Cisnuć z usich bakoŭ
Nižniaja pałata parlamentu ZŠA atrymała na razhlad tekst zakonaprajektu “Akt ab demakratyi ŭ Biełarusi”. Jaho prapanavaŭ sustaršynia Chielsynskaj kamisii Kanhresu ZŠA Krystafer Śmit. Zakonaprajekt praduhledžvaje žorstkija ekanamičnyja sankcyi suprać režymu Alaksandra Łukašenki i finansavuju dapamohu apazycyi.
Dakument takoha kštałtu źjaviŭsia jašče ŭ listapadzie 2001 h. dy mocna abnadzieiŭ apazycyju. Tady senatar Džesy Hiełmz prapanavaŭ hety prajekt na razhlad Senatu. Ciapier ža jaho atrymała i Pałata pradstaŭnikoŭ. Dla taho kab zakonaprajekt staŭsia zakonam, patrebna pastanova dźviuch pałataŭ Kanhresu. Čakajecca, što “biełaruskaje pytańnie” budzie razhladacca sioleta nie raniej za vierasień.
Prajekty praduhledžvajuć nia tolki sankcyi suprać isnaha režymu (zabarona stratehičnaha ekspartu ŭ Biełaruś, blakavańnie aktyvaŭ Biełarusi ŭ ZŠA, zabarona na ŭjezd u ZŠA vyšejšych biełaruskich čynoŭnikaŭ i ich siemjaŭ dy inš.), ale i dapamohu apazycyjnym siłam.
Śmitaŭ prajekt roźnicca ad Hiełmzavaha. Tak, zamiest prapanavanych Hiełmzam 30 młn. dalaraŭ na raźvićcio demakratyi ŭ Biełarusi na 2002 h., Śmit prapanuje 40 młn., ale na dva hady — 2003 i 2004-y. U novym dakumencie prysutničaje j zhadka pra handal zbrojaj. Tak, prezydent ZŠA, u vypadku pryniaćcia zakonu, musić pradstavić u Kanhres infarmacyju pra hety handal i pra “asabistyja aktyvy i majomaść” Alaksandra Łukašenki. Aproč taho, u Śmitavym prajekcie Viarchoŭny Saviet CHIII sklikańnia ŭžo nie nazyvajecca lehitymnym parlamentam Biełarusi.
A. T.
My paprasili lidera Abjadnanaj hramadzianskaj partyi, namieśnika staršyni VS Anatola Labiedźku patłumačyć, što aznačajuć hetkija źmieny.
“Adsutnaść zhadki pra lehitymnaść Viarchoŭnaha Savietu 13-ha sklikańnia nijak nie paŭpłyvaje na jahony los. – kaža A.Labiedźka. – Jość bil, pryniaty Kanhresam ZŠA kala dvuch hadoŭ tamu. Tam paćviardžałasia, što Viarchoŭny Saviet – heta lehitymnaja struktura. I jaho nichto nie admianiaŭ”.
Pa słovach Anatola Labiedźki, na adnym z apošnich pasiedžańniaŭ Viarchoŭnaha Savietu CHIII sklikańnia było vyrašana, što jahonyja paŭnamoctvy buduć pieradadzienyja novamu demakratyčnym čynam abranamu parlamentu. Takaja ž pazycyja i ŭ amerykanskaha boku, jaki pa-raniejšamu nie pryznaje pałaty pradstaŭnikoŭ. Viarchoŭny Saviet ciapier admoviŭsia ad pryniaćcia zakanadaŭčych aktaŭ i źjaŭlajecca hienerataram idejaŭ, inicyjatyvaŭ (možna zhadać niadaŭni Kruhły stoł apazycyjnych palityčnych partyj, sabrany pa jaho inicyjatyvie), a taksama zachoŭvaje tradycyi pierajemnaści, ličyć Labiedźka.
U hetym apošnim jon dubluje Radu BNR. Anatol Labiedźka pahadžajecca, što peŭnyja paraleli jość, adnak jon ličyć, što “struktura VS bližejšaja da Biełarusi” i jašče niadaŭna pryznavałasia Parlamenckaj asamblejaj ABSE.
