14 studzienia žurnalisty hazety «Biełaruski čas» Iryna Hiermanovič, Alaksandar Dubravin, Uładzimier Dziuba, Alaksandar Jahoraŭ, Siarhiej Jurjeŭ i Aleś Chmialnicki, «skaročanyja» pry kancy 2002 h., dali presavuju kanferencyju.
Prablemy ŭ supracoŭnikaŭ hetaje hazety — drukavanaha orhanu Federacyi prafsajuzaŭ — pačalisia paśla pryznačeńnia kiraŭnikom FPB Leanida Kozika. U žniŭni byŭ zvolnieny hałoŭny redaktar «BČ» Alaksandar Starykievič. Vykonvać abaviazki hałoŭreda stała I.Hiermanovič, jakoj Ł.Kozik paabiacaŭ, što nia budzie ŭmiešvacca ŭ spravy hazety.
Ale mienavita praciah raniejšaha redakcyjnaha kursu vyklikaŭ ciapierašni kryzys u «BČ». I.Hiermanovič zaznačaje: «Ł.Kozik nivodnaha razu nie kazaŭ, što rabić, jakija materyjały stavić. Ale praz pres-sakratara pieradaŭ: u hazecie iduć kiepskija zdymki, kiepskija artykuły». Kali ž I.Hiermanovič admoviłasia prycharošvać realnaść u hazecie, joj było prapanavana zvolnicca «zhodna z ułasnym žadańniem».
Pryznačanaja hałoŭnym redaktaram Śviatłana Bałašova (dahetul jana pracavała «pad kryłom» Viktara Čykina ŭ hazecie «7 dniej») pieraviała žurnalistaŭ na čverć staŭki, a potym i naahuł abviaściła pra skaračeńnie štatu «ŭ suviazi ź ciažkim finansavym stanoviščam».
Uvieś žurnaliscki skład «BČ» zastaŭsia biaz pracy. Na dumku skaročanych žurnalistaŭ, pryčynaj zvalnieńnia stałasia ichnaja palityčnaja pazycyja. Tak, U.Dziuba zaznačyŭ, što ŭ vačach ułady amal usie žurnalisty vydańnia vyhladali «vorahami»: sam jon supracoŭničaŭ z BAŽam, A.Dubravin — z «Našaj svabodaj», A.Chmialnicki — z radyjo «Racyja»…
Siońnia hazetu robiać techničnyja supracoŭniki: karektar, naborščyca i viarstalnik. S.Bałašova źbirajecca zapaŭniać vydańnie materyjałami ź Internetu. Były adkazny sakratar S.Jurjeŭ paviedamiŭ, što rehijanalnyja karespandenty «BČ» z 4 lutaha taksama buduć pracavać na pałovu akładu.
Darma što žurnalistaŭ skaračajuć «u suviazi ź ciažkim finansavym stanoviščam», «BČ» miarkuje pierajści na kalarovy druk. Pavodle słovaŭ A.Dubravina, dla redakcyi vydzielili jašče dva pakoi, zakupili novuju meblu.
Prezydent Biełaruskaj asacyjacyi žurnalistaŭ Žanna Litvina adznačyła, što zvalnieńnie žurnalistaŭ całkam źniščyła niezaležnuju prafsajuznuju presu ŭ krainie: «U Salihorsku nie vychodzić «Salidarnaść», u Miensku spyniŭ vychad «Rabočy». My zhubili niezaležny prafsajuzny druk». Sami žurnalisty «BČ» kažuć, što najbolšaje ździŭleńnie ŭ ich vyklikała abiakavaść prafsajuzaŭ da raspravy z prafsajuznaj hazetaj.
Sudzicca z byłymi najmalnikami siońnia maje namier tolki A.Dubravin, zvolnieny z 29 listapada zahadam ad… 19 śniežnia dy jašče i z farmuloŭkaj, jakoj niama ŭ Pracoŭnym kodeksie. Ci maje jon šancy vyjhrać praces suprać FPB? Udałosia ž dva miesiacy tamu pieramahčy ŭ vielmi padobnaj sytuacyi Źmitru Padbiareskamu. Byłoha namieśnika hałoŭnaha redaktara časopisu «Mastactva» nie raźličyli całkam u dzień zvalnieńnia, i sud pryznaŭ jahony pazoŭ spraviadlivym.
Śviatłana Bałašova nastojvaje, što za zvalnieńniem niama nijakich palityčnych pryčynaŭ. Pavodle jaje słovaŭ, pry papiaredniaj redaktarcy ŭ hazety nabrałasia da 17 młn. zapazyčanaściaŭ. Akramia taho, jana kaža pra parušeńni pry najmańni na pracu asobnych žurnalistaŭ.
Stanovišča hazety sapraŭdy nijakavataje. Dosyć skazać, što nakład źniziŭsia da 12 tys. Jašče dva hady tamu jon dasiahaŭ 40 tys.
U abaronu zvolnienych supracoŭnikaŭ «Biełaruskaha času» ŭžo vykazalisia BAŽ i Biełaruski PEN-centar. Svaje staronki prapanavała im «Naša Niva» i «Narodnaja vola».
Arkadź Šanski
