Hulni specsłužbaŭ
Palityčny kryzys u adnosinach biełaruskaha j rasiejskaha kiraŭnictva nia moh nie adbicca na dziejnaści specsłužbaŭ dźviuch dziaržavaŭ. Nieŭzabavie paśla departacyi ź Biełarusi ŭ Rasieju čačenskaha palavoha kamandzira naša kraina znoŭ “zaśviaciłasia” ŭ skandałach, źviazanych sa specsłužbami. Na hety raz sprava vyhladaje bolš surjoznaj.
Na minułym tydni “Komsomolskaja pravda” nadrukavała sensacyjnuju navinu. Akazvajecca, adkaznaść za vykradańnie vice-prezydenta “Łukojła” Siarhieja Kukury ŭziało na siabie “Biełaruskaje vyzvolnaje vojska” (BVV). Rasiejskija pravaachoŭnyja orhany i padumać nie mahli, što ŭ Maskvie nachabna dziejničajuć “biełaruskija bajeviki”. U toj ža čas, u zhadanaj publikacyi dapuskajecca, što da vykradańnia mohuć mieć adnosiny biełaruskija specsłužby. U Kukury mierkavałasia atrymać źviestki pra karupcyju siarod rasiejskich čynoŭnikaŭ…
Siabroŭ niezarehistravanaj patryjatyčnaj arhanizacyi “Bieły lehijon” pačynajuć ciahać na dopyty ŭ MUS i KDB. Pryčyna — aktyvizacyja jejnaj dziejnaści, praviadzieńnie admysłovaha letnika, repartaž ź jakoha ŭ №32 źmiaściła “NN”, i, napeŭna, niadaŭniaja žorstkaja antyintehracyjnaja zajava “Lehijonu”. Jak paviedamlaje arhanizacyja ŭ svaim “adkrytym liście”, jaje siabroŭ zapałochvajuć, sprabujuć verbavać, prymušajuć pryznać svoj udzieł u padryvie ŭ 1997 h. hazapravodu Taržok—Miensk—Ivacevičy. Jak viadoma, tady adkaznaść za toj vybuch uziało na siabie ŭsio toje ž BVV.
Kaliści, paśla zamachaŭ na prezydenta Hruzii Ševardnadze, zachodnija ŚMI raspaŭsiudzili infarmacyju z amerykanskich krynicaŭ pra dačynieńnie da ich “sietki FSB u Biełarusi”. Nibyta na našaj terytoryi rychtavaŭsia prynamsi adzin z zamachaŭ. Tady na hetuju infarmacyju amal nie źviarnuli ŭvahi. Niadaŭna pra hetuju tajamničuju “sietku” znoŭ zhadali zamiežnyja ŚMI — u źviazku z rašeńniem “razmarozić” jaje, nibyta pryniatym sioleta ŭ Maskvie, jakaja pierastała daviarać biełaruskamu kiraŭnictvu. A ŭ paniadziełak, 23 vieraśnia, kavkaz.org źmiaściŭ zaciemku pra zdabytyja čačenskaj raźviedkaj sensacyjnyja viestki. Nibyta FSB rychtuje “bujnamaštabnuju pravakacyju” — uzryŭ saboru Vasila Błažennaha ŭ Maskvie, jaki vykanajuć dva čačency-kryminalniki. Dla nas cikava toje, što, pavodle infarmacyi sajtu niezaležnikaŭ Ičkieryi, čačencam za rabotu abiacanyja nia tolki hrošy, reabilitacyja, ale j “dalejšaje biaśpiečnaje pražyvańnie na terytoryi Biełarusi”. Jak tut nie zhadać niadaŭna departavanaha namieśnika Sałmana Radujeva, jakoha nie chacieła prymać Rasieja. Ci nie za niejkija zasłuhi jon adpačyvaŭ u Biełarusi?
Pakul u “dyjalohu” prezydentaŭ Biełarusi i Rasiei nazirajecca zacišša, “u boj” ustupili specsłužby. Biełaruskija sprabujuć dakazać, što taksama čahości vartyja, a rasiejskija viaduć składanyja hulni, u adpaviednaści z “rasiejskimi stratehičnymi intaresami” ŭ našaj krainie. Napeŭna, abodva baki zusim nia suprać, kab, “hulajučy”, padstavić pad udar biełaruskija patryjatyčnyja siły. Inakš pry čym tut BVV?
Pavał Sumaroka
