Pačalisia rasiejska-biełaruskija pieramovy ab novych cenach na enerhanośbity.
Z ulikam apetytaŭ paŭprada «Hazpromu» sp.Milera — vyciahnuć z nas utraja bolš «uašak» — niaciažka prahnazavać, jakimi zahałoŭkami ŭzimku buduć strakacieć ajčynnyja hazety:
«V «Sportmastierie» odiejuś i Čubajsa nie bojuś» («Biełorusskaja hazieta»), «Na Miadzielščynie vartaŭnik ad choładu pieratvaryŭsia ŭ śniežnaha čałavieka» («Nie možiet byť»), «Moładź marozu nie baicca» («Znamia junosti»), «Łukašenka stavić uradu koł ź minusam» («Sovietskaja Biełoruśsija»).
Kab paźbiehnuć novaha ledavikovaha peryjadu, uradu zastajecca abyhryvać «Hazprom» za stałom pieramovaŭ. Pa rachunkach płaciać vyklučna rynkavyja idealisty abo mazachisty. I tut treba vyznać: staraja dyplamatčnaja taktyka viadzieńnia pieramovaŭ, pabudavanaja na prajavach eratyčnaha kachańnia da Rasiei, nie daje nijakaha KKDz. Sučasnaje kiraŭnictva Rasiei, jak i naležyć technakratam, fryhidnaje na emocyi i pačućci. U pylnych anałach historyi dyplamatyi treba šukać novyja aryhinalnyja metady mastactva pieramovaŭ.
Naprykład, metad Hramyki. Kultavy dyrektar savieckaha zamiežnaha departamentu na ŭsie pytańni apanentaŭ adnaskładova reahavaŭ: «Nie». Farmat dyjalohu Biełaruś—«Hazprom» u vypadku pryniaćcia hetaj taktyki nabudzie nastupnuju formu:
Miler: Treba padpisać damovu nakont novych cenaŭ.
Łukašenka: Nie-je-jejeiejeiejeie.
Miler: Tady pryvatyzujcie «Biełtranshaz».
Łukašenka: Nie-je-jejeiejeiejeiejeieje.
Miler: Tady ja prypyniaju pieramovy.
Łukašenka: Nie-je-jejeiejeiejeiejeiejeie.
Miller: Tady davajcie padpisvać damovu nakont novych cenaŭ.
Łukašenka: Nie-je-jejeiejeiejeiejeiejeieje…
Paśla dvuch-troch dzion takich pieramovaŭ Milera dastaviać na resepšn u Navinki, ceny na haz zastanucca starymi i ŭsio budzie dobra.
Metad Talejrana. U 1814 h. kiraŭnik francuskaha MZS zrabiŭ usio, kab delehaty Vienskaha kanhresu tančyli z ranku da nočy. U ekstazie jany zabylisia na svaju dypmisiju, i postnapaleonaŭskaja Francyja paźbiehła haniebnaha miru. Zatančyć Milera niaciažka. Lambada ź Lidzijaj Jarmošynaj prymusić top-menedžera «Hazpromu» nazaŭsiody zabycca na enerhanośbity, košt barela na londanskaj biržy i pryvatyzacyju biełaruskaj naftahazavaj systemy.
Asabista mnie jak čiełavieku levych pohladaŭ najbolš sympatyčny metad Trockaha. Padčas pieramovaŭ ź niemcami ŭ Bieraści Leŭ Davydavič kantuziŭ kajzeraŭskich dyplamataŭ formułaj «Ni miru, ni vajny». Budučynia prademanstravała dyplamatyčny hienij zasnavalnika 4-ha Internacyjanału. Blickryh niemcaŭ pryvioŭ da taho, što Mikołka Paravoz syšoŭ u partyzany i prymusiŭ niemčuru biehčy. Łukašenka, jak i Trocki, pavinien vyrubić Milera: «Damovy padpisvać nia budziem i za haz bašlać nia budziem». Usia inicyjatyva piarojdzie da masaŭ na miescach: našy pradpryjemstvy buduć pa-partyzansku tyryć rasiejski haz, a z aficyjnaha Miensku — jak z husi vada.
Kali ž surjozna, dyk pakul kožnamu hramadzianinu Biełarusi, da apošniaha biełaruskaha klašara, nia budzie zabiaśpiečanaje prava na, fihuralna kažučy, jahonuju haračuju trubu ŭ padvale, prava na žyćcio, — płacić «Hazpromu» nia varta. Na luboj padstavie: navat tamu, što ŭ Čubajsa nie seksualny zad. Spačatku haz, paśla hrošy. Inakš my nia nacyja.
Lolik Uškin