***
14 listapada ŭ Vašynhtonie adbyłasia arhanizavanaja pa inicyjatyvie šerahu kanhresmenaŭ i senataraŭ kanferencyja, na jakoj razhladałasia sytuacyja ŭ Biełarusi.
Akramia amerykanskich palitykaŭ i ŭradavych čynoŭnikaŭ, na kanferencyi prysutničali pradstaŭniki biełaruskaj apazycyi.
Rašeńnie pra jaje praviadzieńnie było pryniataje kala dvuch tydniaŭ tamu, a sama kanferencyja prajšła na fonie troch skandałaŭ. Spačatku stała viadoma pra nastojlivaje žadańnie Alaksandra Łukašenki patrapić na samit NATO ŭ Prazie. Paśla specsłužby zatrymali Anatola Labiedźku na vychadzie z amerykanskaj ambasady, dzie jon mieŭ sustreču ŭ spravie budučaj kanferencyi. Narešcie, “Hazpram” źmienšyŭ padaču hazu ŭ Biełaruś, što vyklikała dalejšaje paharšeńnie biełaruska-rasiejskich adnosinaŭ.
Jak paviedamiła radyjo “Svaboda”, u aŭtorak sustaršynia Chielsinskaj kamisii Kanhresu ZŠA Krystafer Śmit vystupiŭ u nižniaj pałacie amerykanskaha parlamentu z rezkaj zajavaj adnosna sytuacyi ŭ Biełarusi. Pryčynaj jaje było niadaŭniaje zatrymańnie supracoŭnikami KDB lidera Abjadnanaj hramadzianskaj partyi Anatola Labiedźki. Respublikaniec Śmit, u pryvatnaści, nazvaŭ u svajoj zajavie akružeńnie Łukašenki “złačyncami” i zaznačyŭ, što biełaruski narod varty lepšaha žyćcia.
Nahadajem, što mienavita Śmit u pačatku leta prapanavaŭ nižniaj pałacie parlamentu ZŠA na razhlad tekst prajektu “Aktu ab demakratyi ŭ Biełarusi”. Akramia žorstkich sankcyj u dačynieńni da aficyjnaha Miensku, jon praduhledžvaje i finansavuju dapamohu niezaležnamu biełaruskamu hramadztvu (40 młn. dalaraŭ na 2003—2004 h.). Vydzialeńnie takoj dapamohi aznačała b, što čutki ab tym, nibyta ZŠA pahadzilisia na ŭvachodžańnie Biełarusi ŭ “rasiejskuju zonu ŭpłyvu”, trochi pierabolšanyja.
Pytańnie pra los “Aktu ab demakratyi ŭ Biełarusi” i stajała na kanferencyi, adnym ź inicyjataraŭ jakoj byŭ kanhresmen Krystafer Śmit. Siarod inšych temaŭ sustrečy nazyvalisia stan relihijnych svabod u Biełarusi dy handal zbrojaj režymu Łukašenki. Udzielniki kanferencyi šukali adkazu na pytańnie, jakoj pavinna być novaja palityka samaj mahutnaj krainy śvietu ŭ dačynieńni da Biełarusi ŭ sytuacyi, kali mienskija ŭłady ŭžo robiać niaŭkludnyja žesty, aryjentavanyja na palapšeńnie adnosinaŭ z Zachadam, ale jašče nie ažyćciavili nivodnaha kroku, nakiravanaha na demakratyzacyju i pavieličeńnie adkrytaści hramadztva.
U vašynhtonskaj kanferencyi brali ŭdzieł lider Partyi BNF Vincuk Viačorka, kiraŭnik AHP Anatol Labiedźka, staršynia BSDH Stanisłaŭ Šuškievič, kaardynatar “Chartyi'97” Andrej Sańnikaŭ. Siarod znanych udzielnikaŭ z amerykanskaha boku — kanhresmen Hiejdensan, prodki jakoha pachodziać ź Biełarusi, i MakKiejn, były kandydat u prezydenty ZŠA ad respublikancaŭ.
Aleh Tačony
