Zahadam ministra ŭnutranych spravaŭ novym načalnikam upraŭleńnia Dziaržaŭtainspekcyi pryznačany pałkoŭnik Mikałaj Drozd, jaki dahetul kiravaŭ Upraŭleńniem achovy pravaparadku MUS, a prasłaviŭsia tym, jak kiravaŭ razhonam niezaležnickich demanstracyj u siaredzinie 90-ch.
30 kastryčnika Ŭładzimier Navumaŭ “u suviazi z słužbovymi niedapracoŭkami” źniaŭ jahonaha papiarednika Leanida Farmahieja.
Za niekalki tydniaŭ da adstaŭki Ł.Farmahiej, jaki ŭznačalvaŭ DAI ź listapada 2001 h., byŭ časova adchileny ad pasady i znachodziŭsia ŭ adpačynku. Jahonyja abaviazki vykonvaŭ jahony pieršy namieśnik Alaksandar Kuźmienka.
Ź imiem Leanida Farmahieja ŭ Dziaržaŭtainspekcyi źviazvali peŭnyja nadziei na refarmavańnie hetaje struktury. Pavodle jahonaj idei, na darohach musili zastacca tolki inspektary z aficerskimi pahonami. Bližejšym časam Ł.Farmahiej źbiraŭsia źmianić praktyku źbirańnia štrafaŭ prosta na darohach. “Inspektary — heta nie kasiry”, — kazaŭ jon.
Pra toje, ci budzie Mikałaj Drozd ažyćciaŭlać zadumanyja Ł.Farmahiejem reformy, skazać ciažka: novy načalnik DAI pakul “śviaciŭsia” tolki na “Čarnobylskich šlachach”.
Versijaŭ ab pryčynach adstaŭki Ł.Farmahieja mnostva. Adnak źviartaje na siabie ŭvahu adna akaličnaść: prykładna adnačasova z hałoŭnym daišnikam u vymušany adpačynak adpravili j načalnika Śledčaha kamitetu MUS Leanida Hłuchoŭskaha. Abodva “adpačynki” supali z novym vitkom antykarupcyjnaje kampanii, razhornutaj uładami. Na apošniaj kalehii ministerstva U.Navumaŭ nazvaŭ ličby, jakija śviedčać pra kadravy hoład u siłavym viedamstvie: sioleta da roznych vidaŭ adkaznaści byli pryciahnutyja 6200 milicyjantaŭ, ź ich 118 — da kryminalnaj. Bolš za tysiaču čałaviek zvolenyja.
H.Ch.
