Siońnia Zmahar niabačnaha frontu, apazycyjny palityk Łabećka, Česny Žurnalist, inicyjatar raznastajnych referendumaŭ Jar.Ašuk i pravasłaŭny litaratar Kaściam razvažajuć pra ŭčynak biełaruskaha pasła ŭ Japonii dy inšyja balučyja i važnyja dla hramadztva temy.
Zmahap: Viartajucca stalinskija časy! Antynarodny režym achapiŭ svaimi čornymi kipciurami ŭsiu planetu! U Tokijo źnik biełaruski palityk!
Kaściam: Nadalej budzie navuka! Našli kaho pasłać! Uvidu niebłahanadziejnaści krainy, tudy ciapier treba vypravić kaho-niebudź asabliva adkaznaha — pažadana vajskova-patryjatyčnaha. Voś, naprykład, daŭno siadziać biaz pracy hienerał Akalec i pałkoŭnik Zalatanin.
Zmahar: Hetyja nie pahodziacca. U Japoniju ž treba praz Rasieju jechać. A ŭ Rasiei ich jašče do-obra pamiatajuć...
Česny Žurnalist: Dy nie abaviazkova kab byŭ vajskoviec! Vuń Kazulin prafesar, a jaho ŭ AAN pryznačyli Biełaruś pradstaŭlać. Nie bajacca, što ŭciače z usim universytetam.
Jar.Ašuk: Darečy, pra Rasieju. Mnie zdajecca, što našym pasłom u Japonii moh by zrabicca adzin z dumskich deputataŭ — chto-niebudź z frakcyi “Jadzinstva” ci SPS-u. Ja na miescy Haranta Kanstytucyi prosta spytaŭsia b u Pucina — toj lepiej raźbirajecca ŭ našaj mižnarodnaj palitycy.
Česny Žurnalist: Vy, kaleha, pakul nie na miescy Haranta Kanstytucyi.
Kaściam: I ŭvohule, nie razumieju, jak možna pramianiać mienski “Listapad” na hniusny amerykanski fast-fud? Kab ja byŭ dzie za miažoj u hety čas — na kryłach prylacieŭ by! Kab tolki byŭ dzie za miažoj... Kab ža nas, pravasłaŭnych litarataraŭ, kudy zaprašali...
Łabećka: A ja vuń kolki pa zahranicach ni jeździŭ — i ŭ Brusel, i ŭ Maskvu, — zaŭsiody viartaŭsia. I nie na jaki-niebudź “Listapad”, a prosta tamu, što ja — patryjot svajoj radzimy i baču jaje ščaślivaj i niezaležnaj, ale abjadnanaj z Rasiejaj na pryncypach Eŭraźviazu!
Česny Žurnalist: Vy heta da čaho?
Łabećka: A... prosta tak...
Jar.Ašuk: A mnie zdajecca, što hetyja ŭcioki — syhnał da blizkich źmienaŭ u biełaruskim hramadztvie. Chutka palatuć hałovy i zakruciacca hajki! Pakul nia pozna — jadnajmasia z Ra...
Kaściam: Tak! Tak! Heta syhnał! Heta znak ź niabiosaŭ! Adny my zastalisia pravasłaŭnyja ŭ abłozie masonskaha śvietu! Začynimsia j nikoha nikudy nia puścim — na chaleru nam roznyja pasły dy misii ABSE! U nas svaja misija!
Zmahar: Misija? A mesija ci jość? Mo toj, što biaz českaje vizy siadzić, adrynuty ŭsim cyvilizavanym śvietam?
Kaściam: Nu i niachaj siadzić! My i jaho nikudy nia puścim. Navat u Partuhaliju. Nie chapała, kab jon tam palityčnaha prytułku paprasiŭ.
Ale tut patelefanavali ź Ministerstva ŭnutranych spravaŭ i skazali, što, kali analityki nia ścichnuć, palityčnaha prytułku daviadziecca prasić kamuści inšamu.
Adździeł analityki
