Na schod. U Pałac Respubliki!

Schod intelihiencyi Miensku, što adbyŭsia 19 studzienia ŭ Pałacy mastactvaŭ, vybraŭ delehataŭ na Ŭsiebiełaruski źjezd intelihiencyi. Hetaja padzieja adbudziecca 16 lutaha. Ad Miensku na forumie intelihiencyi majuć być 200 delehataŭ, ad rehijonaŭ —pa 50. Pryvitańnie ŭdzielnikam schodu ad źbitaha 17 studzienia akademika Radzima Hareckaha pieradaŭ narodny piśmieńnik Janka Bryl.

Ad arhkamitetu na Ŭsiebiełaruski źjezd było prapanavana bolš za 100 delehataŭ, jašče amal stolki ž nazvali ŭdzielniki schodu. U liku kandydataŭ byli nazvanyja nia tolki takija viadomyja pradstaŭniki tvorčaj intelihiencyi, jak Adam Maldzis, Uładzimier Arłoŭ, Michał Aniempadystaŭ i inš., ale j deputaty pałaty pradstaŭnikoŭ Valery Frałoŭ, Siarhiej Skrabiec i Ŭładzimier Parfianovič, prysutnyja na schodzie. Prahučała j imia parlamentara Hienadzia Dyleŭskaha, jaki na schod prybyć nia zmoh.

Piarečańni vyklikali tolki 4 kandydatury: Anatola Labiedźki, Piatra Kraŭčanki, Alaksandra Jarašuka i Jaŭhiena Budzinasa. Labiedźku pryhadali telefonnyja pieramovy ź Niamcovym, Jarašuku — inicyjatyvu referendumu za abjadnańnie Biełarusi z Rasiejaj, Budzinasu zakidali antynacyjanalnyja pohlady. Zrešty, usie asprečanyja kandydatury trapili ŭ śpis paśla hałasavańnia pa kožnaj ź ich. Biez abmierkavańnia adkinuli tolki kandydaturu Anatola Biełaha — za pavodziny, nieadpaviednyja statusu intelihienta.

Nie abyšłosia na schodzie biez zaŭvah. Vincuk Viačorka krytykavaŭ jaŭny «pierabor» u bok tvorčaj intelihiencyi spamiž delehataŭ: mała techničnaj intelihiencyi, mała nastaŭnikaŭ, daktaroŭ i h.d. Pavał Sieviaryniec zaznačaŭ, što nieabchodna vyłučać bolš moładzi.

Udzielniki schodu pryniali rezalucyju, u jakoj akreślili koła prablemaŭ dla abmierkavańnia na Ŭsiebiełaruskim źjeździe: zachavańnie suverenitetu i ŭmacavańnie dziaržaŭnaści, zabieśpiačeńnie hodnaha materyjalnaha ŭzroŭniu žyćcia, praviadzieńnie palityčnych i ekanamičnych reformaŭ, pieraadoleńnie mižnarodnaj izalacyi dy ŭvachodžańnie ŭ eŭrapiejskuju supolnaść. Była pryniataja i admysłovaja zajava z nahody źbićcia R.Hareckaha: udzielniki schodu zapatrabavali źmianić kiraŭnictva staličnaj milicyi, jakoje nie daje rady svaim abaviazkam.

Usie prysutnyja padtrymali prapanovu arhkamitetu źviarnucca da ŭładaŭ z patrabavańniem biaspłatna puścić Usiebiełaruski źjezd intelihiencyi ŭ Pałac Respubliki. Sustaršynia arhkamitetu Alaksiej Maračkin abhruntavaŭ hetaje patrabavańnie tym, što «heta ž na našyja hrošy pastaŭlena». Praŭda, na stanoŭčy adkaz arhanizatary nia duža raźličvajuć i praciahvajuć šukać zapasnyja varyjanty.

Arkadź Šanski