Šanoŭnyja suajčyńniki! Spradviečnym paklikańniem intelihiencyi było i jość asensavańnie chady padziej i vyznačeńnie najbolš aptymalnych šlachoŭ raźvićcia čałaviečaj supolnaści.
U krainach, dzie intelihiencyja maje naležnaje pryznańnie, dzie jaje idei i prapanovy byli pačutyja, daŭno dasiahnuty adpaviedny ŭzrovień žyćcia, stvorany ŭmovy, pry jakich kožny moža maksymalna realizoŭvać svaje zdolnaści i atrymlivać za pracu ŭznaharodu, dastatkovuju dla taho, kab karystacca ŭsimi zdabytkami navukova-techničnaha prahresu.
Treba znajści mužnaść i pryznać, što siońniašniaje niezdavalniajučaje stanovišča našaha hramadztva skłałasia ŭ peŭnaj miery i tamu, što my, intelihiencyja, nie vykonvajem naležnym čynam svajoj adkaznaj histaryčnaj misii. Hetamu možna znajści šmat tłumačeńniaŭ, možna pryvieści šerah abjektyŭnych pryčyn, ale ŭsim nam nieabchodna zrazumieć, što nichto nia zrobić za nas spravu, jakuju losam nakanavana zrabić mienavita nam.
Vostra naśpieła nieabchodnaść vyznačycca pa šerahu nieadkładnych, žyćciova važnych dla Biełarusi prablemaŭ.
– Što treba rabić dla zachavańnia nacyjanalnaj tojesnaści biełarusaŭ i dziaržaŭnaha suverenitetu našaj krainy?
– Jakim naležyć być dziaržaŭnamu ładu Biełarusi?
– Jakim pavinna być miesca Biełarusi siarod krainaŭ Eŭropy i suśvietnaj supolnaści?
– Jak praduchilić realnuju pahrozu ekanamičnaha i enerhietyčnaha kryzysu?
– Jakija zachady nieabchodna zrabić dziela ratavańnia nacyi ad vynikaŭ Čarnobylskaj katastrofy, a taksama demahrafičnaha kryzysu?
– Jakoj jość rola Biełarusi ŭ pracesach hlabalizacyi?
– Što treba zrabić, kab kansalidavać biełaruskuju intelihiencyju i nadać joj naležnuju rolu ŭ hramadztvie?
My źviartajemsia da tych, chto ŭśviedamlaje svaju prynaležnaść da Biełaruskaj Intelihiencyi. Chto adčuvaje bol i adkaznaść za los našaj krainy i našaha narodu, chto asensoŭvaje pracesy, jakija adbyvajucca ŭ Biełarusi i kamu jość što skazać i što prapanavać, kab paviarnuć našu krainu na šlach stanoŭčaha, perspektyŭnaha raźvićcia. My zaklikajem usich, chto pracuje na nivie navuki, kultury, adukacyi, medycyny, pradprymalnictva, u inšych sferach našaha žyćcia: źbirajciesia na schody, kab abmierkavać sytuacyju, jakaja skłałasia siońnia ŭ našaj krainie, prapanoŭvajcie svaje idei i vyłučajcie delehataŭ na Schod biełaruskaj intelihiencyi, jaki adbudziecca ŭ Miensku pry kancy studzienia 2003 hodu.
Nieabchodna, kab naš Schod adbyŭsia jak sapraŭdny forum nacyjanalnaj intelihiencyi i dapamoh nam narešcie adčuć našu jednaść i salidarnaść, skansalidavać našy namahańni dziela taho, kab jasna i ćviorda vykazać našu dumku narodu Biełarusi, aficyjnym uładam, palityčnaj apazycyi i ŭsiamu śvietu.
Siabry rabočaj hrupy arhkamitetu pa sklikańni Schodu biełaruskaj intelihiencyi “Niezaležnaja Biełaruś — svabodnaje i zamožnaje hramadztva”
Anisim Alena, Akałovič Leanid, Viarcinski Anatol, Hutman Jakub, Ipatava Volha, Karol Alaksiej, Kołas Uładzimier, Konan Uładzimier, Kupava Mikoła, Mazynski Valery, Maračkin Alaksiej, Sidarovič Źmicier, Trusaŭ Aleh, Čarniaŭski Michaś
