Usiebiełaruski schod intelihiencyi «Niezaležnaja Biełaruś — svabodnaje i zamožnaje hramadztva» adbudziecca 16 sakavika ŭ pamiaškańni mienskaha pałacu kultury «Sukno» (vuł. Matusieviča, 20). Za arendu pamiaškańnia (2400 tys. rubloŭ) zapłacili sami delehaty, nie šukajučy nijakich hrantaŭ. Z kožnaha ŭdzielnika Schodu patrabavaŭsia arhanizacyjny ŭniosak u pamiery 5 tys. rubloŭ. «Zbor srodkaŭ praciahvajecca, — kaža adzin z sustaršyniaŭ arhkamitetu Ŭładzimier Kołas. — My spadziajomsia, što zmožam i dać padsiłkavacca delehatam, i zładzić kulturnuju prahramu». Ad Miensku na schod vyłučanyja 230 čałaviek. Peŭnuju kvotu (da 50 asobaŭ) maje arhkamitet. Vyłučeńnie delehataŭ pa abłaściach adbyvajecca jašče dahetul.
Hałoŭnaj «pieraškodaj» u masavaści schodu stała poŭnaja finansavaja niezaležnaść, jakuju pastavili svajoj metaj arhanizatary. Na svoj schod ludzi musiać jechać za svaje hrošy. I čym dalej žyvieš ad Miensku, tym bolšych vydatkaŭ vymahaje daroha. Tamu samymi šmatlikimi na schodzie buduć delehacyi Miensku dy Mienskaj vobłaści.
Tamara Mackievič, kaardynatarka pa suviaziach z delehatami Mienščyny, zaznačyła, što ŭžo pa stanie na sieradu maje śpis z 101 asoby. Schody prajšli ŭ Maładečnie, Radaškavičach, Niaśvižy, Barysavie, Salihorsku, Słucku, Naračy, Vialejcy. U Krupkach adbylisia až dva schody.
Haradzienščyna abrała 53 delehataŭ z Mastoŭ, Lidy, Navahradku, Smurhoniaŭ i samoj Horadni. Bieraściejščyna na momant padrychtoŭki materyjału zdoleła vyłučyć tolki kala 10 čałaviek (ź Biełaaziersku, Ivacevičaŭ, Biarozy). «Voś-voś majuć adbycca schody ŭ Bieraści, Stolinie, Łunincy. Bieraście abiare šmat delehataŭ», — zaznačyła Alena Vałyniec, kaardynatarka pa suviaziach z delehatami Haradzienskaje, Bieraściejskaje i Viciebskaje abłaściej. Viciebščyna mieła na sieradu krychu mienš za 40 delehataŭ. Padrychtoŭčyja schody prajšli ŭ Viciebsku, Haradku, Voršy, Navapołacku, Šarkaŭščynie, Drysie (Vierchniadźvinsku), Hłybokim, Brasłavie, Biešankovičach, Loźnie.
Delehacyja z Homielščyny składajecca z 35 čałaviek (Homiel, Mazyr, Kalinkavičy, Rahačoŭ, Łojeŭ, Turaŭ). Ale, jak kaža kaardynatarka pa vobłaści Natalla Arusina, delehacyja maje pavialičycca za košt vyłučencaŭ ź Lelčycaŭ, Śvietłahorsku, Homielu. Niekalki dziasiatkaŭ delehataŭ, jak zapeŭnivaje U.Kołas, dašle Mahiloŭščyna.
Jašče U.Kołas zaznačyŭ, što na schod zmohuć patrapić nia tolki delehaty, ale i zaprošanyja hości. Achvotnyja pryniać udzieł u forumie ŭ jakaści haściej musiać źviarnucca ŭ arhkamitet (vuł. Rumiancava, 13, 220005, Miensk. Teł./faks: (017) 284-85-11). Navat u subotu jašče nia budzie pozna.
Nia buduć začynienyja dźviery schodu i dla pradstaŭnikoŭ tych haradoŭ i rajonaŭ, dzie nie adbylisia miascovyja schody pa vyłučeńni delehataŭ. U.Kołas zaznačyŭ: «Hetyja ludzi zmohuć zarehistravacca ŭ pałacy «Sukno», i my zaćvierdzim ich paŭnamoctvy na samim schodzie».
16 sakavika ŭ pałacy kultury «Sukno» adbudziecca svojeasablivy «parad aŭtarytetaŭ». Z dakładami majuć vystupić Uładzimier Parfianovič, Žanna Litvina, Mikoła Markievič, Stanisłaŭ Bahdankievič, Ivan Nikitčanka, Leanid Złotnikaŭ, Uładzimier Konan, Piotra Sadoŭski, Andrej Kurejčyk, Alaksiej Maračkin, Aleh Trusaŭ dy inš. Asnoŭnymi dakładčykami stanuć Valer Karbalevič, Hienadź Łyč i Ŭładzimier Kołas.
Arkadź Šanski
