17 studzienia 2003
Čechi vybirajuć prezydenta
U druhi tur prezydenckich vybaraŭ u Čechii vyjšli Vacłaŭ Kłaŭs i Piatro Pithart, dva pravyja palityki. Prezydenta ŭ Čechii vybiraje parlament.
Kvaśnieŭski moža ŭznačalić NATO
Hieneralny sakratar NATO Robertsan zajaviŭ u Bruseli, što prezydent Polščy Alaksandar Kvaśnieŭski byŭ by dobrym kiraŭnikom Paŭnočnaatlantyčnaha chaŭrusu, ale «šmat chto moh by stać dobrym kiraŭnikom». Skazana heta było napiaredadni vizytu A.Kvaśnieŭskaha ŭ Vašynhton.
Sudziać byłoha palicyjanta
Žychar Manrealu 83-hadovy Valter (Uładzimier) Abadzinski moža być pazbaŭleny kanadzkaha hramadzianstva i vysłany ŭ Biełaruś abo asudžany. Byłoha palicyjanta-kalabaracyjanista vinavaciać u vajennych złačynstvach u miastečku Mir. Za apošnija hady heta treciaja sprava takoha kštałtu. U 1999 h. brytanski sud razhladaŭ spravy Symona Sierafinoviča i Antona Savaniuka, abvinavačanych u zabojstvie žydoŭ. Anivodzin ź ich nia byŭ departavany ŭ Biełaruś.
Achviary marazoŭ u Rasiei
Jašče adzin čałaviek pamior u vyniku pieraachałodžańnia ŭ Maskvie za aŭtorak, paviedamiła słužba chutkaj medycynskaj dapamohi rasiejskaj stalicy. Usiaho ź vieraśnia ŭ Maskvie ad choładu pamierli 287 čałaviek.
Trahiedyja na kurorcie
U českich harach Krkonaše padčas katańnia na łyžach zahinuła 11-hadovaja biełaruskaja školnica. Maci adpuściła jaje pakatacca adnu, i dziaŭčynka, źjaždžajučy z hary na vialikaj chutkaści, dałasia ŭ dreva i pamierła na miescy ad ciažkich traŭmaŭ hałavy.
Paema Papy
Papa Jan Pavał II napisaŭ paemu. Jaje pracoŭny zahałovak — «Rymski tryptych. Rozdumy Jana Paŭła II». U pieršaj častcy Papa razvažaje pra ŭzajemaadnosiny čałavieka z Boham. U druhoj — havorka pra Sykstynskuju kapełu, dzie Jan Pavał II byŭ abrany Papam. Treciaja častka pryśviečanaja razvažańniam pra Abrama. Papa napisaŭ paemu paŭhodu tamu, kali adpačyvaŭ u letniaj rezydencyi.
Čyrvonyja štany — pa-za zakonam
Śviataram Hreckaj pravasłaŭnaj carkvy zabaranili nasić čyrvonyja štany, pić i palić.
Novy kodeks pavodzinaŭ pryniała Hreckaja pravasłaŭnaja carkva dla svaich funkcyjaneraŭ. Pavodle novaha narmatyŭnaha aktu, śviataram treba apranacca bolš ścipła i pavodzić siabie kulturna ŭ hramadzkich miescach. Niekatoryja naziralniki źviazvajuć inicyjatyvu carkoŭnaha načalstva sa skandałami ŭ Amerycy, dzie śviataroŭ katalickaj carkvy vinavaciać u spakušeńni niepaŭnaletnich. Choć niadobrazyčliŭcy śćviardžajuć, što ad baciušak padčas adpraŭleńnia słužbaŭ pachnie pieraharam i tannym tytuniom. Zaraz hreckija relihijnyja dziejačy nie pavinny palić, łajacca, siadzieć zakłaŭšy nahu za nahu dy nasić śvietłyja, jarkija rečy navat pad rasaj.
Tym časam na Kipry pravasłaŭny japiskap Chryzastomas zaklikaŭ zabarnić pakaz novaha filmu pra Hary Potera, bo jon «prapahanduje apakryfizm».
ubačana z Rasiei Unter-aficerski Kreml
Aficyjnaja zajava Vašynhtonu pra nieabchodnaść pierahledzieć sytuacyju z prezydentam Biełarusi A.Łukašenkam źjaŭlajecca schavanaj prapanovaj «baćku» stać «adsutnym źvianom» antyrasiejskaha frontu ad Čornaha da Bałtyjskaha mora, jaki kantralujecca Vašynhtonam, i tym samym adrezać ad Rasiei eŭrapiejskija rynki zbytu enerhanośbitaŭ. Naturalna, u miežach prapanavanaha supracoŭnictva pavinny być «zabiaśpiečanyja pravy i svabody demakratyčnaj apazycyi», jakaja za niejki pierachodny peryjad (paŭhodu-hod) pavinna «saśpieć» dla pieradačy joj ułady. U vypadku zhody Łukašenki na taki varyjant «palityka vyłomlivańnia ruk», užytaja rasiejskim bokam u dačynieńni da biełaruskaha prezydenta ŭ spravie «Słaŭnafty»—«Hazpromu», pryviadzie da taho, što Kreml apyniecca ŭ stanoviščy «unter-aficerskaj udavy, jakaja sama siabie vysiekła».
«Zavtra»
