭnutranym rynku.
Pierapracoŭvać svaju naftu paśla niadaŭniaha pavyšeńnia ekspartnych pošlinaŭ rasiejskija kampanii taksama starajucca ŭ Rasiei. Kali da niadaŭniaha času mnohija ź ich mierkavali ŭvajści na biełaruski rynak, nabyŭšy kantrolny pakiet akcyj biełaruskich NPZ, dyk ciapier u kampanijach panuje niapeŭnaść. A našyja ŭłady jašče j planujuć uvieści dadatkovyja padatki na raźvićcio sportu — pa dva dalary z kožnaj tony nafty, što ŭvozicca na pierapracoŭku.
S.P.
Manapolija na strachavańnie
Abaviazkovaje strachavańnie hramadzianskaj adkaznaści ŭładalnikaŭ transpartnych srodkaŭ budzie, vidać, pieradadzienaje ŭ ruki “Biełdziaržstrachu”.
Dniami Alaksandar Łukašenka paŭtorna daručyŭ uradu razhledzieć prapanovy svajho pamočnika pa ekanamičnych pytańniach Siarhieja Tkačova, jakija tyčacca “adziaržaŭleńnia” hetaje haliny strachavańnia. Tkačoŭ u svajoj analityčnaj zapiscy nastojvaje na tym, što ŭ pierachodny peryjad dziaržava musić sama vystupać u jakaści lakamatyva raźvićcia rynku strachavych pasłuh. A pryvatnym kampanijam Tkačoŭ raić “raźvivać novyja vidy strachavańnia”, davodziačy svaju pradprymalnaść. Niezaležnyja strachoŭniki ŭ takoj nastojlivaści bačać pradprymalnaść samoha Tkačova: nadta ŭžo prybytkovaja štuka abaviazkovaje strachavańnie.
Pošliny na inšamarki nia vyrastuć
Z 1 lipienia mytnaje zakanadaŭstva Biełarusi i Rasiei musić, pavodle damovaŭ, unifikavacca amal całkam. Adnak razychodžańni pa niekalkich dziasiatkach nazvaŭ tavaraŭ usio ž zastajucca. Siarod ich — patrymanyja impartnyja aŭtamabili, pošliny na jakija ŭ Biełarusi pakul nia źmieniacca. Choć u perspektyvie, kali Biełaruś macniej pryčepiać da ŭschodniaje susiedki, mahčyma, staŭki ŭsio-taki buduć pavialičanyja.
S.P.
