Niama zhody ŭ mierkavańniach nakont upłyvu marychuany na zdaroŭje ludziej. Jak śćviardžaje brytanski medyčny ekspert, doŭhaterminovyja nastupstvy jaje rehularnaha ŭžyvańnia mohuć stacca takimi ž niebiaśpiečnymi, jak i nastupstvy paleńnia tytuniu.
Siońnia ŭ Vialikaj Brytanii hašyš rehularna palać 3,2 młn. čałaviek, a tytuń — 13 miljonaŭ. Paleńnie tytuniu štohod vyklikaje kala 120 tys. śmierciaŭ praz sardečnyja chvaroby, rak lohkich dy inš. Adnak dahetul nie było adnaznačnych dokazaŭ adpaviednaha škodnaha ŭździejańnia marychuany.
Atrymać ich ciažka, bo šmat chto z amataraŭ hašyšu palić i tytuń. Dyj maštabnyja daśledavańni siarod ludziej, jakija pryznalisia b u spažyvańni nielehalnych narkotykaŭ, pravieści ciažka. Tamu ŭrad krainy sprabuje «panizić» status hašyšu z klasy «V» da klasy «S» — to bok jaho ŭžyvańnie zastavałasia b nielehalnym, ale za heta i ŭ turmu nie sadzili b. Kali, viadoma, niama «dadatkovych abstavinaŭ», kštałtu paleńnia hašyšu pobač ź dziećmi.
Adnak prafesar-taksykolah Džon Hienry ź londanskaha «Imperyjał Koledž» śćviardžaje: kali b doŭhaterminovyja nastupstvy ad užyvańnia hašyšu byli takimi ž niebiaśpiečnymi, jak ad paleńnia tytuniu, kolkaść śmierciaŭ ad hašyšu była b značna bolšaja. Kali ad cyharetaŭ štohod pamiraje 120 tys. čałaviek z 13 miljonaŭ, dyk z 3,2 młn. čałaviek, jakija ŭžyvajuć hašyš, štohod pamirała b 30 tysiačaŭ. Ale navat nievialikaja kolkaść śmierciaŭ dazvalaje ličyć hašyš pahrozaj zdaroŭju. Choć «dozy» hašyšu značna mienšyja, patencyjnaja niebiaśpieka ad kožnaj «zaciažki» vyšejšaja. Padčas spalvańnia hašyšu i tytuniu vydzialajucca kala čatyroch tysiačaŭ identyčnych chimičnych rečyvaŭ.
Prahnozy adnosna kolkaści śmierciaŭ ad hašyšu niapeŭnyja i tamu, što pakul nieviadoma, ci praciahnie siońniašniaja moładź rehularna palić hašyš u bolš stałym vieku. Kali nie, dyk tearetyčna ryzyka zaŭčasnaj śmierci značna źnizicca. Taksama jak amatary tytuniu mohuć źnizić ryzyku zachvorvańnia na rak, kinuŭšy palić da siaredniaha vieku.
