Instytut Biełarusi?
Biełaruś u śviecie tryvała asacyjujecca z słovami “Čarnobyl” i “Łukašenka”. Hetym viedy bolšaści zamiežnikaŭ pra našuju palityku, kulturu, navuku i historyju vyčerpvajucca. Brend “Biełaruś” zastajecca małazrazumiełym i “nieraskručanym”.
Miž tym, sakret papularnaści — u niastomnaj prapahandzie: rabi što-niebudź, i pra ciabie buduć viedać! Vuń palaki ŭsialak padtrymlivajuć Polski instytut, jaki prapahanduje ich kulturu za miežami krainy. Niemcy spryjajuć Instytutu Hiote, što zajmajecca analahičnaj dziejnaściu. Hetyja ŭstanovy daŭno pracujuć u Biełarusi. Jość Brytanskaja rada, hišpanski Instytut Servantesa, Baŭharski instytut, Japonski fond…
Chto budzie kłapacicca pra imidž Biełarusi ŭ śviecie? Ministerstva zamiežnych spravaŭ dbaje pra aficyjnyja miždziaržaŭnyja kantakty. Biełaruski instytut navuki i mastactva ŭ Ńju-Jorku (BINiM), arhanizavany dyjasparaj, vydaje knihi pra Biełaruś i biełaruskaje, ładzić imprezy. Adnak jon nia zdolny achapić uvieś śviet i reprezentavać biełaruskuju kulturu całkam. Choć by tamu, što znachodzicca daloka ad Biełarusi i sam siłkujecca narodžanym za jaje miežami.
Mnohija pradstaŭniki intelihiencyi staviać pytańnie pra stvareńnie Instytutu Biełarusi, jaki b pašyraŭ sietku svaich filijaŭ pa ŭsim śviecie, vydavaŭ by za miažoj pierakłady biełaruskich aŭtaraŭ, pakazvaŭ biełaruskija kinastužki, ładziŭ vystavy biełaruskich mastakoŭ. Jość roznyja kancepcyi taho, na jakoj bazie možna było b stvaryć Instytut Biełarusi.
Instytutam Biełarusi moh by stacca navukova-aśvietny centar imia Franciška Skaryny. Ale jon znachodzicca siońnia ŭ padparadkavańni Ministerstva adukacyi, jakoje maje inšyja zadačy. Ci nia varta Skarynaŭskamu centru tady adyści da Ministerstva zamiežnych spravaŭ? Kamu, jak nie dyplamatam, kłapacicca pra imidž krainy, jakuju jany reprezentujuć u śviecie? Pieramovy viaducca ŭžo kolki miesiacaŭ, adnak plonu pakul nie dajuć.
Pavał Łatuška, presavy sakratar MZS, zaznačaje: “U Ministerstva niama srodkaŭ na padtrymku ŭstanovy kštałtu instytutu. Ale raspaŭsiudžvańnie infarmacyi pra biełaruskuju kulturu i historyju — adzin z pryjarytetnych kirunkaŭ u dziejnaści zamiežnych ustanovaŭ Biełarusi”.
Ci paspryjaje pierachod Skarynaŭskaha centru pad ruku MZS paŭstavańniu Instytutu Biełarusi? Pavodle jakoha ŭzoru jon musić stvaracca? Mierkavańni praf. Hienadzia Cychuna i dyrektarki Skarynaŭskaha centru Lubovi Ŭładykoŭskaj-Kanaplanik.
