Zvarot Asłana Maschadava
Adkryty list prezydenta Čačenskaj respubliki Ičkieryja Asłana Maschadava, jaki jon dasłaŭ prezydentam i premjer-ministram krainaŭ “Vialikaj vaśmiorki”, u tym liku Ŭładzimieru Pucinu i Michaiłu Kaśjanavu
Prezydenty i premjer-ministry, napiaredadni vašaj sustrečy na najvyšejšym uzroŭni ŭ Kananaskisie ja pišu, kab pryciahnuć vašu ŭvahu da trahiedyi ŭ Čačenii j zaklikać vas zrabić usio mahčymaje, kab skončyć hetuju biessensoŭnuju vajnu.
U tuju piatnicu ŭ liście da prezydenta Pucina ja paćvierdziŭ našuju hatovaść raspačać nieadkładnyja kroki da mirnaha vyrašeńnia rasiejska-čačenskaha kanfliktu i prapanavaŭ prypynić bajavyja dziejańni z 15 lipienia 2002 h. Bolš za toje, dla papiaredniaha abmierkavańnia ŭsich pytańniaŭ ja prapanavaŭ prezydentu RF U.Pucinu ŭznavić kantakty miž našymi pradstaŭnikami Viktaram Kazancavym i Achmiedam Zakajevym.
Ja peŭny, što heta prapanova moža zrabicca pieršym praktyčnym krokam na šlachu mirnaha raźviazańnia kanfliktu i pakłaści pačatak vypraŭleńniu trahičnych chibaŭ u rasiejska-čačenskich adnosinach. Dalejšyja sproby vyrašyć kanflikt zbrojaj adno pavialičać kolkaść achviaraŭ i pahłybiać rasiejska-čačenskija supiarečnaści.
Hetaja prapanova – šaniec dla Rasiei j Čačenii, šaniec miru, demakratyi i praćvitańnia. I jon, ja spadziajusia, nia budzie zmarnavany. Tamu ja prašu vas pierakanać prezydenta Pucina pryniać hetuju prapanovu. Bolš taho, ja zaklikaju vas spryjać nam usimi mahčymymi srodkami ŭ našym namahańni skončyć hetuju doŭhuju, žorstkuju i biessensoŭnuju trahiedyju.
Vajnu možna skončyć tolki adnym sposabam – zrabić realny krok da palityčnych pieramovaŭ. A hety praces patrabuje ŭdziełu šyrokaj mižnarodnaj supolnaści.
Z pavahaj, Asłan Maschadaŭ,
prezydent Čačenskaj respubliki Ičkieryja
