Jelcynski precedent
Barys Jelcyn pryjechaŭ u Biełaruś, kab viarnuć sabie stračanuju palityčnuju vahu. A Siamion Domaš na minułym tydni, naadvarot, aficyjna padaŭ u adstaŭku z pasady staršyni “Haradzienskaj inicyjatyvy”.
Hety krok nie nazavieš niečakanym: užo amal hod jon nia braŭ udziełu ni ŭ palityčnaj, ni ŭ hramadzkaj dziejnaści. Jak schapiŭ jaho infarkt pierad vybarami, hetak jon i źnik. Chvaroba pazbaviła Domaša abaviazku brać udzieł u mlavaj kampanii Hančaryka. Na niejki čas jon źnik z pola zroku žurnalistaŭ. I kali niejki reparcior adšukaŭ Siamiona Domaša ŭ bolnicy, toj choraša raspaviadaŭ, što “treba lačycca, kab dobra vylečycca”. Niekatoryja mierkavali tady, što chvaroba Domaša była “dyplamatyčnaj”.
Ludzi, blizkija da Domaša, śviedčać: heta nia tak. Naadvarot, paśla intryhanskaha vyłučeńnia “adzinaha kandydata”, paśla biassłaŭnaje parazy 9 vieraśnia Domaš złamaŭsia. Ad kryŭdy na partyi, jakija tak lohka zdradzili tamu, kaho tak doŭha namaŭlali ŭklučycca ŭ palityku. Ad kryŭdy na hramadzkija inicyjatyvy, jakija napavier akazalisia na čverć absadžanyja aferystami i abibokami. Z paślavybarčaj depresii Domaš nia moža vyjści dahetul.
A serca ŭ jaho papraviłasia. Kali minułaj vosieńniu jahonyja paplečniki chacieli na paślavybarčym uzdymie stvaryć vakoł Domaša j “Rehijanalnaj Biełarusi” novuju partyju ci ruch, prajekt tak i zastaŭsia na papiery. Domaš zhody nia daŭ. Uviesnu jon užo sam pasprabavaŭ razharnuć hety prajekt. Dy ničoha nie ŭdałosia: nia stała byłoha entuzijazmu, u adsutnaść lidera zusim rastali srodki.
Sam palityk u kamentary dla “NN” adznačyŭ, što jon, choć i syšoŭ z pasady kiraŭnika “Haradzienskaj inicyjatyvy”, zusim pakidać hramadzkuju dziejnaść nie źbirajecca. U adstaŭku jon idzie, bo, u adroźnieńnie ad bolšaści siabroŭ abjadnańnia, nia bačyć sensu va ŭdziele ŭ vybarach u miascovyja orhany samakiravańnia j nia budzie brać u ich udzieł. Dyk nia choča zaminać.
Razam z Domašam “Haradzienskuju inicyjatyvu” pakinuŭ jaho namieśnik, prafesar medycyny Aleś Astroŭski. “Inicyjatyva” ad 1999 h. abjadnoŭvała try dziasiatki partyjaŭ, hramadzkich arhanizacyjaŭ i inicyjatyvaŭ, prafźviazaŭ. Astroŭski byŭ blizki da Domaša. Razam z Uładzimieram Kudzinavym i Andrejem Kusielčukom letaś u lipieni jon da apošniaha pierakonvaŭ Domaša nie zdymać svajoj kandydatury. Aleś Astroŭski źbirajecca pryśviacić siabie raspracoŭcy idealahičnaje platformy apazycyi i hatovy dla hetaha ŭtvaryć novuju hramadzkuju arhanizacyju. Były deputat-palitviazień Uładzimier Kudzinaŭ emihravaŭ va Ŭkrainu. Žyvie tam u Krymie, pačynaje svaju spravu. Andrej Kusialčuk, były redaktar “Głosu znad Niemna”, paśla — pres-sakratar Domaša, rychtuje da zapusku internet-partał Horadni. Choča, kab jon vyjšaŭ nia horšy za ŭžo isny analahičny partał Bieraścia.
Chto stanie novym kiraŭnikom “Inicyjatyvy”, pakul nia vyznačana.
Domaš pajšoŭ u biznes. Čaho zyčym i mnohim našym palitykam.
Biznesam nia hrebuje i Jelcyn. Spravy “siabroŭ” byli hałoŭnaj metaj vizytu cara Barysa ŭ Biełaruś. Jon pryvioz prapanovu dałučyć našu avijakampaniju “Biełavija” da rasiejskaha “Aeraflotu”.
Jelcyn lubiŭ i lubić uładu. U svaje hady jon by jašče nie admoviŭsia zaniać pasadu kiraŭnika sajuzu Rasiei j Biełarusi. A ŭłada lubić tych, chto jaje prahnie.
Aleh Tačony
