Z usioj krainy
Miron viartajecca
Badaj, nivodnaja ryba, što vodzicca ŭ našych rekach, nia maje stolki nazovaŭ, jak vusač: miron, marona, marena, kiełb, kiłbun, carskaja ryba. Z-za pahrozy źniknieńnia jana zaniesienaja ŭ Čyrvonuju knihu Biełarusi. Kolki hadoŭ nia bačyli mirona j na Aršanščynie, reki jakoj stali praźmierna brudnymi. Ale voś radasnaja navina: miron znoŭ sustrakajecca ŭ Dniapry i Aršycy. Raście jahonaja papulacyja. Značyć, vada stała krychu čyściejšaj. Adnak ludziam u našych rekach sanitarna-epidemijalahičnaja słužba kupacca pakul nia raić.
Samalot mianiaje prapisku
Śpisany z vajskovaj avijacyi samalot Ił-14 doŭhi čas byŭ adnoj sa słavutaściaŭ horadu Barań na Aršanščynie. Spačatku ŭ im zrabili cir, potym źbiralisia adčynić videasalon. Ale plany tak i zastalisia na papiery. Samalot zastaŭsia biez haspadara. Tamu iluminatary byli raźbityja. Uzimku dzieci koŭzalisia pa kryłach, stvarajučy niebiaśpiečny atrakcyjon. Kab chulihany nie rabili biesparadku ŭ salonie, daviałosia prybrać trap. Narešcie vyrašana samalot demantavać. Pakul jaho pazbavili kryłaŭ. Pa častkach samalot pieraviazuć na palihon MNS u Voršu, dzie jon budzie vykarystoŭvacca ŭ jakaści trenažoru.
Viktar Lutynski, Vorša
Mužazabojca
Nie ŭdałosia pierachitryć śledčych Antaninie Mazur, žycharcy vioski Lubiščycy, što na Ivaceviččynie. Chutka i sprytna jana zaspakoiła svajho muža, hałoŭnaha enerhietyka kałhasu, jaki siarod nočy raschadziŭsia paśla pjanki, — zasadziła nož u hrudzi, ad čaho toj adrazu skanaŭ. Kab advieści ad siabie padazreńni, žančyna pakłała miortvaje cieła na rovar i padałasia ŭ bok čyhunki. Dačakaŭšy, kali elektryčka źniaviečyć mierćviaka, viarnułasia dachaty. Možna było b usio śpisać na niaščasny vypadak, adnak uvažlivy sudmedekspert vyjaviŭ na ciele ranu ad naža. Udavu ŭziali za žabry. I jana raskazała pra padrabiaznaści svajho złačynstva.
Žančyna atrymała čatyry hady turmy. Dźviuch niepaŭnaletnich dačok zabrali da siabie jejnyja braty.
Aleś Łaŭraniuk, Ivacevičy
“Vidarys” u Švecyi
Barysaŭski narodny teatar “Vidarys” braŭ udzieł u II mižnarodnym festyvali amatarskich teatraŭ krainaŭ Paŭnočnaj Eŭropy, što prajšoŭ u Švecyi. U Biełarusi niama asacyjacyi aktoraŭ-amataraŭ. Ale Ministerstva kultury rekamendavała da ŭdziełu ŭ festyvali barysaŭski “Vidarys”. Usiaho ŭ Švecyju pryjechali teatry dvanaccaci dziaržavaŭ. Barysaŭcam vypaŭ honar adkryć fest. Dziela pakazu ŭ Švecyi režyser teatru Ŭładzimier Bujko pastaviŭ spektakl “Śmierć doktara Faŭsta” pavodle pjesy belhijskaha dramaturha Mišela de Hielderoda. Naleta “Vidarys” planuje pajechać na suśvietny festyval u Manaka.
Źmicier Pankaviec, Kastryca
Dahledziać za hrošy
Z 1 vieraśnia Baranavicki addzieł sacyjalnaj abarony pierachodzić na płatnaje absłuhoūvańnie adzinokich pensijaneraū. Z 492 čałaviek ciapieraka 129-ci za dapamohu daviadziecca płacić. Košt adnaho naviedvańnia na tydzień kaštuje 14023 rubli, a dla tych, chto žyvie ū pryvatnym sektary, — 17529 rublioū.
Vypłyvaje rtuć
Korpajučysia ū ziamli na svaim padvorku, žychar Baranavič vykapaū butelku z 5 kh rtuci. Skul tamaka jana ūziałasia, nieviadoma. Čałaviek zdaū znachodku ū MNS. A prybiralščyca Paleskaha vakzału znajšła kilahramovuju kołbu rtuci ū śmietnicy la vakzału. Pakul niesła jaje ū milicyju, dyk krychu raźliła na peronie. Daviałosia pravodzić demerkuryzacyju.
Śviata ū Paūlinavie
U minułuju niadzielu žychary Paūlinava, što pad Baranavičami, adznačali śviata vioski. Pravodzilisia spabornictvy, latereja, hulni j tancy. Narodnyja majstry pradavali svaje vyraby.
Rusłan Raviaka,
Baranavičy
Kartes syšoŭ u historyju
Źmiena kiraŭnika Opery paciahnuła stratu hastrolaŭ u Salaturnie
U Opery adbyvajecca źmiena pakaleńniaŭ, bo hałasy starejuć jašče chutčej, čym ludzi. Maładyja narakali na starejšych — maŭlaŭ, razam z dyrektaram nie dajuć darohu talenavitaj moładzi. Starejšyja złavali na moładź, jakaja nibyta zanadta naporysta prakładaje sabie šlach praz dyrektarski kabinet. Achviaraj kanfliktu pakaleńniaŭ i staŭsia Kartes.
Adnak kali jaho zvolnili, artystaŭ aharnuŭ žach. Pry Kartesie im žyłosia niadrenna. Aŭtar čatyroch operaŭ, što ŭvachodziać u załaty fond biełaruskaha mastactva, liberał, intelihient, znaŭca zamiežnych movaŭ — jon zdolny byŭ rabić uražańnie na zamiežnych impresaryjo. Teatar vyjaždžaŭ na hastroli, artysty zarablali i mieli pośpiech. Zaraz hetych hastrolaŭ nia budzie. Dyna Aryčy, menedžer festyvalu ŭ Salaturnie (Švajcaryja), dzie našyja artysty vystupali šeść hadoŭ, admoviŭsia ad dalejšaha supracoŭnictva i naleta zaprasiŭ baŭharaŭ.
Zapaŭnialnaść zali Opery pry Kartesie siahnuła 80% (pierad hetym była 25%). Dyj unikalny repertuar teatru (chity suśvietnaje opernaje klasyki) patrabuje kłapatlivaj haspadarskaj ruki.
Artysty bajalisia, što dyrektaram pryznačać čynoŭnika, dalokaha ad teatru i nia zdolnaha arhanizavać dobryja hastroli, zabiaśpiečyć reklamu, pakłapacicca pra repertuar. Tym bolš što pasadu “dyrektar i mastacki kiraŭnik” padzialili na dźvie častki. Mastacki kiraŭnik užo amal pryznačany, heta režyserka Marharyta Izvorskaja-Jelizarjeva. Chto budzie dyrektaram, pakul nieviadoma. M.Izvorskaja-Jelizarjeva šmat hadoŭ pracavała ŭ Opery. Siarod najlepšych jejnych spektaklaŭ — “Sevilski cyrulnik”, “Čaradziejnaja flejta”, “Toska”. Niekalki hadoŭ tamu, paspračaŭšysia z Kartesam, jana syšła z teatru ŭ Akademiju muzyki.
Julija Andrejeva
in memoriam
Zmoŭk hołas epochi
Sumnaja navina — pajšoŭ ad nas Uładzimier Šalichin. U časy majho malenstva jon čytaŭ naviny na telebačańni, hučaŭ pa radyjo, abviaščaŭ vychad na scenu maich ulubionych artystaŭ. Hod išoŭ za hodam, leta źmianiałasia vosieńniu, a jon — usio taki ž małady, pa-džentełmensku elehantny, ruchavy — uśmieškaju vitaŭ publiku ŭ filarmaničnaj zali, abviaščajučy čarhovy kancertny sezon.
Śviatasłaŭ Rychter byŭ jahonym asabistym siabram. Halina Černi-Stefańskaja raiłasia ź im. Birhit Finillo adnojčy publična jaho pacałavała. Raspoviedy pra hetych ludziej u kancy žyćcia skłalisia ŭ cudoŭnuju knihu — “Pra tych, kaho pamiataju i lublu”. Asobny padraździeł u hetaj knizie — Maryja Kałas, jakaja padaryła jamu halštuk. Pamiataju, jak jon pakryŭdziŭsia na mianie, kali ŭ radyjopieradačy, pryśviečanaj Kałas, ja dazvoliła sabie na jejny adras niejkija krytyčnyja słovy…
Bieź jahonaha hołasu našaje žyćcio budzie inšym. Mienš paetyčnym. Mienš vysakarodnym i ŭźniosłym. Adnak muzyka, jakuju jon hetak hłyboka razumieŭ i lubiŭ, budzie hučać i nadalej.
Julija Andrejeva
paciarpiełyja za Biełaruś
16 žniŭnia siabry viciebskaj filii AHP Alaksandar Bakulin, Chviedar Bakunaŭ, Taciana Zajkova, Alaksandar Kabiak, Eła Kanavałava, Vadzim Kraŭcoŭ, Nadzieja Šakalis i Dzianis Šman atrymali sudovaje papiaredžańnie za niesankcyjavanuju akcyju 26 lipienia, prymierkavanuju da Dnia niezaležnaści. 19 žniŭnia “zubroŭcy” Alaksandar Hołub, Ihar Zakreŭski i Siarhiej Piezkin byli zatrymanyja kala rasiejskaj ambasady ŭ Miensku. Jany sprabavali pieradać tudy zajavu z pratestam suprać pahłynańnia Biełarusi Rasiejaj. Kali pratest nia byŭ pryniaty, uźniali plakaty. Sudździa Taciana Paŭlučuk dała I.Zakreŭskamu j S.Piezkinu pa 10 načej aryštu, A.Hołubu – 5 načej aryštu za niesankcyjavanaje pikietavańnie. Na znak pratestu suprać zatrymańnia ŭsie troje trymali haładoŭku. Za pikiet suprać aneksii Biełarusi la pomnika Maratu Kazieju, zładžany 21 žniŭnia, byŭ zatrymany “zubroviec” Jaŭhien Afnahiel. 27 lipienia sudździa Centralnaha rajonu Miensku Taciana Paŭlučuk dała jamu 10 načej aryštu. Ja.Afnahiel u zale sudu abviaściŭ haładoŭku. Na čaćviertyja sutki jon byŭ špitalizavany ŭ suviazi z paharšeńniem zdaroŭja. Padčas rasklejki ŭlotak ź pieradvybarčymi abiacańniami A.Łukašenki 23 lipienia ŭ Maładečnie byŭ zatrymany siabra ruchu “Zubr” A.Sivy. Z pastarunku A.Sivaha vypuścili, navat nia skłaŭšy pratakoł: usie cytaty byli z aficyjnych abiacanak. 30 žniŭnia za niesankcyjavany pikiet i šeście byli zatrymanyja 7 siabroŭ viciebskaj filii AHP: Alaksandar Bakulin, Alaksandar Kabiak, Jaŭhien Kanstancinaŭ, Aksana Kraŭcova, Vadzim Kraŭcoŭ, Nadzieja Šakalis i Aleh Šulhin. Na ŭsich składzienyja pratakoły za ŭdzieł u niesankcyjavanaj akcyi. 2 vieraśnia sud Leninskaha rajonu Horadni daŭ staršyniu haradzienskaj filii AHP Jurju Istominu 200 tys. rubloŭ štrafu za ŭdzieł u akcyi, prymierkavanaj da 2-j hadaviny źniknieńnia Z.Zavadzkaha.
udakładnieńnie
U “NN” ad 30 žniŭnia ŭ artykule “Na asnovie rastaropšy” zamiest “zahadčyk katedry Ŭładzimier Kurčanka” treba čytać “zahadčyk labaratoryi prykładnych prablem bijachimii Ŭładzimier Kurčanka”.
